నదిలో నుంచి రోడ్డుపైకి వచ్చిన 10 అడుగుల భారీ మొసలి.. భయంతో వణికిపోయిన స్థానికులు

మొసలి అంటేనా చాలా మంది వణికిపోతూ ఉంటారు. నీటిలో ఉన్నపుడు ఆ మొసలికి ఉండే బలం.. బయటికి వచ్చాక మాత్రం దానికి ఉండదు. అయినప్పటికీ మొసలి అంటే భయమే. అయితే నీటిలో ఉండే మొసలి కాస్తా.. అనుకోకుండా బయటికి వచ్చి.. జనావాసాల్లోకి చేరుకుంది. దీంతో అది కూడా భయపడిపోయి తిరిగి నీటిలోకి వెళ్లేందుకు ప్రయత్నించింది. నదికి అడ్డుగా ఉన్న రెయిలింగ్ ఎక్కేందుకు ప్రయత్నించినా.. అది సక్సెస్ కాలేదు. నదిలోకి వెళ్లేందుకు ఆ మొసలి అన్ని ప్రయత్నాలు చేయగా.. ఈ క్రమంలోనే దానికి గాయాలయ్యాయి. చివరికి పోలీసులు, ఫారెస్ట్ అధికారులు వచ్చి.. దాన్ని బంధించి.. మళ్లీ నదిలోకి విడిచిపెట్టారు. ఈ సంఘటన ఉత్తర్‌ప్రదేశ్‌లో చోటు చేసుకుంది.

బులంద్ షహర్‌లోని గంగా నదిలో ఉండే ఓ 10 అడుగుల భారీ మొసలి.. నీటిలో నుంచి దారి తప్పి బయటికి వచ్చింది. నరోరా ఘాట్ సమీపంలో నీటి నుంచి బయటికి వచ్చిన ఆ మొసలిని చూసి అక్కడ ఉన్న స్థానికులు భయంతో పరుగులు తీశారు. దీంతో ఆ మొసలి కూడా బయట ఉండలేక తిరిగి నీటిలోకి వెళ్లేందుకు యత్నించింది. అయితే ఆ నరోరా ఘాట్‌పై నిర్మించిన ఇనుప రేలింగ్ ఎక్కి నదిలోకి వెళ్లేందుకు మొసలి విశ్వ ప్రయత్నాలు చేసింది. అయితే అవేమీ ఫలించలేదు. ఈ క్రమంలోనే ఆ మొసలి గాయపడింది. నదిలో నుంచి మొసలి బయటికి వచ్చిన విషయాన్ని స్థానికులు.. పోలీసులు, ఫారెస్ట్ సిబ్బందికి చెప్పారు. దీంతో రంగంలోకి దిగిన అటవీ శాఖ అధికారులు, పోలీసులు.. ఆ మొసలిని బంధించే ప్రయత్నాలు చేశారు.

అది వినకపోవడంతో దాని మొహంపై ఒక గుడ్డను వేసి కళ్లు కనిపించకుండా చేశారు. అనంతరం తాళ్ల సహాయంతో ఎట్టకేలకు బంధించారు. దీంతో అక్కడ ఉన్న వారంతా ఊపిరిపీల్చుకున్నారు. చివరికి దాన్ని తీసుకుని వెళ్లి ఆ గంగా నదిలో వదిలిపెట్టారు. అయితే ఆ మొసలి రేలింగ్ ఎక్కేందుకు ప్రయత్నించి విఫలం కావడం, పై నుంచి కింద పడిపోవడాన్ని అక్కడే ఉన్న స్థానికులు వీడియోలు తీసి సోషల్ మీడియాలో పోస్ట్ చేయడంతో తెగ వైరల్ అవుతున్నాయి.