చిరుత దాడి.. త్రుటిలో ప్రాణాలతో బయటపడ్డ మాజీ క్రికెటర్

చిరుతపులి దాడిలో జింబాబ్వే మాజీ క్రికెటర్ గై విటాల్ త్రుటిలో ప్రాణాపాయం నుంచి బయటపడ్డారు. జింబాబ్వేలోని బఫెలో రేంజ్‌ అటవీ ప్రాంతంలో ఈ ఘటన చోటుచేసుకుంది. చిరుతపులి దాడిలో గాయపడిన గై విట్టాల్‌ను అత్యవసర శస్త్ర చికిత్స కోసం విమానంలో హరారేకు తరలించారు అధికారులు. విటాల్ భార్య హన్నా స్టూక్స్ గాయాలతో ఉన్న ఆయన ఫోటోలను సోషల్ మీడియాలో షేర్ చేశారు. ఈ సందర్భంగా చికిత్స చేసిన వైద్య సిబ్బందికి ఆమె కృతజ్ఞతలు తెలిపారు. చిరుత దాడితో ఆయనకు తీవ్ర రక్తస్రావం అయినట్టు ఆమె పేర్కొన్నారు.

 ‘చిరుతపులి దాడికి గురైన విషయం తెలిసి శ్రేయోభిలాషులు వందలాది సందేశాలను పెట్టారు.. వారి అభిమానంతో మేము ఉక్కిరిబిక్కిరయ్యాం.. హిప్పో క్లినిక్‌లోని వైద్య సిబ్బంది తక్షణమే స్పందించడం మేము చాలా అదృష్టవంతులం.. బఫెలో రేంజ్ నుంచి ఏస్ అంబులెన్స్‌లో హరారేకు విమానంలో తరలించారు.. మెరుగైన చికిత్స కోసం మిల్టన్ పార్క్ హాస్పిటల్‌లో చేర్చించారు’ అని ఆమె భావోద్వేగానికి గురయ్యారు.

మాజీ క్రికెటర్ గై విటాల్ జింబాబ్వేలో సఫారీ వ్యాపారాన్ని నిర్వహిస్తున్నాడు. హ్యూమనిలో ప్రాంతంలో ఆయన ట్రెక్కింగ్ చేస్తున్నప్పుడు చిరుత దాడికి గురయ్యారు. ఒక దశాబ్దం పాటు జింబాబ్వే క్రికెట్ జట్టులో సభ్యుడిగా కొనసాగిన విటాల్.. 46 టెస్టులు, 147 వన్డేలు ఆడారు. అయితే, గతంలో మొసలి దాడిని త్రుటిలో తప్పించుకున్ారు. 2013లో, జింబాబ్వేలోని హ్యూమని లాడ్జ్‌లో ఆయన మంచం కింద 8 అడుగుల పొడవున్న మొసలి దూరింది. 150 కిలోల బరువున్న,ఆ మొసలి లోనికి దూరడం ఎవరూ గమనించలేదు, మరుసటి రోజు ఉదయం అల్పాహారం చేస్తున్న సమయంలో ఇంట్లో పనిమనిషి గుర్తించింది. రాత్రంతా ఆయన బెడ్ కిందే మొసలి నిద్రపోవడం గమనార్హం.