కోపంతో అత్త చెవి పూర్తిగా కొరికేసిన కోడలు.. అతికించలేమని చేతులెత్తేసిన డాక్టర్లు

గుంటూరు జిల్లా తుళ్లూరులో దారుణ ఘటన వెలుగులోకి వచ్చింది. ఓ కోడలు అత్త చెవిని పూర్తిగా కొరికేసింది. కుటుంబ కలహాలతో గొడవకు దిగి అత్త చెవిని దారుణంగా కొరికింది. తెగిపోయిన చెవిని తీసుకొని బాధితురాలు ఆసుపత్రికి వెళ్లగా డాక్టర్లు చేతులెత్తేశారు. ఆ చెవిని అతికించలేమని చెప్పి ట్రీట్‌మెంట్ చేసి పంపించారు. వివరాళ్లోకి వెళితే.. గుంటూరు జిల్లా తుళ్లూరుకు చెందిన కంభంపాటి శేషగిరి, పావని దంపతులు. కొన్నేళ్ల క్రితం వీరికి విహహం కాగా.. ఈ దంపతులకు ఇద్దరు కుమారులు.

అయితే పెళ్లైన కొన్ని రోజులకే అత్త నాగమణి, కోడలు పావని మధ్య గొడవలు మెుదలయ్యాయి. గత కొన్ని రోజులుగా ఆ గొడవలు తీవ్రస్థాయికి చేరుకున్నాడు. ఈ క్రమంలో గత ఆదివారం (అక్టోబర్ 6) రాత్రి అత్త కోడలి మధ్య పెద్ద గొడవ జరిగింది. ఒకరిపై ఒకరు దుమ్మెత్తి పోసుకోవటమే కాకుండా బండ బూతులు తిట్టుకున్నారు. ఈ క్రమంలో విచక్షణ కోల్పోయిన కోడలు పావని అత్తపై దాడికి దిగింది. ఆమె చెవిని పూర్తిగా కొరికేసింది. దీంతో నాగమణి చెవి మెుత్తం ఊడిపోయింది.

తెగిన చెవిని, నాగమణిని స్థానికులు వెంటనే తుళ్లూరులోని ప్రభుత్వ ఆసుపత్రికి తరలించారు. అక్కడి డాక్టర్ల సూచన మేరకు గుంటూరు ప్రభుత్వాసుపత్రికి తరలించారు. అయితే అప్పటికే ఆలస్యం కావడంతో తెగిన చెవి అత్తుకోవడం కష్టమని డాక్టర్లు చెప్పారు. తెగిన చెవి భాగానికి ట్రీట్‌మెంట్ చేసి పంపించారు. బాధితురాలు ఇచ్చిన ఫిర్యాదు మేరకు కేసు నమోదు చేసుకొని విచారణ చేపడుతామని పోలీసులు వెల్లడించారు. కాగా, ఈ ఘటన స్థానికంగా చర్చనీయాంశంగా మారింది. కోపం ఉంటే తిట్టుకోవలే కానీ.. ఇలా చెవి కొరకటం ఏంటని మండిపడుతున్నారు.

బాలికకు మద్యం తాగించి అత్యాచారం..ఇక కాకినాడ జిల్లా పిఠాపురంలో దారుణం వెలుగులోకి వచ్చింది. ఓ బాలిక(16)పై అత్యాచారం జరిగిన ఘటన ఆలస్యంగా వెలుగు చూసింది. రోడ్డుపై నడుచుకుంటూ వెళ్తున్న బాలికను ఆటోలో వచ్చిన ఓ వ్యక్తి, మరో మహిళ కాగితం చూపించి అడ్రస్ అడిగారు. బాలికపై మత్తు మందు స్ర్పే చేసి పట్టణ శివారుకు తీసుకెళ్లి బాలికకు బలవంతంగా మద్యం తాగించారు. ఆపై బాలికపై అత్యాచారం చేశాడు. అపస్మారక స్థితిలోని బాలికను మళ్లీ ఆటో ఎక్కిస్తుండగా చెత్త ఏరుకునే మహిళ చూసి అనుమానించింది. దీంతో ఈ వ్యవహారం బయటపడింది. నిందితులు అక్కడి నుంచి పరారు కాగా.. వారి కోసం పోలీసులు గాలిస్తున్నారు.