కస్టమర్‌లా నటించి అనంతపురంలోని జ్యువెలరీ షాపులో గొలుసు చోరీ
Andhra Pradesh Telugu | Suryaa Desk | Published : Wed, Dec 06, 2023, 08:52 PM
అనంతపురంలో ఓ కిలాడీ లేడీ ఏకంగా ఓ పెద్ద జ్యువెలరీ షాపులో అందరి మధ్యలో ఓ ఆభరణాన్ని చోరీ చేసింది. కస్టమర్‌గా వచ్చి రోల్డ్‌గోల్డ్‌ చైన్ ఉంచి 32 తులాల బంగారు గొలుసును ఎత్తుకెళ్లింది. దాదాపు వారం తర్వాత ఈ విషయాన్ని గుర్తించిన షాపు సిబ్బంది అవాక్కయ్యారు. గత నెల 28న ఓ మహిళ నగరంలోని సప్తగిరి సర్కిల్‌లోని గోల్డ్‌ షాపులోకి కస్టమర్‌గా వెళ్లింది. బంగారు ఆభరణాలు కొనే క్రమంలో 32 తులాల బంగారు గొలుసును తీసుకుంది. అక్కడే ఆమె ప్లాన్‌ను అమలు చేసింది. ఆ బంగారు గొలుసు స్థానంలో రోల్డ్‌గోల్డ్‌ గొలుసును ఆ బాక్స్‌లో ఉంచి ఆ షాప్‌ నుంచి వెళ్లిపోయింది. సోమవారం ఆ షాపుకు వచ్చిన ఓ కస్టమర్‌ ఆ రోల్డ్‌గోల్డ్‌ నగకు ఉన్న ట్యాగ్‌ తేడాగా ఉండటాన్ని గమనించి ఆ షాప్‌ సిబ్బంది దృష్టికి తీసుకెళ్లాడు. సీసీ పుటేజీలను షాపు సిబ్బంది పరిశీలించడంతో అసలు విషయం బయటపడింది. ఇదిలా ఉంటే.. హైదరాబాద్‌లోని ఉస్మానియా యూనివర్శిటీ సమీపంలో ఉన్న గోల్డ్‌ షాపులో కూడా గత నెల 24న ఇదే తరహాలో ఓ బంగారు ఆభరణాన్ని ఓ మహిళ చోరీ చేసింది. ఈ రెండు ఆభరణాలనూ చోరీ చేసింది ఒకే మహిళగా గుర్తించారు. కేసు దర్యాప్తులో ఉన్నట్లు పోలీసులు తెలిపారు. సీసీ ఫుటేజ్‌ ఆధారంగా మహిళ గురించి ఆరా తీస్తున్నారు.
|
|