ధర్మవరం వాసులకు శుభవార్త.. చెన్నైకి బస్సు సర్వీస్.. ప్రారంభించిన మంత్రి
Andhra Pradesh Telugu | Suryaa Desk | Published : Wed, Jul 10, 2024, 08:11 PM
ధర్మవరం నుంచి చెన్నైకు నూతన బస్సు సర్వీసు అందుబాటులోకి వచ్చింది. ఏపీ ఆరోగ్యశాఖ మంత్రి సత్యకుమార్ యాదవ్ బుధవారం ఈ సూపర్ లగ్జరీ బస్సు సర్వీసును ప్రారంభించారు. ధర్మవరం పట్టుచీరలకు ప్రసిద్ధి కాగా.. ఎంతో మంది వ్యాపారులు, వ్యాపార నిమిత్తం ఇక్కడి నుంచి చెన్నైకు వెళ్తుంటారు. ఈ నేపథ్యంలో ధర్మవరం వాసుల కోసం ధర్మవరం నుంచి చెన్నైకు ఏపీఎస్ఆర్టీసీ సూపర్ లగ్జరీ బస్సు సర్వీసును తీసుకువచ్చింది. ఈ బస్సు పుట్టపర్తి, కదిరి, మదనపల్లె, తిరుపతి మీదుగా చెన్నైకు వెళ్తుంది. ధర్మవరం నుంచి చెన్నై వెళ్లే వ్యాపారస్థులకు, కార్గో సర్వీసులకు ఈ బస్సు సర్వీసు ఎంతో ఉపయోగకరంగా ఉంటుందని ధర్మవరం ఎమ్మెల్యే, మంత్రి సత్యకుమార్ యాదవ్ అభిప్రాయపడ్డారు. అలాగే తిరుపతి, చెన్నైలో చదువుకునేవాళ్లకు, ఉద్యోగం చేసుకునేవాళ్లకూ ఉపయోగపడుతుందని చెప్పారు. మరోవైపు తిరుమల వేంకటేశ్వరస్వామి దర్శనానికి వెళ్లే భక్తులు ఆన్లైన్లో టికెట్లు బుక్ చేసుకునేలా లింకప్‌నూ ఈ బస్సు ద్వారా ఆర్టీసీ వాళ్లు కల్పించారు.
|
|