ఏదో ఒక రోజు ఒకే రోజు 600 రన్స్ కొడతాం: ఇంగ్లాండ్‌ బ్యాటర్‌ ఓలీ పోప్‌

టెస్టుల్లో వన్డే తరహాలో బ్యాటింగ్ చేస్తుండటంపై ఆ జట్టు బ్యాటర్‌ ఓలీ పోప్‌.. ఆసక్తికర వ్యాఖ్యలు చేశాడు. టెస్టుల్లో ఒక్కరోజులో 200-300 పరుగులు చేయడం అనేది గతం అని.. తాము ఏదో ఒకరోజు ఒకే రోజు ఆటలో 600 పరుగులు చేస్తామని ధీమా వ్యక్తం చేశాడు. భవిష్యత్‌లో దీనికోసం తాము ప్రయత్నిస్తామని.. ప్రత్యర్థి దేశాలకు హెచ్చరికలు పంపాడు.

“మేం (ఇంగ్లాండ్ ప్లేయర్లు) ఎల్లప్పుడూ పరుగుల దాహంతోనే ఉంటాం. వీలైనంత వేగంగా రన్స్ రాబట్టడమే మా లక్ష్యం. గతంతో పోలిస్తే ఇప్పుడు మా బ్యాటింగ్ లైనప్‌.. మరింత బలంగా తయారైంది. అందుకే వీలైనంత వరకు దూకుడుగా ఆడాలనే అనుకుంటున్నాం. ఇది మా సహజశైలి. కానీ అన్ని సార్లు మేం అనుకున్నట్లు జరగకపోవచ్చు. కొన్ని మ్యాచ్‌లో ఒక్క రోజులో మేం 280-300 పరుగులు మాత్రమే చేయొచ్చు. కానీ, మేం పరిస్థితుల్ని అర్థం చేసుకుంటున్నాం. భవిష్యత్‌లో ఏదో ఒక సమయంలో మేం కచ్చితంగా 500-600 పరుగులు చేస్తాం. ఆ రికార్డు సాధించడం అనేది గొప్ప విషయం. కానీ మేం దానికోసం ప్రయత్నిస్తాం” అని ఓలీ పోప్ అన్నాడు.

బజ్‌బాల్‌ ఆటతో ఇంగ్లాండ్‌ జట్టు టెస్టుల్లో రికార్డులు సృష్టిస్తోంది. అయితే బజ్‌బాల్‌ ఆట కంటే ముందే ఆ జట్టు ఇదే పంథాలో ఆడేది. టెస్టుల్లో ఒక్క రోజులో అత్యధిక పరుగులు చేసిన రికార్డు ఇప్పటికీ ఇంగ్లాండ్ పేరిటే ఉంది. 1936లో భారత్‌పై మాంచెస్టర్‌ వేదికగా జరిగిన టెస్టు మ్యాచ్‌లో రెండోరోజు ఆటలో ఆ జట్టు 588/6 స్కోరు నమోదు చేసింది. అంతేకాకుండా టెస్టుల్లో మొదటి రోజు అత్యధిక పరుగులు చేసిన రికార్డు కూడా ఇంగ్లీష్‌ జట్టు పేరిటే ఉంది. బెన్‌స్టోక్స్ సారథ్యంలో ఇంగ్లాండ్‌ 2022 డిసెంబర్‌ 1న పాకిస్థాన్‌తో మ్యాచ్‌లో తొలిరోజే 506/4 పరుగులు చేసింది.