ఎనిమిది కాళ్లతో జన్మించిన వింత గొర్రెపిల్ల,,,ఆసక్తిగా చూస్తున్న గ్రామస్థులు
Telangana Telugu | Suryaa Desk | Published : Mon, May 08, 2023, 07:55 PM
బ్రహ్మంగారు చెప్పింది నిజమవుతోందా...? మనిషికి రెండు కాళ్లు, రెండు చేతులు ఉంటాయి. అదే జంతువులకైతే నాలుగు కాళ్లు ఉంటాయి. అయితే అందులో ఏది ఎక్కువైనా.. తక్కువైనా.. వింతగానే చెప్పుకుంటాం. ఇప్పటికే అలాంటి వింత జంతువులు జన్మించిన ఘటనలు అనేకం. తాజాగా వరంగల్ జిల్లాలో వింత గొర్రెపిల్ల జన్మించింది. సంగెం మండలం తిమ్మాపురం గ్రామానికి చెందిన ఓదెలుకు గొర్రెల మంద ఉంది. అందులో ఓ గొర్రె ఇవాళ గొర్రెపిల్లకు జన్మనిచ్చింది.
అయితే ఆ గొర్రె పిల్ల వింత ఆకారంలో జన్మించింది. నాలుగు కాళ్లకు బదులుగా 8 కాళ్లు, నాలుగు చెవులు, ఒక తలతో గొర్రెపిల్ల జన్మించింది. వింతగా జన్మించిన ఆ గొర్రెపిల్లను చూసేందుకు స్థానికులతో పాటు సమీప గ్రామాల ప్రజలు ఓదేలు ఇంటికి వద్దకు బారులు తీరుతున్నారు. దాన్ని ఆసక్తిగా చూస్తున్నారు. జన్యుపరమైన లోపాలతో ఇప్పుడప్పుడు ఇలా జంతువులు జన్మిస్తాయని పశువైద్యులు ఉంటున్నారు. ప్రస్తుతం గొర్రెపిల్ల ఆరోగ్యం నిలకడగా ఉందని చెబుతున్నారు.
ఇదిలా ఉండగా.. గొర్రెపిల్ల వితంగా జన్మించటం పట్ల రకరకాల వ్యాఖ్యానాలు వినిపిస్తున్నాయి. బ్రహ్మంగారి కాలజ్ఞానం నిజమవుతోందని.. అందుకే ఇటువంటి వింతలు చోటు చేసుకుంటున్నాయని చెబుతున్నారు. ఇది కలికాలమని.. కలియుగంలో ఇలాంటి వింతలే జరుగుతాయని అంటున్నారు. వేప చెట్టుకు పాలు కారటం, నీటితో దీపాలు వెలిగించటం వంటి ఘటనలను గుర్తు చేసుకుంటున్నారు. ఇదిలా ఉండగా.. వింత గొర్రెపిల్ల ఫోటోలు స్థానిక వాట్సప్ గ్రూపుల్లో వైరల్‌గా మారాయి.
|
|
