కర్ణిసేన చీఫ్ పట్టపగలే దారుణ హత్య.. భగ్గుమన్న రాజస్థాన్.. నేడు బంద్‌కు పిలుపు
national | Suryaa Desk | Published : Wed, Dec 06, 2023, 10:36 PM
రాష్ట్రీయ రాజ్‌పుత్ కర్ణిసేన జాతీయ అధ్యక్షుడు సుఖ్దేవ్ సింగ్ గోగామేడీ రాజస్థాన్‌లో పట్టపగలే దారుణ హత్యకు గురికావడం సంచలనంగా మారింది. రాజధాని జైపుర్‌లోని శ్యామ్‌నగర్‌లో ఆయన నివాసంలోనే గోగామేడీ హత్యకు గురయ్యారు. ముగ్గురు గుర్తుతెలియని వ్యక్తులు మంగళవారం మధ్యాహ్నం సుఖ్దేవ్ నివాసానికి వెళ్లి దారుణానికి పాల్పడ్డారు. గోగామేడీతో మాట్లాడాల్సి ఉందని భద్రతా సిబ్బందికి చెప్పి లోపలికి వెళ్లారు. కొద్దిసేపు మాట్లాడిన తర్వాత ఒక్కసారిగా కాల్పులు జరిపారు. ఇందుకు సంబంధించిన దృశ్యాలు అక్కడ సీసీటీవీ కెమెరాలో రికార్డయ్యాయి.
ముగ్గురు దుండగుల్లో ఒకడైన నవీన్‌ షెకావత్‌‌ను సుఖ్దేవ్ సింగ్ సహచరులు కాల్చి చంపారు. గోగామేడీ భద్రతా సిబ్బంది కాల్పుల్లో నవీన్‌ చనిపోయినట్టు జైపుర్‌ పోలీస్‌ కమిషనర్‌ బిజు జార్జ్‌ జోసెఫ్‌ వెల్లడించారు. ఈ ఘటనలో సుఖ్దేవ్ అనుచరుడు ఒకరు చనిపోయారని, మరో ఇద్దరికి గాయాలైనట్టు ఆయన తెలిపారు. సుఖ్దేవ్ హత్యకు తమదే బాధ్యత అంటూ లారెన్స్‌ బిష్ణోయ్‌ గ్యాంగ్‌కు అనుబంధంగా పనిచేసే రోహిత్‌ గోదారా గ్యాంగ్‌ ప్రకటించుకుంది.
కాగా, ఎన్నికల ఫలితాలు వెలువడి కాంగ్రెస్ అధికారం కోల్పోయి బీజేపీ విజయం సాధించిన రెండు రోజుల్లో రాజ్‌పుత్ నేత హత్య జరగడం కలకలం రేగుతోంది. మరోవైపు, ఈ హత్యకు నిరసనగా సుఖ్దేవ్ సింగ్ మద్దతుదారులు బుధవారం రాజస్థాన్ బంద్‌కు పిలుపునిచ్చారు. ఘటన విషయం గురించి తెలియగానే పెద్ద ఎత్తున రాజ్‌పుత్ సామాజిక వర్గం రోడ్లపైకి వచ్చి ఆందోళనలు చేపట్టారు. నిందితులను వెంటనే అరెస్ట్ చేయాలని డిమాండ్ చేస్తున్నారు. చురు, ఉదయ్‌పూర్, అల్వార్, జోధ్‌పూర్ జిల్లాల్లోనూ నిరసనలకు దిగారు. గోగామేడీ 2015లో లోకేంద్ర సింగ్ కల్వి నాయకత్వంలోని రాజ్‌పుత్ కర్ణి సేన నుంచి బయటకొచ్చి రాష్ట్రీయ రాజ్‌పుత్ కర్ణి సేనను ఏర్పాటుచేశారు. ఈ రెండు వర్గాలు 2018లో దీపికా పదుకునే నటించి పద్మావత్ సినిమాకు వ్యతిరేకంగా ఆందోళనలు నిర్వహించాయి. సినిమాలో చరిత్రను వక్రీకరించి, రాజ్‌పుత్‌లను అవమానించారని ఆగ్రహం వ్యక్తం చేశారు.
|
|