ఒలింపిక్స్‌లో పతకం చేజారినా ఎమ్మెల్యేగా గెలిచిన వినేష్ ఫోగట్.. జులానా నుంచి జయకేతనం

 కేవలం 100 గ్రాముల అధిక బరువు కారణంగా.. పారిస్ ఒలింపిక్స్‌ ఫైనల్‌కు అర్హత సాధించలేకపోయి.. చివరి మెట్టుపై బోల్తా పడిన వినేశ్ ఫోగట్ హరియాణా అసెంబ్లీ ఎన్నికల్లో గెలుపొంది ఎమ్మెల్యేగా ఎన్నికయ్యారు. మంగళవారం వెలువడిన హరియాణా అసెంబ్లీ ఎన్నికల ఫలితాల్లో కాంగ్రెస్ పార్టీ తరఫున జులానా నియోజకవర్గం నుంచి విజయం సాధించారు. బీజేపీ తరఫున బరిలోకి దిగిన యోగేష్ కుమార్‌పై 6వేలకు పైగా ఓట్ల తేడాతో గెలుపొందారు. ఇక ఈ జులానా నియోజకవర్గంలో గత 19 ఏళ్లుగా కాంగ్రెస్ పార్టీకి రాని విజయాన్ని తొలిసారి ఎన్నికల్లో పోటీ చేసిన వినేష్ ఫోగట్ అందించారు.

కొన్ని రోజుల క్రితం పారిస్ వేదికగా జరిగిన ఒలింపిక్స్‌లో రెజ్లింగ్ విభాగంలో ఫైనల్‌కు చేరిన వినేష్ ఫోగట్.. ఫైనల్‌కు ముందు 100 గ్రాముల బరువు ఎక్కువగా ఉన్న కారణంగా.. పోటీ నుంచి అనర్హతకు గురయ్యారు. ఆ సమయంలో దేశం మొత్తం ఆమెకు మద్దతుగా నిలిచారు. ఇక ఆ పారిస్ ఒలింపిక్స్ తర్వాత.. రెజ్లింగ్‌కు గుడ్‌బై చెప్పిన వినేశ్ ఫోగట్.. రాజకీయాల్లోకి అడుగు పెట్టారు. ఈ క్రమంలోనే సెప్టెంబర్ 5వ తేదీన కాంగ్రెస్ పార్టీ కండువా కప్పుకున్నారు.

అనంతరం హస్తం పార్టీ.. వినేష్ ఫోగట్‌కు హర్యానా అసెంబ్లీ ఎన్నికల్లో జులానా టికెట్ కేటాయించింది. ఇక గతేడాది రెజ్లింగ్ ఫెడరేషన్ ఆఫ్ ఇండియా మాజీ చీఫ్, బీజేపీ ఎంపీ బ్రిజ్ భూషణ్ శరణ్ సింగ్‌.. తమను లైంగిక వేధింపులకు గురి చేశారంటూ రెజ్లర్లు దేశవ్యాప్తంగా ఆందోళన చేయగా.. వినేశ్ ఫోగట్ పేరు దేశవ్యాప్తంగా మారుమోగింది.

ఇక అందరి అంచనాలు, ఎగ్జిట్ పోల్స్ అంచనాలను కూడా తలకిందులు చేస్తూ.. హరియాణా అసెంబ్లీ ఎన్నికల ఫలితాల్లో బీజేపీ మెజార్టీ స్థానాలకు మించి సీట్లలో ఆధిక్యం, విజయాన్ని సొంతం చేసుకుంది. ఇక ఇప్పటికే 2014, 2019లో గెలిచి అధికారం దక్కించుకున్న కమలం పార్టీ తాజాగా మరోసారి గెలిచి హ్యాట్రిక్ కొట్టి హరియాణా రాజకీయాల్లో ఒక కొత్త రికార్డును సృష్టించేందుకు సిద్ధంగా ఉంది.

గూగుల్ ట్రెండ్స్‌లో వినేష్ ఫోగట్

ఒలింపిక్స్‌లో అనూహ్య రీతిలో పతకం చేజార్చుకున్న వినేష్ ఫోగట్‌పై యావత్ దేశం సానుభూతి వ్యక్తం చేసింది. బీజేపీ మాజీ ఎంపీ బ్రిజ్ భూషణ్ శరణ్ సింగ్‌కు వ్యతిరేకంగా జరిగిన ఆందోళనల్లో పాల్గొన్న సమయంలోనే వినేష్ ఫోగట్ దేశం దృష్టిని ఆకర్షించారు. లైంగిక వేధింపులపై గొంతెత్తిన వినేష్ ఫోగట్.. ఒలింపిక్స్‌లో ఓటమి తర్వాత కాంగ్రెస్ పార్టీలో చేరి, ఎమ్మెల్యేగా పోటీ చేశారు. దీంతో జులానా నియోజకవర్గం వార్తల్లో నిలిచింది. కాంగ్రెస్ పార్టీ నుంచి పోటీ చేసిన వినేష్ ఫోగట్ గెలిచారా? లేదా? అని ఎక్కువ మంది సెర్చ్ చేశారు. దీంతో వినేష్ ఫోగట్ గూగుల్ ట్రెండ్స్‌లో నిలిచారు. రాజస్థాన్, హర్యానా, ఢిల్లీ, హిమాచల్ ప్రదేశ్, ఉత్తరాఖండ్‌లో వినేష్ ఫోగట్ గురించి ఎక్కువ మంది సెర్చ్ చేశారు.