టీమిండియా స్టార్ పేసర్ జస్ప్రీత్ బుమ్రా.. ప్రపంచ క్రికెట్లో తనకంటూ ప్రత్యేక గుర్తింపును తెచ్చుకున్నాడు. తనదైన శైలిలో బౌలింగ్ యాక్షన్తో ప్రత్యర్థి బ్యాటర్లను బెంబేలెత్తిస్తుంటాడు ఈ పేసు గుర్రం. విభిన్నంగా ఉండే బుమ్రా బౌలింగ్ శైలిని తలుచుకుంటేనే ప్రత్యర్థి బ్యాటర్లకు హడల్. ఎంతో మంది చిన్నారులు సైతం బుమ్రా లాగా బౌలింగ్ చేయాలని కోరుకుంటారు. అతడిలా బంతులు వేయాలని ఆశపడుతుంటారు. అందుకు అనుగుణంగా కఠోర సాధన చేస్తుంటారు. అయినా.. బుమ్రా స్టైల్ను మాత్రం ఎవరూ అనుసరించలేకపోతున్నారు.
అయితే అచ్చం జస్ప్రీత్ బుమ్రాలా బౌలింగ్ చేస్తున్న ఓ బుడతడి వీడియో నెట్టింట వైరల్గా మారింది. ఈ వీడియో పాతదో.. కొత్తదో.. ఎక్కడితో స్పష్టంగా తెలియనప్పటికీ 33 సెకన్ల వీడియో మాత్రం అందరి దృష్టినీ ఆకర్షిస్తోంది. అయితే కొందరు మాత్రం ఆ బడుతడిది పాకిస్థాన్ అని పేర్కొంటున్నారు. ఈ వీడియోలో ఆ చిన్నోడి రనప్.. బౌలింగ్ స్టైల్ అంతా బుమ్రా వేసినట్లే ఉంది. 33 సెకన్ల వీడియోల సదరు చిన్నారి బౌలర్.. 4 బంతులు వేయగా అందులో ఒక్క బంతిని కూడా బ్యాటర్ కనీసం బ్యాటుకు తగిలించలేకపోయాడు.
సోషల్ మీడియాలో ఈ వీడియో వైరల్గా మారింది. దీనిపై స్పందించిన పాకిస్థాన్ దిగ్గజ క్రికెటర్ వసీం అక్రమ్.. బాలుడిని కొనియాడాడు. "వావ్.. బంతిపై అతడి నియంత్రణను చూడండి.. చూడటానికి అచ్చం ది గ్రేట్ జస్ప్రీత్ బుమ్రా లాగే ఉంది.. నా దృష్టిలో ఈరోజుకి ఇదే బెస్ట్ వీడియో" అని ట్విట్టర్లో పేర్కొన్నాడు. ఈ వీడియోను చూసిన పాకిస్థాన్ ఫ్యాన్స్.. బాలుడిని కొనియాడుతూనే.. పాక్ బౌలర్లను ఏకిపారేస్తున్నారు. హరిస్ రవూఫ్ కంటే వంద రెట్లు బెటర్ అని కామెంట్లు చేస్తున్నారు. ఇదే సమయంలో బంతిని బ్యాటుకు తగిలించేదుకు కష్టడుతున్న బ్యాటర్ను పాకిస్థాన్ బ్యాటర్లతో పోలుస్తున్నారు. కొంపదీసి క్రీజులో మహమ్మద్ రిజ్వాన్ లేడుగా అని ఎద్దేవా చేస్తున్నారు.
కాగా టీ20 ప్రపంచకప్ 2024 తర్వాత జస్ప్రీత్ బుమ్రా విశ్రాంతి తీసుకుంటున్నాడు. జింబాబ్వే పర్యటనకు దూరంగా ఉన్న బుమ్రా.. శ్రీలంక పర్యటనకు ఎంపికయ్యే అవకాశం ఉంది. టీ20 ప్రపంచకప్లో బుమ్రా 8 మ్యాచుల్లో 15 వికెట్లు తీశాడు. జట్టు ఛాంపియన్గా నిలవడంలో కీలకపాత్ర పోషించాడు. శ్రీలంక పర్యటనలో భారత్.. 3 టీ20లు, 3 వన్డేలు ఆడనుంది. టీ0 మ్యాచ్లు జులై 2, 28, 30 తేదీల్లో జరగనున్నాయి. వన్డే సిరీస్ ఆగస్టు 2న ప్రారంభం అవుతుంది. ఆగస్టు , ఆగస్టు 7 తేదీల్లో 2,3వ వన్డేలు జరుగుతాయి.
![]() |
![]() |