ఎట్టకేలకు శుక్రవారం భారత్‌కు రానున్న ప్రజ్వల్ రేవణ్ణ.. ఎయిర్‌పోర్టులోనే అరెస్ట్‌కు రంగం సిద్ధం

కర్ణాటకతోపాటు దేశ రాజకీయాల్లో సంచలనం సృష్టించిన ప్రజ్వల్ రేవణ్ణ వ్యవహారం ఎట్టకేలకు ఓ కొలిక్కి వచ్చేటట్టు కనిపిస్తోంది. ఈ అసభ్యకరమైన వీడియోల బాగోతం బయటకు వచ్చిన వెంటనే.. విదేశాలకు పారిపోయిన ప్రజ్వల్ రేవణ్ణ.. నెల రోజుల తర్వాత.. ఎట్టకేలకు బెంగళూరు వస్తానని సోమవారం ఓ వీడియో విడుదల చేశారు. ఇప్పటికే పోలీసులకు లొంగిపోవాలని ప్రజ్వల్ రేవణ్ణ కుటుంబ సభ్యులు పలుమార్లు విజ్ఞప్తులు, హెచ్చరికలు చేశారు. మరోవైపు.. కర్ణాటక ప్రభుత్వం కూడా అన్ని రకాల చర్యలు చేపట్టింది. ఇప్పటికే ప్రజ్వల్ రేవణ్ణపై లుక్ అవుట్ నోటీసులు జారీ చేసిన కర్ణాటక ప్రభుత్వం.. ఇంటర్ పోల్ బ్లూ కార్నర్ నోటీసులు కూడా జారీ చేసింది. ఇక ప్రజ్వల్ రేవణ్ణకు ఉన్న దౌత్య పరమైన పాస్‌పోర్టును రద్దు చేసే ప్రక్రియను కూడా కేంద్రం చేపట్టింది.

ఈ క్రమంలోనే ఈ వ్యవహారంలో తనను అరెస్ట్ చేయకుండా ముందస్తు బెయిల్ మంజూరు చేయాలని బెంగళూరు కోర్టులో పిటిషన్ దాఖలు చేయగా.. ఆ పిటిషన్‌ను కోర్టు కొట్టివేసింది. ప్రజ్వల్ రేవణ్ణ తరరఫున ఆయన లాయర్ అరుణ్ దాఖలు చేసిన పిటిషన్‌ని కోర్టు కోట్టివేసింది. దీంతో బెంగళూరులో ఈ నెల 31 వ తేదీన ప్రజ్వల్ రేవణ్ణ దిగగానే.. ఎయిర్‌పోర్టులోనే అరెస్ట్ చేసేందుకు కర్ణాటక పోలీసులు రంగం సిద్ధం చేసుకుంటున్నారు. ఇదే విషయాన్ని కర్ణాటక హోం మంత్రి జి. పరమేశ్వర కూడా స్పష్టం చేశారు. దీంతో ఈ కేసులో ఇప్పటివరకు పరారీలో ఉన్న ప్రజ్వల్ రేవణ్ణను.. ఎట్టకేలకు పోలీసులు అదుపులోకి తీసుకోనున్నారు.

ఈ వ్యవహారం బయటపడగానే జర్మనీకి పారిపోయిన ప్రజ్వల్ రేవణ్ణ.. మ్యూనిచ్ నుంచి బెంగళూరుకు విమాన టికెట్ బుక్ చేసుకున్నట్లు తెలుస్తోంది. మే 31 వ తేదీన తెల్లవారుజామున బెంగళూరు ఎయిర్‌పోర్టులో దిగనున్నట్లు తెలుస్తోంది. ప్రజ్వల్ రేవణ్ణకు సంబంధించిన అశ్లీల వీడియోలు అంటూ ఏప్రిల్‍‌ నెలలో రేవణ్ణ కుటుంబానికి గట్టి పట్టున్న హసన్ జిల్లాతోపాటు కర్ణాటక వ్యాప్తంగా ఎన్నికలకు ముందు తెగ వైరల్ అయ్యాయి. ఈ క్రమంలోనే ఏప్రిల్ 27 వ తేదీన జర్మనీ పారిపోయాడు. ఇక రేవణ్ణ ఇంట్లో పనిచేస్తున్న 47 ఏళ్ల మహిళపై అత్యాచారం, లైంగిక వేధింపులకు పాల్పడ్డారని ప్రజ్వల్ రేవణ్ణ, అతని తండ్రి హెచ్‌డీ రేవణ్ణలపై కేసు నమోదైంది. దీనిపై కర్ణాటక ప్రభుత్వం సిట్ ఏర్పాటు చేసింది. మే 18న సిట్ దాఖలు చేసిన దరఖాస్తు మేరకు ఎన్నికైన ప్రతినిధుల ప్రత్యేక కోర్టు ప్రజ్వల్ రేవణ్ణపై అరెస్ట్ వారెంట్ జారీ చేసింది.