ఒక్క ట్వీట్‌కే 4 గంటల్లోనే.. చంద్రబాబు క్విక్ రిప్లై

ఏపీ సీఎం చంద్రబాబు నాయుడు పాలనా దక్షత గురించి ప్రత్యేకంగా చెప్పాల్సిన పని లేదు. పనిలోనే తనకు విశ్రాంతి అని చెప్తుంటారాయన. నిత్యం సమీక్షలు, సమావేశాలతో అధికారులను పరుగులు తీయిస్తూ.. పాలనాపరంగా మరింత మెరుగ్గా ఏం చేయాలనే దానిపైనే కృషి చేస్తుంటారు. ఇక ఏపీ సీఎంగా బాధ్యతలు స్వీకరించిన తర్వాత చంద్రబాబు తన మార్క్ చూపిస్తున్నారు. 1995 నాటి చంద్రబాబును చూపిస్తానంటూ పదే పదే చెప్తున్న చంద్రబాబు.. పాలనలోనూ దాన్ని నిజం చేసి చూపిస్తున్నారు. అయితే తాజాగా సీఎం చంద్రబాబు ఓ విషయంలో స్పందించిన తీరు.. నెటిజనాన్ని ఆకట్టుకుంటోంది. ఒకే ఒక్క ట్వీట్‌తో అపాయింట్‌మెంట్ ఇచ్చారు చంద్రబాబు.

ప్రముఖ సంఘసేవకురాలు, పద్మశ్రీ అవార్డు గ్రహీత అయిత సునీతా కృష్ణన్.. సీఎం చంద్రబాబును కలవాలని భావించారు. అయితే ఆమెకు ముఖ్యమంత్రి అపాయింట్‌మెంట్ దొరకలేదు. దీంతో ఎక్స్ వేదికగా ట్వీట్ చేశారు సునీత కృష్ణన్. చంద్రబాబు సర్ మీ అపాయింట్‌మెంట్ తీసుకోవడానికి భిన్నమైన మార్గాన్ని ఎంచుకున్నా. మీరు చాలా బిజీగా ఉన్నారని నాకు తెలుసు. అయితే రెండు ముఖ్యమైన ప్రతిపాదనలు మీ ముందు ఉంచేందుకు వచ్చే వారం మధ్యలో ఎప్పుడైనా నాకు ఓ పది నిమిషాలు సమయం కేటాయించగలరు అంటూ సునీతా కృష్ణన్ ట్వీట్ చేశారు. అపాయింట్‌మెంట్ కోసం సాధారణ పద్ధతిలో ప్రయత్ని్ంచినప్పటికీ కుదరకపోవటంతోనే.. ట్వీట్ చేస్తున్నానని. క్షమించాలని కోరారు.

అయితే గంటల వ్యవధిలోనే సునీతా కృష్ణన్ ట్వీట్‌కు చంద్రబాబు స్పందించారు. ఆగస్ట్ పదో తేదీ మధ్యాహ్నం 3 గంటల 40 నిమిషాలకు సునీత కృష్ణన్ ట్వీట్ చేస్తే.. రాత్రి 7 గంటల 40 నిమిషాలకు చంద్రబాబు స్పందించారు. ఆగస్ట్ 13వ తేదీ మంగళవారం మధ్యాహ్నం రెండు గంటలకు కలుద్దామంటూ చంద్రబాబు రిప్లై ఇచ్చారు. అపాయింట్‌మెంట్ కోరుతూ ట్వీట్ చేసినందుకు ఫర్వాలేదంటూనే.. తన బృందం మిమ్మల్ని సంప్రదిస్తుందంటూ చంద్రబాబు ట్వీట్ ద్వారా సునీతా కృష్ణన్‌కు తెలియజేశారు. ఏపీ ప్రజలకు మరింత మెరుగైన పాలన అందించేందుకు తాము కృషిచేస్తున్నామని.. మిమ్మల్ని కలవడం ద్వారా మరింత మెరుగ్గా ఏం చేయగలమో చర్చిద్దామని చంద్రబాబు బదులిచ్చారు.

అయితే కేవలం ఒక్క ట్వీట్ ద్వారా నాలుగు గంటల్లోపే సీఎం అపాయింట్‌మెంట్ ఇచ్చారంటూ టీడీపీ శ్రేణులు దీనిని వైరల్ చేస్తున్నాయి. సింపుల్ గవర్నమెంట్.. ఎఫెక్టివ్ గవర్నెన్స్ అంటే ఇదేనంటూ టీడీపీ ట్వీట్ చేసింది. పలువురు నెటిజనం కూడా చంద్రబాబు స్పందించిన తీరుపై ప్రశంసలు కురిపిస్తున్నారు.