ఏపీలో మందుబాబులకు బ్యాడ్‌న్యూస్.. ఈ మూడు రోజులు షాపులు బంద్

ఆంధ్రప్రదేశ్‌లో మందుబాబులకు బ్యాడ్‌న్యూస్.. మూడు రోజుల పాటూ మద్యం షాపులు మూతపడనున్నాయి. జూన్ 3, 4, 5 తేదీల్లో మద్యం అమ్మకాలపై నిషేధం విధించారు. ఈ మూడు రోజులు మద్యం అమ్మకాలు ఉండవని డీజీపీ హరీష్ కుమార్ గుప్తా తెలిపారు.. అన్ని జిల్లాల అధికారులకు ఆదేశాలు పంపినట్లు తెలిపారు. జూన్ 4న కౌంటింగ్ కేంద్రాల దగ్గర కట్టుదిట్టమైన భద్రతా ఏర్పాట్లు చేస్తున్నామన్నారు హరీష్. ఎలాంటి అవాంఛనీయ ఘటనలు జరగకుండా చర్యలు చేపట్టామని.. రాష్ట్రవ్యాప్తంగా హోటల్స్, లాడ్జీలలో తనిఖీలు చేసి అనుమానితులను అదుపులోకి తీసుకోవాలని సూచించారు. అంతేకాదు సోషల్ మీడియాలో జరిగే ప్రచారం, వార్తలను ఎప్పటికప్పుడు పరిశీలిస్తూ అప్రమత్తంగా ఉండాలని.. ఎవరైనా తప్పుడు ప్రచారం చేస్తే కఠినచర్యలు తీసుకుంటామని హెచ్చరించారు.

జూన్ 4న ఆంధ్రప్రదేశ్ ఎన్నికలకు సంబంధించి ఓట్ల లెక్కిస్తారు. ఈ కారణంగానే మద్యం షాపుల్ని మూసివేస్తున్నారు. ఎన్నికల ఓట్ల కౌంటింగ్ ముందు రోజు నుంచి.. కౌంటింగ్ ముగిసిన మరుసటి రోజు వరకు మద్యం అమ్మకాలను నిషేధించారు. అంతేకాదు ఎలాంటి విజయోత్సవ ర్యాలీలు, సంబరాలకు కూడా అనుమతి లేదని.. బాణసంచా వంటివి కాల్చడానికి వీల్లేదని పోలీసులు ఇప్పటికే తెలిపారు. కౌంటింగ్ సమయంలో భద్రతను కట్టుదిట్టం చేస్తున్నామని.. కౌంటింగ్ కేంద్రాల దగ్గర 144 సెక్షన్ అమల్లో ఉంటుందన్నారు.

ఏపీ ఎన్నికల పోలింగ్ రోజు, ఆ మరుసటి రోజు పల్నాడు జిల్లా, అనంతపురం జిల్లా, తిరుపతి జిల్లాల్లో జరిగిన ఘటనలతో ఎన్నికల సంఘం అప్రమత్తం అయ్యింది. ఇప్పటికే సిట్‌ను ఏర్పాటు చేసి విచారణ చేయిస్తోంది.. అలాగే అవసరమైన చోట్ల అదనపు బలగాలను మోహరించారు. అంతేకాదు కౌంటింగ్ రోజు ఎలాంటి అవాంఛనీయ ఘటనలు జరగకుండా ముందస్తుగా చర్యలు చేపట్టారు.. సమస్యాత్మక ప్రాంతాల్లో నిఘా ఉంచారు. అలాగే కేంద్రం నుంచి అదనపు బలగాలను రాష్ట్రానికి తీసుకొచ్చారు. జూన్ 15 వరకు నిఘా కొనసాగించాలని కేంద్ర ఇంటిలిజెన్స్ అలర్ట్‌తో ఎన్నికల సంఘం, పోలీసులు జాగ్రత్తలు తీసుకుంటున్నారు.