చైనా విదేశాంగ మంత్రి అదృశ్యం.. హత్య చేశారా.. ఆత్మహత్యకు పాల్పడ్డారా

చైనాలో ఏం జరిగినా బయటి ప్రపంచానికి అస్సలు తెలియదు. ఏకంగా ఆ దేశ విదేశాంగ మంత్రి కనిపించకపోవడం తీవ్ర చర్చనీయాంశంగా మారింది. దాదాపు 6 నెలలుగా కనిపించకుండాపోయిన ఆయన.. ప్రస్తుతం చనిపోయారనే వార్తలు వెలువడుతున్నాయి. ఈ నేపథ్యంలోనే ఆయన ఆత్మహత్య చేసుకున్నారని తెలుస్తోంది. అయితే చైనా ప్రభుత్వమే ఆ దేశ విదేశాంగ మంత్రిని హింసించి చంపిందని మరికొన్ని వార్తా కథనాలు వెలువడటం అంతర్జాతీయంగా తీవ్ర చర్చకు దారి తీస్తోంది.

చైనా విదేశాంగ మంత్రిగా సేవలు అందించిన క్విన్ గాంగ్.. గత కొన్ని నెలలుగా ప్రపంచానికి కనిపించడం లేదు. గతంలో అమెరికాలో చైనా రాయబారిగా పనిచేసిన క్విన్ గాంగ్.. ఆ తర్వాత వెంటనే అత్యున్నత పదవి పొంది చైనా విదేశాంగ మంత్రిగా నియమితులయ్యారు. అయితే ఆయన గత కొంత కాలంగా బయటికి రాకపోవడంతో అనేక వార్తలు చక్కర్లు కొట్టాయి. అయితే ఆయన ఎక్కడ ఉన్నారనే విషయం మాత్రం బయటికి రాలేదు. చివరిసారిగా ఈ ఏడాది జూన్‌ నెలలో కనిపించిన క్విన్ గాంగ్.. ప్రస్తుతం ప్రాణాలతో లేరనే వార్తలు మీడియాలో తెగ వైరల్ అవుతున్నాయి. అయితే క్విన్ గాంగ్ సూసైడ్ చేసుకున్నారని కొన్ని పత్రికల్లో రావడం తీవ్ర కలకలం రేపింది. మరోవైపు.. చైనా ప్రభుత్వమే క్విన్ గాంగ్‌ను తీవ్రంగా హింసించి చంపేసిందని మరికొన్ని పత్రికల్లో రావడంతో.. అసలు క్విన్ గాంగ్‌కు ఏమైంది అనే అనుమానాలు వెల్లువెత్తుతున్నాయి.

ఈ ఏడాది జులై నెలలో బీజింగ్‌లోని మిలటరీ ఆస్పత్రిలో క్విన్ గాంగ్ చనిపోయారని చైనా ప్రభుత్వంలోని ఇద్దరు అత్యున్నత స్థాయి అధికారులు చెప్పినట్లు ‘పొలిటికో’ అనే వార్తాసంస్థ ఒక వార్తను ప్రచురించింది. అమెరికాలో చైనా రాయబారిగా క్విన్‌ గాంగ్ కొనసాగిన కాలంలో ఆయనకు ఉన్న వివాహేతర సంబంధమే ఈ అదృశ్యం ఘటనకు అసలు కారణమని గతంలో వాల్‌స్ట్రీట్‌ జర్నల్‌ ఒక కథనం వెలువరించింది. అమెరికా పౌరసత్వం గల చైనా అధికారిక ఫీనిక్స్‌ టీవీ మహిళా రిపోర్టర్‌ ఫ్యూ గ్జియోయాన్‌తో క్విన్ గాంగ్ వివాహేతర సంబంధం కారణంగా చైనా జాతీయ భద్రత ప్రమాదంలో పడిందని షీ జిన్‌పింగ్‌ ప్రభుత్వం బలంగా నమ్మింది. ఆ మహిళ సరోగసీ పద్ధతిలో ఒక బిడ్డకు జన్మనిచ్చింది. ఇప్పుడు ఆ తల్లీబిడ్డల ఆచూకీ కూడా కనిపించకుండా పోయింది. అయితే ఈ ఘటనపై చైనా ప్రభుత్వం చేపట్టిన దర్యాప్తునకు క్విన్ గాంగ్ సహకరించినట్లు తెలుస్తోంది.

అయితే క్విన్‌గాంగ్‌ వ్యవహారాన్ని సీరియస్‌గా తీసుకున్న జిన్‌పింగ్‌ సర్కార్.. వెంటనే ఆయనను ఈ ఏడాది జూన్‌లో చైనా విదేశాంగ శాఖ మంత్రి పదవి నుంచి తొలగించారు. ఆయన స్థానంలో మాజీ దౌత్యవేత్త వాంగ్‌ యీకి పదవీ బాధ్యతలు అప్పగించినట్లు వార్తలు వెలువడ్డాయి. కేవలం 6 నెలలు పదవిలో ఉన్న క్విన్‌గాంగ్‌ ఆ తర్వాత కనిపించకుండా పోయారు. 2014 నుంచి 2018 కాలంలో చైనా దేశాధ్యక్షుడు షీ జిన్‌పింగ్‌కు చీఫ్‌ ప్రోటోకాల్‌ ఆఫీసర్‌గా పనిచేసిన క్విన్‌ గాంగ్ ఆయనకు అత్యంత ఆప్తుడు అయ్యాడు. అందుకే అత్యంత నమ్మకస్తులకు మాత్రమే దక్కే అమెరికాలో చైనా రాయబారి పదవిని క్విన్‌ గాంగ్‌కు జిన్‌పింగ్‌ అప్పగించారు.