కామాంధుడిపై దాడిచేసి.. ఆరేళ్ల బాలికను కాపాడిన వానర సైన్యం

అభంశుభం తెలియని ఆరేళ్ల చిన్నారిపై అత్యాచారానికి యత్నించిన ఓ కామాంధుడికి.. కోతుల మూక తగిన శాస్తిచేసింది. వాడిపై దాడిచేసి.. ఆ చిన్నారిని అతడి బారి నుంచి కాపాడింది. ఈ ఘటన ఉత్తర్ ప్రదేశ్‌లోని బాగ్‌పత్‌లో చోటుచేసుకుంది. ఘటనపై బాలిక తల్లిదండ్రుల ఫిర్యాదుచేయగా.. గుర్తుతెలియని ఆ నిందితుడిపై పోక్సో కేసు నమోదుచేసిన పోలీసులు.. పరారీలో ఉన్న అతడి కోసం గాలిస్తున్నారు. పోలీసుల కథనం ప్రకారం.. బాలికను మభ్యపెట్టి ఓ పాడుబడిన ఇంటిలోకి తీసుకెళ్లిన గుర్తుతెలియని వ్యక్తి.. ఒంటిపై దుస్తులు తొలగించి లైంగిక దాడికి యత్నించాడు. ఈ సమయంలో అక్కడ ఉన్న కొన్ని కోతులు అతడివైపు దూసుకొచ్చి.. దాడి చేశాయి. దీంతో ఆ చిన్నారిని అక్కడ వదిలేసి నిందితుడు పరారయ్యాడు.

 తప్పించుకుని ఇంటికి చేరిన బాలిక.. తల్లిదండ్రులకు ఈ విషయం గురించి చెప్పింది. కోతులు తనను ఎలా కాపాడాయే వారికి వివరించింది. బాలిక తండ్రి మాట్లాడుతూ.. ‘ఇంటి బయట ఆడుకుంటుండగా తన కుమార్తెను నిందితుడు తీసుకెళ్లాడు.. ఓ ఇరుకు సందు నుంచి పాపను తీసుకెళ్లడం సమీపంలో ఉన్న సీసీటీవీ కెమెరాల్లో రికార్డయ్యింది.. నిందితుడ్ని గుర్తించే పనిలో పోలీసులు ఉన్నారు.. వాడు నా కూతుర్ని చంపుతానని బెదిరించాడు.. సమయానికి కోతులు అక్కడకు రాకపోయి ఉంటే నా కుమార్తె చనిపోయి ఉండేది’అని ఆయన అన్నారు.

బాగ్‌పత్ సర్కిల్ ఆఫీసర్ హరీశ్ భదోరియా మాట్లాడుతూ.. ‘బాలికపై అత్యాచారం జరగకుండా కోతులు అడ్డుకున్నాయనే విషయం మా దృష్టికి వచ్చింది.. దీనిపై దర్యాప్తు చేపట్టాం.. ఆ చిన్నారి కుటుంబసభ్యుల ఫిర్యాదుతో భారత న్యాయ సంహిత చట్టం సెక్షన్ 74, 76తో పాటు పోక్సో చట్టం కింద కేసు నమోదయ్యింది.. అవసరమైతే మరిన్ని సెక్షన్లను జోడిస్తాం.. నిందితుడ్ని గుర్తించే ప్రక్రియ కొనసాగుతోంది.. సమీపంలోని సీసీటీవీ ఫుటేజ్‌లను పరిశీలిస్తున్నాం... త్వరలోనే అతడ్ని పట్టుకుంటాం’ అని చెప్పారు. ఏదిఏమైనప్పటికీ కోతులు చేసిన పనికి ఓ చిన్నారి అత్యాచారయత్నం నుంచి తప్పించుకుంది. మరోవైపు, ఈ ఘటన చుట్టుపక్కల చర్చనీయాంశంగా మారింది. సాధారణంగా కోతులు చిన్నారులపై దాడిచేసి, గాయపరుస్తుంటాయి. ఇలాంటి ఘటనలు అనేకం చోటుచేసుకున్నాయి. ఊయలలో నిద్రపోతున్న పసికందును కోతులు పొట్టనబెట్టుకున్న సంఘటన యూపీలోనే జరిగింది.