ఉక్రెయిన్ అధ్యక్షుడు వొలొడిమిర్ జెలెన్స్కీతో అమెరికా మాజీ అధ్యక్షుడు, రిపబ్లికన్ పార్టీ అభ్యర్ధి డొనాల్డ్ ట్రంప్ శుక్రవారం ఫోన్లో మాట్లాడారు. ఈ సందర్భంగా గత రెండున్నరేళ్లుగా రష్యాతో జరుగుతోన్న ఘర్షణ ఆగేలా చూస్తానని ట్రంప్ హామీ ఇచ్చారు. జెలెన్స్కీ, తన మధ్య మంచి సంభాషణ జరిగిందని ఈమేరకు ట్రంప్ ట్వీట్ చేశారు. ‘‘ఉక్రెయిన్ అధ్యక్షుడు జెలెన్స్కీ, నేను ఫోన్లో పలు అంశాల గురించి మాట్లాడుకున్నాం.. రిపబ్లికన్ పార్టీ జాతీయ సదస్సు విజయవంతమైనందుకు నాకు ఆయన అభినందనలు తెలిపారు. అలాగే నాపై జరిగిన దాడిని ఆయన తీవ్రంగా ఖండించారు... జెలెన్స్కీ నన్ను సంప్రదించినందుకు అభినందిస్తున్నాను.. ఎందుకంటే అమెరికా తదుపరి అధ్యక్షుడిగా నేను ప్రపంచానికి శాంతిని తెస్తాను.. చాలా మంది జీవితాలను, లెక్కలేనన్ని అమాయక కుటుంబాలను నాశనం చేసిన యుద్ధాన్ని ముగిస్తాను’’ అని తెలిపారు.
అంతేకాదు, నవంబర్లో జరిగే అధ్యక్ష ఎన్నికల్లో విజయం సాధిస్తే జనవరిలో అధికారం చేపట్టకముందే ఉక్రెయిన్ యుద్ధానికి ముగిసేందుకు చర్యలు తీసుకుంటాను అని ట్రంప్ పేర్కొన్నారు. అంతేకాదు, తాను 2022లో అమెరికా అధ్యక్షుడిగా ఉండి ఉంటే, అసలు ఈ యుద్ధం మొదలయ్యేది కాదని ఆయన అభిప్రాయపడ్డారు. చర్చల ద్వారా యుద్ధాలను ముగించి, శాంతిని నెలకొల్పుతానని ఆయన స్పష్టం చేశారు.
ట్రంప్తో ఫోన్లో మాట్లాడినట్టు జెలెన్స్కీ కూడా ధ్రువీకరించారు. ఈ మేరకు ఆయన ట్విట్టర్లో స్పందిస్తూ.. ‘రిపబ్లికన్ అభ్యర్ధిగా నామినేట్ అయిన డొనాల్డ్ ట్రంప్నకు శుభాకాంక్షలు.. పెన్సిల్వేనియాలో ఆయనపై జరిగిన హత్యాయత్నం దిగ్భ్రాంతికి గురిచేసింది.. భవిష్యత్తులో అతనికి బలం, సంపూర్ణ భద్రత ఉండాలని నేను కోరుకుంటున్నాను.. రష్యా ఉగ్రవాదాన్ని ఎదుర్కొనేందుకు అమెరికా అందిస్తోన్న సహకారంపై కృతజ్ఞతతో ఉంటాం... అయితే మా నగరాలు, గ్రామాలపై రష్యా దాడులు కొనసాగుతున్నాయి..అయినప్పటికీ శాంతి చర్చలకు మేము సుముఖంగా ఉన్నాం.. శాంతి కోసం న్యాయంగా, శాశ్వతంగా ఉండేలా ఏ చర్యలు తీసుకోవచ్చో వ్యక్తిగత సంభాషణలో అధ్యక్షుడు ట్రంప్ చెప్పిన అంశాలనే మేము ఏకీభవించాం’ అని ఆయన తెలిపారు.
రష్యా దండయాత్ర మొదలైనప్పటి నుంచి ఉక్రెయిన్కు కొన్ని బిలియన్ డాలర్ల మేర సైనిక సహకారం అమెరికా అందజేస్తోంది. ఒకవేళ, ఎన్నికల్లో ట్రంప్ విజయం సాధిస్తే కీవ్కు అమెరికా నిరంతర మద్దతు ప్రశ్నార్థకం మారుతుంది. రిపబ్లికన్ పార్టీ ఉపాధ్యక్ష అభ్యర్ధి జేడీ వాన్స్ ఓసారి మాట్లాడుతూ.. ఉక్రెయిన్కు అమెరికా సాయం నిలివేయాలని అన్నారు. ఈ ఏడాది తొలినాళ్లలో ఉక్రెయిన్కు 61 బిలియన్ డాలర్ల విలువైన సైనిక సహాకారానికి ఆమోదం తెలియజేయడాన్ని వ్యతిరేకించినవారిలో వాన్స్ కూడా ఒకరు.
![]() |
![]() |