చైనా, ఫిలిప్పీన్స్ మధ్య చిచ్చురేపిన డీప్‌ఫేక్ వీడియో

సాంకేతిక పరిజ్ఞానం కొత్తపుంతలు తొక్కుతున్న కొద్దీ.. సరికొత్త ప్రమాదాలు వెంటాడుతున్నాయి. ఇప్పటికే సైబర్‌ నేరాలతో సతమతమవుతుండగా.. దీనికి కృత్రిమ మేధ (ఆర్టిఫీషియల్‌ ఇంటెలిజెన్స్‌) మరింత ఆజ్యం పోస్తోంది. ఈ కృత్రిమ మేధను ఉపయోగించి వికృత చేష్టలకు పాల్పడుతున్నారు. అసలేదో…నకిలీయేదో తేడా తెలియనంతగా ఫొటోలు, వీడియోలు రూపొందిస్తున్నారు. ప్రస్తుతం ప్రపంచవ్యాప్తంగా డీప్‌ఫేక్ కలకలం సృష్టిస్తోంది. తాజాగా, డీప్‌ఫేక్ వీడియో రెండు దేశాల మధ్య చిచ్చు రేపింది. చైనా పై దాడి చేయాలంటూ స్వయంగా ఫిలిప్పీన్స్ అధ్యక్షుడు ఆదేశాలు జారీచేసినట్లున్న వీడియో క్లిప్ చర్చనీయాంశంగా మారింది. ప్రస్తుతం ఇది ఫిలిప్పీన్స్‌లో సంచలనం సృష్టిస్తోంది.

 దేశానికి చైనా నుంచి ఏదైనా ముప్పు పొంచి ఉంటే.. తక్షణమే ప్రతిస్పందించాలని తన సైన్యానికి ఫిలిప్పీన్స్‌ అధ్యక్షుడు ఫెర్డినాండ్‌ మార్కోస్‌ జూనియర్ సూచనలు చేసినట్లు ఓ ఆడియో క్లిప్‌ వైరల్ అవుతోంది. దేశానికి హాని జరగడాన్ని తాను సహించలేనని..హక్కుల్ని రక్షించుకునే విషయంలో రాజీ లేదని ఆయన గొంతుకతో ఉన్న క్లిప్‌ను ఒక యూట్యూబ్‌ ఛానెల్‌ ప్రసారం చేసింది. అందులో దక్షిణ చైనా సముద్రంలో మోహరించిన చైనా నౌకలకు సంబంధించిన దృశ్యాలు కనిపించాయి. ఈ వీడియో వెలుగులోకి రావడంతో ఫిలిప్పీన్స్‌ ప్రభుత్వం అప్రమత్తమైంది. ఇది నకిలీదని ప్రజలను హెచ్చరించింది.

‘ఒక దేశానికి వ్యతిరేకంగా చర్యలు తీసుకోవాలని అధ్యక్షుడు సైన్యాన్ని ఆదేశించినట్లుగా వీడియో క్లిప్ ప్రసారం అవుతోంది.. కానీ అలాంటి ఆదేశాలు ఏవీ జారీ చేయలేదు’ ఫిలిప్పీన్స్ ప్రెసిడెన్షియల్ కమ్యూనిటీ కమ్యూనికేషన్ ఆఫీస్ ఓ ప్రకటన విడుదల చేసింది. అలాగే, తప్పుడు సమాచార వ్యాప్తి కట్టడికి కఠిన చర్యలు తీసుకుంటున్నట్లు తెలిపింది. ‘ప్రెసిడెంట్ ఫెర్డినాండ్ ఆర్. మార్కోస్ జూనియర్‌లాగా మాట్లాడిన వీడియో కంటెంట్ ప్రముఖ వీడియో స్ట్రీమింగ్ ప్లాట్‌ఫామ్‌లో పోస్ట్ చేయడం ప్రెసిడెన్షియల్ కమ్యూనికేషన్స్ ఆఫీస్ దృష్టికి వచ్చింది.. ఆ ఆడియో డీప్‌ఫేక్.. ఫిలిప్పీన్స్‌లోని మన సాయుధ దళాలను ఒక నిర్దిష్ట దేశానికి వ్యతిరేకంగా చర్య తీసుకోవాలని అధ్యక్షుడు ఆదేశించినట్లుగా కనిపించేలా చేయడానికి ప్రయత్నిస్తుంది. అలాంటి ఆదేశం జారీచేయలేదు’ అని ప్రకటనలో స్పష్టత ఇచ్చింది.

మీడియా, ఇన్ఫర్మేషన్ లిటరసీ క్యాంపెయిన్ ద్వారా ఫేక్ న్యూస్, తప్పుడు సమాచారం, ప్రసారాలను ఎదుర్కోవడానికి తీసుకునే చర్యలపై చురుకుగా పనిచేస్తున్నట్లు తెలిపింది. ‘కృత్రిమ మేధతో రూపొందించిన డీప్‌ఫేక్ వీడియో, ఆడియో కంటెంట్‌ల‌ను అరికట్టడానికి ప్రభుత్వ ఏజెన్సీలు, సంబంధిత ప్రైవేట్ రంగాలతో సమన్వయం చేసుకుని, పని చేస్తున్నాం’ అని పేర్కొంది. ఇక, దక్షిణ చైనా సముద్రం లో చైనా తీరు వల్ల ఈ రెండు దేశాల మధ్య ఉద్రిక్తత నెలకొంది. ఈ క్రమంలోనే ఈ వీడియో వెలుగులోకి రావడం తీవ్ర ఆందోళనకు దారితీసింది.