ఆగని లోన్ యాప్ ఆగడాలు..మరో ప్రాణం పోయింది

ఎన్ని చర్యలు తీసుకొంటున్నా లోన్ యాప్ ల ఆగడాలు  మాత్రం ఆగడంలేదు. రోజురోజుకు లోన్ యాప్ ఆగడాలు మాత్రం శృతిమించుతున్నాయి. తీసుకున్న అసలుకి వడ్డీలు మీద వడ్డీలు వేసి వేధించడమే కాకుండా.. అవి చెల్లించకపోతే పర్సనల్ డేటా సోషల్ మీడియాలో పెడతామంటూ బెదిరిస్తుండటంతో ఆత్మహత్యలకు పాల్పడుతున్నారు. ఇరు తెలుగు రాష్ట్రాల్లో ఒకదాని తర్వాత మరొక ఘటన వెలుగులోకి వస్తుంది. తాజాగా తూర్పుగోదావరి జిల్లాల్లో సబ్‌స్టేషన్‌లో షిఫ్ట్ ఆపరేటర్‌గా పనిచేస్తున్న యువకుడు ఉరేసుకుని ప్రాణాలు తీసుకున్నాడు.

నలజర్ల మండలం దూబచర్ల గ్రామానికి చెందిన కోరసీక శ్రీనివాసరావు రాజమండ్రిలోని ధవళేశ్వరం సబ్‌స్టేషన్‌లో షిఫ్ట్ ఆపరేటర్‌గా పనిచేస్తున్నాడు. అవసరాల నిమిత్తం పలు లోన్ యాప్‌ల నుంచి శ్రీనివాసరావు లోన్ తీసుకున్నాడు. తీసుకున్న మొత్తాన్ని నెమ్మదిగా కట్టుకుంటూ వస్తున్నాడు.. అయినా, ఇంకా చెల్లించాలంటూ శ్రీనివాసరావుకు వేధింపులు మొదలయ్యాయి. తీసుకున్న అప్పు మొత్తం చెల్లించినా వేధింపులు ఆగకపోవడంతో.. లోన్‌యాప్ వేధింపులు ఆగకపోవడంతో శ్రీనివాస్ ఇవాళ ఉదయం ఆత్మహత్యకు పాల్పడ్డాడు.

లోన్ యాప్ వేధింపుల వల్లే శ్రీనివాస్ ఫ్యాన్‌కు ఉరేసుకుని ఆత్మహత్యకు పాల్పడినట్లు కుటుంబ సభ్యులు పోలీసులు ఫిర్యాదు చేశారు. దాంతో కేసు నమోదు చేసిన పోలీసులు దర్యాప్తు చేస్తున్నారు. గతంలో కూడా ఇలాంటి ఘటనలు అనేకం జరిగాయి. లోన్ కట్టకపోతే పర్సనల్ డేటా సోషల్ మీడియాలో పెడతామంటూ బెదిరించడంతో ఆత్మహత్యలకు పాల్పడ్డారు. ఒకవైపు పోలీసులు లోన్ యాప్ నిర్వాహకులపై కఠిన చర్యలు తీసుకుంటున్నా.. మరోవైపు ఇలాంటివి జరుగుతుండటం దురదృష్టకరం.