భారతీయులు ఎగిరిగంతేసే శుభవార్త.. హెచ్‌-1బీ వీసా రెన్యువల్‌పై అమెరికా కీలక నిర్ణయం

హెచ్‌-1బీ వీసా పునరుద్ధరణ విధానాన్ని మరింత సులభతరం చేసేలా జో బైడెన్ యంత్రాంగం కీలక నిర్ణయం తీసుకుంది. కొన్ని కేటగిరీల హెచ్‌-1బీ వీసాలను దేశీయంగానే రెన్యువల్‌ చేసుకునేలా మూడు నెల కాలానికి ఓ పైలట్‌ ప్రోగ్రామ్‌‌ను డిసెంబరు నుంచి ప్రారంభించనుంది. ఇది మూడు నెలల పాటు అందుబాటులో ఉంటుందని వీసా సేవల డిప్యూటీ అసిస్టెంట్‌ సెక్రటరీ జూలీ స్టఫ్ట్ వెల్లడించారు. ఈ ప్రోగ్రామ్ కింద తొలుత 20 వేల మందికి వీసా రెన్యువల్‌ చేయనున్నారు. సరికొత్త విధానం వల్ల భారతీయులకు భారీగా ప్రయోజనం కలగనుంది.

ఓ ఇంటర్వ్యూలో స్టఫ్ట్ మాట్లాడుతూ.. ‘భారత్‌లో అమెరికా వీసాలకు భారీ డిమాండ్‌ ఉంది... భారతీయులకు వీలైనంత త్వరగా వీసా అపాయింట్‌మెంట్‌లు ఇచ్చేందుకు ప్రయత్నిస్తున్నాం.. అందులో ఒకటి దేశీయ వీసా రెన్యువల్‌ ప్రోగ్రామ్‌.. ప్రస్తుతానికి దీన్ని పైలట్‌గా ప్రారంభిస్తాం. డిసెంబరు నుంచి మూడు నెలల పాటు అమెరికాలోని హెచ్‌-1బీ వీసాదారులు.. తమ దేశానికి వెళ్లకుండానే వీసాలను రెన్యువల్‌ చేసుకోవచ్చు.. పైలట్‌ ప్రోగ్రామ్‌ కింద 20 వేల మందికి వీసాలను ఇక్కడే రెన్యువల్ చేస్తాం.. వృత్తి నిపుణుల్లో మెజార్టీ భాగం భారతీయులే ఉంటారు. క్రమక్రమంగా ఈ ప్రోగ్రామ్‌ను విస్తరిస్తాం’ అని జూలీ వెల్లడించారు.

పైలట్ ప్రోగ్రామ్ వల్ల భారతీయులే అధిక ప్రయోజనం పొందుతారని తాము విశ్వసిస్తున్నట్లు వ్యాఖ్యానించారు. ‘‘ఈ సౌకర్యంతో భారతీయులు వీసా అపాయింట్‌మెంట్‌ కోసం భారత్‌కు వెళ్లాల్సిన అవసరం లేదు. అంతేగాకుండా భారత్‌లోని అమెరికా దౌత్య కార్యాలయాలు కూడా కొత్త దరఖాస్తులపై దృష్టిపెట్టొచ్చు’’ అని జూలీ పేర్కొన్నారు. త్వరలోనే దీనిపై అధికారిక ఉత్తర్వులు వెలువరిస్తామన్నారు. మొదటి విడతలో ఎవరు అర్హులు? ఎలా దరఖాస్తు చేసుకోవాలి? అన్న వివరాలను వెల్లడిస్తామని ఆమె తెలిపారు.

