మార్స్‌పై రోవర్‌ను ఆపరేట్ చేయనున్న భారతీయ మహిళ.. చరిత్రలో తొలిసారి

మన సౌర వ్యవస్థలోని భూమికి సమీపంగా ఉన్న అంగారక గ్రహంపై జీవజాలం ఉందని, అక్కడ మానవ నివాసానికి అనువైన వాతావరణం ఉందని శాస్త్రవేత్తలు బలంగా నమ్ముతున్నారు. దీనిపై అమెరికా అంతరిక్ష పరిశోధన సంస్థ నాసా దశాబ్దాల నుంచి ముమ్మర పరిశోధనలు కొనసాగిస్తోంది. మార్స్‌పై రాతి నమూనాలను సేకరించేందుకు నాసా ప్రయోగించిన పర్సర్వెన్సర్ రోవర్‌ 2021 ఫిబ్రవరిలో అక్కడ దిగింది. ఈ రోవర్‌ను డాక్టర్ అక్షతా కృష్ణమూర్తి అనే భారతీయ యువతి ఆపరేట్ చేయనున్నారు. నాసా రోవర్‌ను ఓ భారతీయురాలు ఆపరేట్ చేయడం చరిత్రలో ఇదే మొదటిసారి.

ఉన్నత చదువుల కోసం 13 ఏళ్ల కిందట అమెరికా వెళ్లిన అక్షత.. ఈ స్థాయికి చేరడానికి తన మార్గంలో అనేక సవాళ్లను ఎదుర్కొంది. తన నాసా కలను నెరవేర్చుకోడానికి లెక్కలేనన్ని దరఖాస్తులు చేసింది. మార్స్ రిసెర్చ్ టీమ్‌లో భాగస్వామి కావడానికి ముందు ఆమె నాసా నేతృత్వంలోని వివిధ ప్రాజెక్టులలో పనిచేసింది. ఇటీవలి తన ఇన్‌స్టాగ్రామ్‌ పేజ్‌లో ‘నేను 13 సంవత్సరాల కిందట అమెరికాకు వచ్చాను.. నాసాలో పనిచేయడం, భూమి, అంగారక గ్రహంపై పరిశోధనలు, రోబోటిక్ కార్యకలాపాలకు నాయకత్వం వహించాలనే నా కల గురించి.. నేను కలిసిన ప్రతి ఒక్కరూ వీసాపై వచ్చిన విదేశీ పౌరుడిగా ఇది అసాధ్యమని, ప్లాన్- బి ఎంచుకోవాలని లేదా ఫీల్డ్‌ను పూర్తిగా మార్చుకోవాలని సలహా ఇచ్చారు’ అని రాసుకొచ్చారు.

యూనివర్సిటీ ఆఫ్ ఇల్లినాయిస్ ఉర్బానా- ఛాంపెయిన్ నుంచి మాస్టర్ డిగ్రీ చేసిన భారతీయ శాస్త్రవేత్త.. మస్సాచూసెట్స్ ఇన్‌స్టిట్యూట్ ఆఫ్ టెక్నాలజీ‌లో పీహెచ్‌డీ చేశారు. కొంతకాలం ఎంఐటీతో కలిసి పనిచేసిన అక్షత కృష్ణమూర్తి.. నాసాలో పూర్తి సమయం పనిచేయడానికి వందల తలుపులను తట్టారు. డాక్టర్ కృష్ణమూర్తి లింక్డ్ఇన్ ప్రొఫైల్ ప్రకారం.. ప్రిన్సిపల్ ఇన్వెస్టిగేటర్, మిషన్ సైన్స్ ఫేజ్ లీడ్. గతంలో నాసా జెట్ ప్రొపల్షన్ ల్యాబొరేటరీలో చేరడానికి ముందు మిట్‌లో ఇన్‌స్ట్రుమెంట్ సిస్టమ్స్ ఇంజనీర్‌గా పనిచేసింది. తన పని అనుభవంతో పాటు ఏరోనాటిక్స్ ఆస్ట్రోనాటిక్స్‌లో పీహెచ్‌డీ కూడా చేశారు.

‘మార్స్‌పై నమూనాలను సేకరించి భూమికి తిరిగి తీసుకొచ్చే పెర్సెవరెన్స్ రోవర్‌తో సహా పలు అంతరిక్ష మిషన్‌లలో పని చేస్తున్నాను.. నా ఈ కల చాలా పెద్దది లేదా పిచ్చితనం కాదు. మిమ్మల్ని మీరు విశ్వసించండి.. ఆశను వదులుకోవద్దు.. పని చేస్తూ ఉండండి! నేను చెబుతున్నాను... మీరు కష్టపడితే అక్కడికి చేరుకుంటారు’ అని ఆమె అన్నారు.. తమ వెబ్‌సైట్‌లో పోస్ట్ చేసిన డాక్టర్ కృష్ణమూర్తి ప్రొఫైల్‌ను సొసైటీ ఆఫ్ శాటిలైట్ ప్రొఫెషనల్స్ ఇంటర్నేషనల్ హైలట్ చేసింది. వినూత్న క్యూబ్‌శాట్ వినియోగానికి నాసా హానర్ గ్రూప్ అచీవ్‌మెంట్ అవార్డు, ఎమర్జింగ్ స్పేస్ లీడర్ అవార్డు, ఇంటర్నేషనల్ ఆస్ట్రోనాటికల్ ఫెడరేషన్ నుంచి లుయిగి జి నాపోలిటానో 2017 అవార్డు సహా కీలకమైన శాస్త్రీయ అధ్యయనాలలో ఆమె సాధించిన విజయాలను ప్రశంసించింది.