నిఫా వైరస్‌.. సోకిన గంటల వ్యవధిలోనే మరణం

కేరళలో నిఫా వైరస్ సోకి ఆస్పత్రిలో చికిత్స పొందుతున్న బాలుడు.. చనిపోవడం ప్రస్తుతం తీవ్ర భయాందోళనలకు గురి చేస్తోంది. ప్రైవేటు ఆస్పత్రిలో చికిత్స పొందుతున్న 14 ఏళ్ల బాలుడు మృతి చెందినట్లు కేరళ రాష్ట్ర వైద్య ఆరోగ్య శాఖ మంత్రి వీణా జార్జ్ వెల్లడించారు. ఇక కొన్ని రోజుల క్రితమే నిఫా వైరస్ కేరళలో వ్యాప్తి చెందగా.. తాజాగా ఒక మరణం కూడా చోటు చేసుకోవడంతో ఆ రాష్ట్ర ప్రభుత్వం అప్రమత్తం అయింది. బాలుడిని పరీక్షించిన తర్వాత రక్త నమూనాలను ల్యాబ్‌కు పంపించగా.. అది నిఫా వైరస్ అని తేల్చారు.

మలప్పురం జిల్లాలో నిఫా వైరస్‌ సోకిన 14 ఏళ్ల బాలుడు మృతిచెందినట్లు కేరళ మంత్రి వీణా జార్జ్‌ ఆదివారం వెల్లడించారు. స్థానికంగా ఉన్న ఓ ప్రైవేటు ఆస్పత్రిలో చికిత్స పొందుతూ ఆ బాలుడు మరణించినట్లు తెలిపారు. అయితే ఆ బాలుడికి నిఫా వైరస్‌ సోకినట్లు ధ్రువీకరించిన తర్వాత కొన్ని గంటల వ్యవధిలోనే అతడు మరణించడం తీవ్ర ఆందోళన కలిగిస్తోంది. అయితే ఆ బాలుడికి నిఫా వైరస్ సోకినట్లు వీణా జార్జ్‌ శనివారమే వెల్లడించారు.

పూణేలోని నేషనల్‌ ఇన్‌స్టిట్యూట్‌ ఆఫ్‌ వైరాలజీ -ఎన్‌ఐవీకి ఆ బాలుడి నమూనాలు పంపించగా.. అక్కడ నిర్ధారించినట్లు తెలిపారు. ఈ క్రమంలోనే అప్పటికే ఆ బాలుడు ప్రైవేట్ ఆస్పత్రిలో వెంటిలేటర్‌పై చికిత్స పొందుతుండగా.. అతడిని కోజికోడ్‌లోని ప్రభుత్వ వైద్య కళాశాలకు తరలించేందుకు ఏర్పాట్లు చేసినట్లు తెలిపారు. ఇంతలోనే ఆ బాలుడు మృతిచెందడం గమనార్హం. దీంతో ఆ బాలుడి దగ్గరికి ఎవరెవరు వచ్చారన్నది అధికారులు ఆరా తీస్తున్నారు.

ఆదివారం తెల్లవారుజామున ఆ బాలుడికి మూత్రం ఆగిపోయిందని డాక్టర్లు తెలిపారు. దీంతో వెంటనే అప్రమత్తమై డాక్టర్లు మరింత మెరుగైన చికిత్స అందించేందుకు ప్రయత్నించగా.. కాసేపటికి తీవ్ర గుండెపోటు వచ్చిందని.. దాంతో ఆ బాలుడు చనిపోయినట్లు మంత్రి తెలిపారు. బాలుడిని బతికించేందుకు ఆ డాక్టర్లు చేసిన ప్రయత్నాలు అన్నీ విఫలమైనట్లు వెల్లడించారు. అంతర్జాతీయ ప్రమాణాలకు అనుగుణంగా అంత్యక్రియలు నిర్వహిస్తామని చెప్పారు. దీనిపై బాలుడి తల్లిదండ్రులు, ఇతర కుటుంబ సభ్యులతో మలప్పురం జిల్లా కలెక్టర్‌ మాట్లాడి నిర్ణయం తీసుకుంటారని తెలిపారు.