‘దాదాపు 20 సంవత్సరాలుగా ఉపయోగించని ఇప్పటికే ఉన్న నిబంధన. ఇవి వర్క్ వీసాలు.. అమెరికాలో దీర్ఘకాలికంగా నివసిస్తున్నప్పటికీ విదేశాలకు తిరిగి వెళ్లకుండా వారి వీసాను పునరుద్ధరించాలనుకునే వ్యక్తుల కోసం ఉద్దేశించబడింది’ అని అన్నారు. ప్రస్తుతానికి హెచ్‌-1బీ కేటగిరీ వర్క్‌ వీసాలకు మాత్రమే దీనిని అమల్లోకి తీసుకొస్తున్నట్లు స్పష్టం చేశారు. కాగా, కొంతకాలం నుంచి ఈ ప్రోగ్రామ్‌ను ప్రారంభించేందుకు కసరత్తు చేస్తుండగా.. ఈ ఏడాదిలో జూన్‌లో ప్రధాని నరేంద్ర మోదీ అమెరికా పర్యటన సందర్భంగా బైడెన్ యంత్రాంగం అధికారిక ప్రకటన చేసింది. రొనాల్డ్ రీగన్ సెంటర్‌ వద్ద భారత సంతతి ప్రజలను ఉద్దేశించి మాట్లాడిన సందర్భంగా దీనిపై మోదీ చేసిన సంయుక్త ప్రకటన భారతీయుల్లో ఉత్సాహాన్ని నింపింది.

కాగా, అమెరికాలోని సంస్థలు విదేశీ నిపుణులను నియమించుకునేందుకు హెచ్‌-1బీ వీసా అవకాశం కల్పిస్తుంది. అమెరికాలో ఈ వీసాలను కలిగి ఉన్న వృత్తి నిపుణుల్లో భారతీయులే అధికం. గతంలో హెచ్‌-1బీ వీసాదారులు రెన్యువల్ లేదా స్టాంపింగ్‌ కోసం తమ దేశానికి వెళ్లాల్సిన అవసరం ఉండేది కాదు. 2004 వరకు అమల్లో ఉండగా.. ఆ ఏడాది ఈ విధానంలో మార్పులు చేశారు. రెన్యువల్‌ కోసం హెచ్‌-1బీ వీసా ఉన్నవారు స్వదేశానికి వచ్చి, అక్కడి యూఎస్‌ కాన్సులేట్‌ కార్యాలయాల్లో ప్రక్రియను పూర్తి చేయాల్సి ఉంటుంది. కానీ, కొన్ని సందర్భాల్లో నెలల తరుబడి ఎదురుచూడాల్సిన పరిస్థితి నెలకొంటోంది. ఈ నేపథ్యంలో అలాంటి వారికి ప్రయోజనం చేకూర్చేలా ఈ డొమెస్టిక్‌ వర్క్‌ వీసా రెన్యువల్‌ ప్రోగ్రామ్‌ను అమెరికా అందుబాటులోకి తీసుకొస్తోంది. ఆసియా అమెరికన్లు, స్థానిక హవాయిలు పసిఫిక్ దీవుల సలహా కమిషన్‌ చీఫ్ భూటోరియా చేసిన సిఫార్సులను అమెరికా అధ్యక్షుడు జో బైడెన్ ఆమోదించారు.

‘అమెరికాలో హెచ్‌-1బీ వీసా స్టాంపింగ్ కోసం కమిషన్‌పై ఇమ్మిగ్రేషన్ సబ్‌-కమిటీల తరఫున నేను సమర్పించిన సిఫార్సును ఎట్టకేలకు అమలు చేయడం పట్ల సంతోషిస్తున్నాను.. ఇది అంతిమంగా పది లక్షల మంది హెచ్‌-1బీ హోల్డర్లపై ప్రభావం చూపుతుంది.. వీరిలో గణనీయమైన సంఖ్యలో భారతీయులు ఉన్నారు’ అని భూటోరియా చెప్పారు. భారతీయులకు వీసాలు జారీ చేయడంలో అమెరికా రికార్డు క్రియేట్ చేసింది. గతేడాది భారతీయ విద్యార్థులకు అత్యధిక వీసాలు జారీ చేసిన దేశంగా నిలిచింది. 2022లో ఇండియన్ స్టూడెంట్స్ కి 1,40,000 వీసాలు జారీ చేసింది. దీనికి తోడు వీసా అపాయింట్మెంట్ వెయిటింగ్ టైంను తగ్గించడానికి యూఎస్ చర్యలు తీసుకుంటోంది. భారత్ తో దౌత్యపర సంబంధాలు పెంపొందించుకునేందుకు అధ్యక్షుడు జో బైడెన్ చేస్తున్న కృషిలో భాగంగా వీసాల జారీలో ఇండియాకు అధిక ప్రాధాన్యం ఇస్తున్నట్లు అక్కడి అధికారులు తెలిపారు.