రాజ్యసభ ఎంపీ పదవికి రాజీనామా చేసిన బీజేపీ చీఫ్ జేపీ నడ్డా.. కారణం అదే!

రాజ్యసభ ఎంపీ పదవికి బీజేపీ జాతీయ అధ్యక్షుడు జగత్ ప్రకాష్ నడ్డా రాజీనామా చేశారు. గతంలో హిమాచల్ ప్రదేశ్‌ నుంచి రాజ్యసభకు బీజేపీ జేపీ నడ్డాను నామినేట్ చేయగా.. ఈ ఏడాది ఏప్రిల్ నాటికి ఆయన పదవీ కాలం ముగియనుంది. ఈ నేపథ్యంలోనే ఈ ఏప్రిల్ నెలతో ముగియనున్న 57 రాజ్యసభ స్థానాలకు ఇటీవలె నోటిఫికేషన్ విడుదల చేసి ఎన్నికలు నిర్వహించి ఫలితాలను ప్రకటించారు. అయితే ఈసారి జేపీ నడ్డాను బీజేపీ.. హిమాచల్ ప్రదేశ్‌ నుంచి కాకుండా గుజరాత్ నుంచి బరిలో నిలిపింది. ఈ క్రమంలోనే జేపీ నడ్డాకు పోటీగా ఎవరూ నామినేషన్ వేయకపోవడంతో ఆయనే ఏకగ్రీవంగా ఎన్నిక అయినట్లు రాజ్యసభ సచివాలయం వెల్లడించింది.

దీంతో మరోసారి పెద్దల సభకు నామినేట్ కావడంతో హిమాచల్ ప్రదేశ్ నుంచి ఉన్న సభ్యత్వానికి జేపీ నడ్డా రాజీనామా చేశారు. ఈ క్రమంలోనే తన రాజీనామా పత్రాన్ని రాజ్యసభ ఛైర్మన్ జగదీప్ ధన్‌ఖడ్‌కు పంపించగా.. ఆయన దాన్ని ఆమోదించినట్లు రాజ్యసభ సచివాలయం ఒక ప్రకటనలో తెలిపింది. ఇక గుజరాత్ నుంచి జేపీ నడ్డాతో పాటు గోవింద్ భాయ్ డోలాకియా, జస్వంత్ సింగ్ పర్మార్, మయాంక్ నాయక్ కూడా ఇటీవల రాజ్యసభకు ఏకగ్రీవంగా ఎన్నికయ్యారు.

బీహార్‌లో పుట్టి పెరిగిన 63 ఏళ్ల జేపీ నడ్డా.. ప్రధానమంత్రి నరేంద్ర మోదీ, కేంద్ర హోం శాఖ మంత్రి అమిత్ షాకు చాలా సన్నిహితుడు. లాయర్‌గా కెరీర్‌ను ప్రారంభించిన జేపీ నడ్డా.. ఆ తర్వాత రాజకీయ నేతగా ఎదిగారు. అయితే బీహార్‌లో పుట్టినా జేపీ నడ్డా మూలాలు మాత్రం హిమాచల్‌ ప్రదేశ్‌లో ఉన్నాయి. దీంతో 1993 నుంచి హిమాచల్ ప్రదేశ్ రాష్ట్ర అసెంబ్లీ ఎన్నికల్లో పోటీ చేసి నెగ్గుతూ వచ్చారు. ఈ క్రమంలో ఆయన హిమాచల్ ప్రదేశ్ రాష్ట్రానికి పలు శాఖల మంత్రిగా కూడా పని చేశారు. 2012 లో హిమాచల్‌ అసెంబ్లీకి ఎన్నికైనా.. బీజేపీ నుంచి రాజ్యసభకు నామినేట్ కావడంతో ఎమ్మెల్యే పదవికి రాజీనామా చేసి రాజ్యసభలో అడుగు పెట్టారు.

ఇక నరేంద్ర మోదీ అధికారంలోకి వచ్చిన తర్వాత 2014 నుంచి 2019 వరకు కేంద్ర ఆరోగ్య శాఖ మంత్రిగా కూడా జేపీ నడ్డా పని చేశారు. 2019 జూన్‌లో జేపీ నడ్డా.. బీజేపీ వర్కింగ్‌ ప్రెసిడెంట్‌ అయ్యారు. ఆ తర్వాత 2020 జనవరి 20 వ తేదీ నుంచి ఆయన బీజేపీ జాతీయ అధ్యక్ష పదవిలో కొనసాగుతున్నారు. 2022లోనే బీజేపీ జాతీయ అధ్యక్షుడిగా జేపీ నడ్డా పదవీకాలం ముగిసినప్పటికీ.. బీజేపీ హై కమాండ్ మాత్రం ఆ పదవీ కాలాన్ని పొడగిస్తూ వచ్చింది. ఈ క్రమంలోనే తాజాగా ఇటీవలె లోక్‌సభ ఎన్నికలకు ముందు కూడా జేపీ నడ్డా పదవీ కాలాన్ని పొడగించారు. జూన్ వరకు బీజేపీ జాతీయ అధ్యక్షుడి పదవిలో జేపీ నడ్డా ఉండనున్నారు.