అవ్వాతాతలకు గుడ్ న్యూస్.. జులై పింఛన్లపై ఏపీ ప్రభుత్వం కీలక ప్రకటన

ఏపీలో పింఛన్ తీసుకునేవారికి ప్రభుత్వం గుడ్ న్యూస్ చెప్పింది. నెలాఖరు సమీపిస్తున్న నేపథ్యంలో వచ్చే నెలలో పింఛన్లు ఎలా పంపిణీ చేస్తారనే దానిపై క్లారిటీ ఇచ్చింది. ఎన్నికల కోడ్ అమల్లో ఉన్న కారణంగా గత మూడు నెలలు రెండు విధాలుగా సామాజిక పింఛన్లు పంపిణీ చేశారు. వృద్ధులు, దివ్యాంగులకు ఇళ్లవద్దకే పింఛన్ పంపిణీ చేయగా.. మిగతా వారికి బ్యాంకు ఖాతాల్లో పింఛన్ జమచేశారు. అయితే జులై నెలలో ఇంటి వద్దకే పింఛన్ పంపిణీ చేస్తామని ఏపీ మంత్రి సవిత వెల్లడించారు. జులై ఒకటో తేదీనే సామాజిక భద్రత పింఛన్ల పంపిణీ ఉంటుందన్నారు ఏపీలో జులై నెలలో ఏడు వేలు పింఛన్ రూపంలో అందించనున్నారు. ఎన్నికల్లో ఇచ్చిన హామీ ప్రకారం పింఛన్ రూ.4 వేలకు పెంచడంతో పాటుగా ఏప్రిల్, మే, జూన్ నెలల బకాయిలు మూడు వేలు కలిపి ఏడు వేలు చెల్లించనున్నారు.

ఇక మంత్రిగా బాధ్యతలు స్వీకరించిన తర్వాత తొలిసారిగా సొంత నియోజకవర్గం పెనుగొండ వెళ్లిన సవితకు.. టీడీపీ శ్రేణులు ఘనస్వాగతం పలికాయి. పెనుగొండలో భారీ ర్యాలీ నిర్వహించారు. అనంతరం విలేకర్ల సమావేశంలో మాట్లాడిన మంత్రి సవిత.. మంత్రిగా అవకాశం ఇచ్చిన చంద్రబాబుకు ధన్యవాదాలు తెలియజేశారు. చేనేత రంగం అభివృద్ధికి కృషి చేస్తానని చెప్పారు. అలాగే గతంలో బీసీల కోసం టీడీపీ ప్రభుత్వం అమలు. చేసిన సంక్షేమ, రాయితీ, అభివృద్ధి పథకాలు అమలు చేసేందుకు చర్యలు తీసుకుంటున్నట్లు తెలిపారు. త్వరలోనే బీసీ కమిషన్ ఏర్పాటు చేస్తామని మంత్రి తెలిపారు. అలాగే బీసీ స్టడీ సర్కిళ్లలో వెనుకబడిన వర్గాలకు చెందిన విద్యార్థులు, నిరుద్యోగులకు ఉచితంగా డీఎస్సీ కోచింగ్ ఇవ్వనున్నట్లు మంత్రి తెలిపారు.

 ఇక 2014లో టీడీపీ ప్రభుత్వం అమలు చేసిన ఎన్టీఆర్ విదేశీ విద్య పథకాన్ని కొనసాగిస్తామని మంత్రి సవిత తెలిపారు. అలాగే ఉమ్మడి జిల్లాలకు మంజూరు చేసిన బీసీ భవన్ నిర్మాణాలను పూర్తి చేస్తామని.. చేనేత కళాకారులు, హస్తకళాకారులకు సబ్సిడీలు, ప్రోత్సాహకాలు అందిస్తామని చెప్పారు. జూలై ఒకటో తేదీ నుంచి రూ.7000 పింఛన్ పంపిణీ కార్యక్రమం, ఉమ్మడి జిల్లాలో డీఎస్సీ ఉచిత కోచింగ్ సెంటర్ ఏర్పాటు చేస్తున్నట్లు మంత్రి సవిత వెల్లడించారు.