చంద్రబాబు బెయిల్ రద్దు పిటిషన్‌పై విచారణ.. సుప్రీంకోర్టు కీలక ఆదేశాలు

స్కిల్ డెవలప్‌మెంట్ వ్యవహారంలో మాజీ ముఖ్యమంత్రి చంద్రబాబు నాయుడికి నవంబరు 20న హైకోర్టు సాధారణ బెయిల్‌ను మంజూరు చేయడాన్ని ఏపీ సీఐడీ సుప్రీంకోర్టులో సవాల్ చేసిన విషయం తెలిసిందే. ఈ పిటిషన్‌పై మంగళవారం విచారణ చేపట్టిన సర్వోన్నత న్యాయస్థానం.. కీలక ఆదేశాలు వెలువరించింది. బహిరంగ సభలు లేదా సమావేశాలు నిర్వహించడం లేదా పాల్గొనడం మినహా నవంబర్ 3న హైకోర్టు విధించిన అన్ని షరతులు కొనసాగుతాయని ఉద్ఘాటించింది.

బహిరంగ సభలో పాల్గొనడంపై లాయర్ ప్రస్తావించగా... జస్టిస్ బేలా ఎం త్రివేది ధర్మాసనం స్పందిస్తూ మొదటి భాగం (సబ్ జ్యుడీషియల్ కేసు గురించి పబ్లిక్ డొమైన్‌లో మాట్లాడకుండా షరతు విధించడం) అలాగే కొనసాగుతుంది. కానీ, ఆయన బహిరంగ సమావేశాలు, ర్యాలీలలో పాల్గొనవచ్చు అని అన్నారు. అయితే, కేసు వివరాలు గురించి ఎక్కడా మాట్లాడవద్దని న్యాయమూర్తి సూచించారు. తదుపరి ఉత్తర్వులు వచ్చేవరకూ ఈ ఆదేశాలు అమల్లో ఉంటాయని వివరించారు.

ప్రతివాదులకు నోటీసులు జారీచేసిన కోర్టు.. డిసెంబర్‌ 8లోపు కౌంటర్‌ దాఖలు చేయాలని స్పష్టం చేసింది. అనంతరం విచారణను డిసెంబరు 11కి వాయిదా వేసింది. స్కిల్ డెవలప్‌‌మెంట్ కేసులో క్వాష్ పిటిషన్‌పై తీర్పు వచ్చే వరకు వేచి చూడాలని ధర్మాసనం పేర్కొంది. స్కిల్‌ డెవలప్‌మెంట్‌ కేసులో మాజీ ముఖ్యమంత్రి నారా చంద్రబాబు నాయుడు సెప్టెంబరు 9 అరెస్టయి.. రాజమండ్రి జైలులో 52 రోజుల పాటు రిమాండ్ ఖైదీగా ఉన్నారు. అయితే, ఆయన ఆరోగ్యం దృష్ట్యా నవంబరు 9న హైకోర్టు మధ్యంతర బెయిల్‌ మంజూరు చేయడంతో జైలు నుంచి విడుదలయ్యారు. అనంతరం చంద్రబాబుకి రెగ్యులర్ బెయిల్ మంజూరు అయ్యింది.

దీంతో హైకోర్టు తీర్పును రాష్ట్ర ప్రభుత్వం సర్వోన్నత న్యాయస్థానంలో సవాల్‌ చేసింది. హైకోర్టు తీర్పును రద్దు చేయాలని కోరుతూ స్పెషల్‌ లీవ్‌ పిటిషన్‌ వేసింది. బెయిల్‌ మంజూరు విషయంలో తమ వాదనలు హైకోర్టు ఏమాత్రం పరిగణనలోకి తీసుకోలేదని సీఐడీ తన పిటిషన్‌లో పేర్కొంది. హైకోర్టు తన పరిధి దాటి తీర్పులో ఏపీ ప్రభుత్వంపై వ్యాఖ్యలు చేసిందని ఆరోపించింది. ఎస్ఎల్పీ తేలేంత వరకు హైకోర్టు తీర్పుపై స్టే ఇవ్వాలని విజ్ఞప్తి చేసింది.