హైదరాబాద్ గచ్చిబౌలి కిమ్స్ ఆస్పత్రిలో చికిత్స పొందుతున్న ఆంధ్రప్రదేశ్ విప్ ఉమ్మారెడ్డి వెంకటేశ్వర్లును మాజీ మంత్రి, సూర్యాపేట ఎమ్మెల్యే జగదీశ్ రెడ్డి పరామర్శించారు. ఆరోగ్య పరిస్థితిని అడిగి తెలుసుకున్నారు. త్వరగా కోలుకోవాలని ఆకాంక్షించారు. ఉమ్మారెడ్డి వెంకటేశ్వర్లు హృదయ సంబంధిత సమస్యతో ఆస్పత్రిలో చేరి ట్రీట్మెంట్ తీసుకుంటున్నారు. ఈ విషయం తెలియడంతో జగదీష్ రెడ్డి వెళ్లి పరామర్శించారు. ఉమ్మారెడ్డి వెంకటేశ్వర్లు సీనియర్ రాజకీయ నేత.. ఉమ్మడి రాష్ట్రంలో తెలంగాణ ప్రాంత నేతలతో పరిచయాలు ఉన్నాయి. ఈ క్రమంలోనే జగదీష్ రెడ్డి ఆయన్ను పరామర్శించారు.
ఉమ్మారెడ్డి వెంకటేశ్వర్లు టీడీపీలో సుదీర్ఘకాలం పనిచేశారు.. ఆ తర్వాత వైస్సార్సీపీలో చేరారు. పార్టీలో మంచి గుర్తింపు తెచ్చుకున్నారు.. అనంతరం ఎమ్మెల్సీ పదవి, విప్ పదవులు దక్కాయి. ఆయన కొంతకాలంగా గుండె సంబంధిత సమస్యతో బాధపడుతున్నారు. హైదరాబాద్లోని కిమ్స్లో చికిత్సపొందుతున్నారు. ఆయన కోలుకున్న వెంటనే డిశ్చార్జ్ చేస్తామని ఆస్పత్రి వైద్యులు తెలిపారు. మరోవైపు మాజీ మంత్రి జగదీష్ రెడ్డి. అదే కిమ్స్ ఆస్పత్రిలో చికిత్సపొందుతున్న సూర్యాపేట జిల్లా ఆత్మకూర్ (ఎస్) మండలం నసీంపేట గ్రామానికి చెందిన గుండపునేని హనుమంతరావును పరామర్శించారు. ఆయన వెంట జడ్పీ వైస్ చైర్మన్ గోపగాని వెంకట్ నారాయణ గౌడ్ తదితరులు ఉన్నారు.
![]() |
![]() |