ఉక్రెయిన్ దేశాధినేత డ్రస్ తీరుపై ఆర్థిక నిపుణుడి అసహనం

ఒక పక్క యుద్ధంతో ఉక్రెయిన్ అతలాకుతలం అవుతుంటే.. ఓ అమెరికా ఆర్థిక నిపుణుడు ఆ దేశ అధ్యక్షుడు జెలెన్ స్కీ దుస్తులపై కామెంట్స్ చేశారు. దాంతో నెటిజన్లు ఆయనపై మండిపడుతున్నారు. బుధవారం వోలోదిమిర్ జెలెన్ స్కీ యూఎస్ కాంగ్రెస్ చట్ట సభ సభ్యులను ఉద్దేశించి చేసిన ప్రసంగానికి స్టాండింగ్ ఒవేషన్ లభించింది. అయితే ఆ టైంలో జెలెన్ స్కీ ఆర్మీ గ్రీన్ టీ షర్ట్ ధరించారు. ఆ దుస్తులను వేసుకోవడంపై అమెరికన్ ఆర్థిక నిపుణుడు అసంతృప్తి వ్యక్తం చేశారు. యూరో పసిఫిక్ కేపిటల్‌ చీఫ్ ఎకనమిస్ట్, గ్లోబల్ స్ట్రాటజిస్ట్ అయిన పీటర్ షిఫ్ ట్విట్టర్‌లో జెలెన్‌స్కీని విమర్శించారు. స్పీచ్ ఇచ్చే సమయంలో జెలెన్ స్కీ సూటు ధరిస్తే బాగుండేందని అన్నారు. పైగా ప్రస్తుత పరిస్థితులు బాగోలేదని తనకు తెలుసునని, అయితే తానైతే టీ షర్ట్ ధరించి ప్రసంగించనని అన్నారు. సంస్థలను, అమెరికాను అగౌరవపరచాలని తాను అనుకోనని కూడా షిఫ్ అన్నారు. అయితే షిఫ్ చేసిన ఈ కామెంట్స్‌పై నెటిజన్లు విరుచుకుపడుతున్నారు. జెలెన్ స్కీ ఇప్పుడు వార్ జోన్‌లో ఉన్నారని, మంచి బట్టలు కోసం వెదికి వేసుకునే సమయం ఇది కాదని ఫైర్ అయ్యారు. అంతేకాదు ట్వీట్‌లో యునైటెడ్ స్టేట్స్ అనే పదాన్ని కూడా సరిగా రాయలేదని, ఒకసారి చూసుకోమని వ్యంగ్యంగా సలహాలు ఇచ్చారు. అయితే పీటర్ షిఫ్ మళ్లీ వీటిపై స్పందిస్తూ జెలెన్ స్కీ రణరంగంలో లేరని, చక్కగా తయారై ప్రసంగించారని రిప్లై ఇచ్చారు. దాంతో ఇలాంటి పిచ్చి కూతలు మానాలంటూ మరో యూజర్ రియాక్ట్ అయ్యారు. దీనికి కూడా షిఫ్ బదులిస్తూ యుద్ధ భూమిలో ఎవరూ టీ షర్ట్‌లతో పోరాటం చేయరని, యుద్ధం చేసే వారికి వేరే యూనిఫాం ఉంటుందంటూ ట్వీట్ చేశారు. దాంతో నెటిజన్లు ఆయనపై మరింత ఆగ్రహం వ్యక్తం చేస్తున్నారు.