లక్ అంటే నీదే బ్రో.. కిరాణా షాప్‌కు వెళ్లి.. కోటీశ్వరుడిగా తిరిగొచ్చిన ట్రక్కు డ్రైవర్

కష్టపడకుండా కేవలం అదృష్టంతో ధనవంతులు కావాలని కోరుకునేవారు చాలా మంది లాటరీ టికెట్లు కొంటూ ఉంటారు. అయితే ఇలా లాటరీ టికెట్లు కొనుగోలు చేసి.. లక్కీ డ్రాలో విజేతగా నిలిచి కోట్లు కొల్లగొట్టిన వారు చాలా మంది ఉంటారు. ఇక లాటరీ టికెట్లు కొనేందుకు సర్వం అమ్మేసి డబ్బులు పెట్టి.. అప్పులు చేసి దివాళా తీసిన వారు కూడా చాలా మందే ఉంటారు. అయితే కొందరికి మాత్రమే అదృష్టం వరిస్తే.. చాలా మంది మాత్రం వారు ఖర్చు పెట్టిన టికెట్ డబ్బులు కూడా వెనక్కి రావు. అయినప్పటికీ లాటరీ టికెట్లు కొనడం మాత్రం వారు ఆపకుండా కొనసాగిస్తూనే ఉంటారు. అయితే ఈ లాటరీ టికెటే ఓ ట్రక్కు డ్రైవర్.. తలరాతను మార్చేసింది. ఏకంగా రూ.4 కోట్ల లాటరీ తగిలింది.

అమెరికాలోని వర్జీనియా రాష్ట్రంలో ఈ సంఘటన జరిగింది. సౌత్‌ బోస్టన్‌ వర్జీనియాకు చెందిన రస్సేల్ అనే ట్రక్కు డ్రైవర్.. కిరాణా సామాన్ల కోసం ఓ దుకాణానికి వెళ్లాడు. సామాన్లు అన్నీ తీసుకున్న తర్వాత అక్కడ స్క్రాచ్ ఆఫ్ లాటరీ టికెట్‌ను రస్సేల్ కొనుగోలు చేశాడు. షాపింగ్ అంతా పూర్తి చేసుకున్న తర్వాత ఆ లాటరీ టికెట్‌ను స్క్రాచ్ చేయాలని నిర్ణయించుకున్నాడు. షాపింగ్ అయిపోయిన తర్వాత పార్కింగ్‌లోకి వెళ్లిన రస్సేల్.. ఆ లాటరీ టికెట్‌ను స్క్రాచ్ చేసి చూడగా.. ఒక్కసారిగా నోరెళ్లబెట్టాడు. ఏకంగా ఆ లాటరీలో 5 లక్షల డాలర్లు అంటే మన భారత కరెన్సీలో ఏకంగా రూ.4 కోట్లు గెలుచుకున్నాడు.

అయితే తనకు అంత మొత్తంలో లాటరీ రావడం పట్ల రస్సేల్ ఆనందంలో మునిగిపోయాడు. తాను ఎన్నడూ ఇంత భారీ మొత్తంలో గెలుచుకోలేదని తెలిపాడు. ఇది తనకు గొప్ప అనుభూతి అని చెప్పాడు. అంతేకాకుండా లాటరీలో వచ్చిన డబ్బుతో.. తనకు ఎప్పటి నుంచో ఉన్న హాలిడే ట్రిప్‌కు వెళ్లాలనే కోరికను తీర్చుకోనున్నట్లు పేర్కొన్నాడు. ఆ తర్వాత మిగిలిన డబ్బులను ఏం చేయాలో ప్లాన్ చేస్తానని తెలిపాడు.