సీఎం కాన్వాయ్‌ వెళ్లేదారిలో ఇకపై అలాంటివి ఉండవు.. రేవంత్ కీలక ఆదేశాలు

సీఎం కాన్వాయ్ రోడ్డుపై వెళ్తుందంటే చాలు ఆ హడావుడి ఎలా ఉంటుందో ప్రత్యేకంగా చెప్పక్కర్లేదు. అన్ని రోడ్లు ఎక్కడికక్కడ బ్లాక్ చేసేస్తారు. సీఎం వెళ్లే వరకు ఎక్కడి వాహనాలు అక్కడ నిలిచిపోవాల్సిందే. ముఖ్యమంత్రి రాకకు 15 నిమిషాల ముందు నుంచే ఆయన ప్రయాణించే రోడ్లను పూర్తిగా క్లోజ్ చేస్తారు. దీంతో వాహనదారులు రోడ్లపై నిమిషాలకొద్ది వెయిట్ చేయాల్సిన పరిస్థితి. దీని వల్ల అత్యవసరంగా వెళ్లేవాళ్లు, ఆఫీసులకు వెళ్లేవాళ్లు చాలా ఇబ్బందులు పడుతున్నారు.

అయితే తన కాన్వాయ్ విషయమై సీఎం రేవంత్ రెడ్డి అనూహ్య నిర్ణయం తీసుకున్న విషయం తెలిసిందే. తన కాన్వాయ్ వెళుతున్న సమయంలో సామాన్య ప్రజలకు ఇబ్బందులు కలుగకుండా చర్యలు తీసుకోవాలని గతంలో అధికారులను ఆదేశించారు. తానూ ప్రయాణించే మార్గంలో ట్రాఫిక్ జామ్‌లు లేకుండా.. ట్రాఫిక్‌ను నిలిపివేయకుండా ప్రత్యామ్నాయ చర్యలు తీసుకోవాలని సూచించారు. సీఎం రేవంత్ రెడ్డి ఆదేశాల మేరకు పోలీసులు కొద్దిరోజులపాటు ఈ విధానాన్ని అమలు చేశారు. అయితే భద్రతా చర్యల దృష్ట్యా సాధారణ వాహనాలు వెళ్లే విధానాన్ని ఎత్తివేసింది.

ముఖ్యమంత్రి వచ్చే సమయంలో అపొజిట్ డెరెక్షన్‌తోపాటు సీఎం ప్రయాణించే మార్గంలోనూ వెహికల్స్ ఎక్కడికక్కడ నిలిపేస్తున్నారు. జూబ్లీహిల్స్‌లో వంటి ప్రాంతంలో వాహనాల రద్దీ ఎక్కువగా ఉటుంది. అదే ప్రాంతంలో సీఎం రేవంత్ నివాసం కూడా ట్రాఫిక్‌పై తీవ్ర ప్రభావం పడుతోంది. ఈ విషయాన్ని గుర్తించిన సీఎం.. వాహనదారులకు ఇబ్బందులు కలగకుండా ట్రాఫిక్‌ సమస్యలు తలెత్తకుండా దృష్టి పెట్టాలని పోలీసు ఉన్నతాధికారులకు సూచించారు. దాంతో పాటుగా మార్పులు, చేర్పులు చేయాలన్నారు.

గతంలో ముఖ్యమంత్రితో కూడిన కాన్వాయ్‌ ప్రయాణించే సమయంలో ఆ దారిలో వాహనాలను అనుమతించేవారు కాదు. ఇప్పుడు సీఎం ప్రయాణించే మార్గంలో ఆయన వాహనం ఆగకుండా వెళ్లేలా సాధారణ వెహికల్స్‌ను కూడా వీలున్నంతమేరకు అనుమతిస్తున్నారు. కాన్వాయ్‌ ప్రయాణించే మార్గానికి అపొజిట్ డైరెక్షన్‌లో (డివైడర్‌కు మరోవైపు) వాహనాలను అనుమతిస్తున్నారు. టీ-జంక్షన్‌ ఉన్న ప్రాంతాల్లో మాత్రం ఒకవైపు వాహనాలను పూర్తిగా నిలిపివేస్తున్నారు.

అంతకుముందు సీఎం కాన్వాయ్‌కు ముందు పోలీసుశాఖకు చెందిన ముఖ్యఅధికారులు ఎస్కార్ట్‌ వాహనాల్లో వెళ్తుండేవారు. ఈ పద్ధతి వద్దని వారి ఎస్కార్ట్ వాహనాలు తొలగించాలని సూచించినట్లు చెప్పారు. కాన్వాయ్‌లో వీలైనంత తక్కువ వెహికల్స్ ఉండేలా చూడాలని సీఎం అదేశించినట్లు తెలిసింది.