వంటగ్యాస్ సబ్సిడీపై కేంద్రం కీలక ప్రకటన.. మే 30 లోగా ఈ పని పూర్తి చేయాల్సిందే

కట్టెల పొయ్యిలు ఇప్పుడు కనిపించడం చాలా అరుదు. గ్రామాల్లో ఎక్కడో చోట.. ఎక్కువగా వృద్ధులు వీటిని వాడుతుండటం గమనించొచ్చు. దారిద్ర్యరేఖకు దిగువన ఉన్న వారికి, ఆర్థికంగా వెనుకబడిన వారికి కేంద్ర ప్రభుత్వం.. 2016సో ప్రధాన మంత్రి ఉజ్వల యోజన పథకం తీసుకొచ్చింది. దీని కింద ఉచితంగా గ్యాస్ కనెక్షన్ ఇవ్వడంతో పాటు.. ఏటా 12 గ్యాస్ సిలిండర్లు ఇస్తుంది. వీటి కింద ఒక్కో దానికి రూ. 300 చొప్పున సబ్సిడీ ఇస్తున్న సంగతి తెలిసిందే. గతంలో రూ. 200 గా ఉన్న సబ్సిడీని గతేడాది కేంద్ర ప్రభుత్వం రాఖీ కానుకగా.. దీనిని రూ. 300 కు పెంచి శుభవార్త అందించింది.

అయితే ఇప్పుడు ఈ గ్యాస్ సిలిండర్‌ వినియోగదారులు.. కచ్చితంగా గ్యాస్ ఏజెన్సీకి వెళ్లి.. అక్కడ ఇకేవైసీ వివరాలు అప్డేట్ చేయించుకోవాలని చెబుతున్నాయి ఆయిల్ కంపెనీలు. మరోవైపు కేంద్ర పెట్రోలియం మంత్రిత్వ శాఖ కూడా ఇదే చెబుతోంది. ఇక దీనికి ఆఖరి తేదీని మే 30 గా పేర్కొంది. అంటే ఆలోగా కేవైసీ అప్డేట్ చేయించుకుంటేనే గ్యాస్ సబ్సిడీ పొందొచ్చు.

గ్యాస్ కేవైసీ అంటే మీ ఆధార్ కార్డు వివరాలు అందించి.. ఫింగర్‌ప్రింట్ (బయోమెట్రిక్) అప్డేట్ చేయించుకోవాలి. లేకపోతే.. గ్యాస్ కనెక్షన్ కూడా క్యాన్సిల్ అయ్యే అవకాశం ఉంటుంది. ఇప్పటికే పలు గ్యాస్ ఏజెన్సీల నుంచి దీనికి సంబంధించి కస్టమర్లకు సందేశాలు కూడా వెళ్తున్నాయి. పత్రికా ప్రకటనల్లోనూ ఇది మీరు గమనించొచ్చు.

 ఇక గ్యాస్ ఏజెన్సీలకు వెళ్లలేని సీనియర్ సిటిజెన్ల కోసం మొబైల్ యాప్ ద్వారా గ్యాస్ డెలివరీ ఏజెంట్లు కేవైసీ తీసుకుంటారు. ఇళ్లకు వచ్చి ఫేస్ రిజిస్ట్రేషన్‌తో ఈ ప్రాసెస్ పూర్తి చేస్తారు. దీని గురించి సమాచారం అందించాల్సి ఉంటుంది. ఇప్పటికే ఈ గడువు తేదీల్ని పలుమార్లు పొడిగించినట్లు తెలిసింది. ఇప్పుడు మే 30 వరకు ఉండగా.. ఆ తర్వాత పొడిగిస్తుందా లేదా అనేది స్పష్టత లేదు. ఎందుకైనా మంచిది ఆలోగా పూర్తి చేసుకోవడమే ఉత్తమం. ఎలాంటి ఆందోళన లేకుండా.. గ్యాస్ కనెక్షన్ కొనసాగించుకోవచ్చు. సబ్సిడీ పొందొచ్చు.

గ్యాస్ కేవైసీ ఆన్‌లైన్‌లోనూ చేసుకునే వెసులుబాటు కల్పిస్తున్నాయి HP, ఇండేన్, భారత్ గ్యాస్ వంటి ఏజెన్సీలు. దీని కోసం ముందుగా https://www.mylpg.in/ వెబ్‌సైట్‌కు వెళ్లాలి.

>> అక్కడ కుడి భాగంలో భారత్ గ్యాస్, HP గ్యాస్, ఇండేన్ గ్యాస్ అని గ్యాస్ సిలిండర్ బొమ్మలు కనిపిస్తాయి. మీది ఏదైనా దానిని ఎంచుకోవాలి. అక్కడ మీకు కావాల్సిన వివరాలు అన్నీ కనిపిస్తాయి. KYC అప్డేట్ అని ఉన్న దానిపై క్లిక్ చేస్తే.. ఫారం ఓపెన్ అవుతుంది. అందులో మొబైల్ నంబర్, కస్టమర్ నంబర్, LPG ID ఇలా అన్నీ నింపాల్సి ఉంటుంది. ఆ తర్వాత ఆధార్ ధ్రువీకరణ చేసుకోవాలి. మొబైల్ నంబ‌ర్‌కు ఒక ఓటీపీ వస్తుంది. దానిని ఎంటర్ చేయడంతో కేవైసీ పూర్తవుతుంది.