మాజీ మంత్రి అనిల్ వైసీపీ నుంచి వాళ్లందరిని జనసేనలోకి వెళ్లమని చెబుతున్నారు.. రూప్‌కుమార్

మాజీ మంత్రి అనిల్‌కుమార్ యాదవ్‌పై సొంత బాబాయి, నెల్లూరు కార్పొరేషన్ డిప్యూటీ మేయర్ రూప్‌కుమార్ యాదవ్ సంచలన వ్యాఖ్యలు చేశారు. నెల్లూరు జిల్లాను అనిల్ సర్వనాశనం చేశారని.. నెల్లూరు ఫతేఖాన్ పేటలో కూల్‌డ్రింక్ షాపులో పనిచేసుకునే అనిల్.. ఎలా ఎమ్మెల్యే అయ్యారని ప్రశ్నించారు. అనిల్ కుమార్ యాదవ్ ఒక ఆర్కెస్ట్రా ఆర్టిస్ట్.. ఇటీవల టీడీపీలో చేరిన వైఎస్సార్‌సీపీ కార్పొరేటర్లను ఎక్స్‌ట్రా ఆర్టిస్టులు అన్నట్లుగా అనిల్ మాట్లాడారని.. ఉప్పు అమ్ముకునే వాళ్లు, పెయింట్ వేసే వారు కార్పొరేటర్స్ కాకూడదా అని ప్రశ్నించారు. నెల్లూరులో కార్పొరేటర్లు కష్టపడి రక్తాన్ని చెమటగా మారిస్తేనే అనిల్ రెండు సార్లు ఎమ్మెల్యే అయ్యారన్నారు. అనిల్ కుమార్‌ని ఎమ్మెల్యేని, మంత్రిని చేసింది తమ లాంటి కార్యకర్తలేనని.. 17 ఏళ్లు షిఫ్ట్ ఆపరేటర్‌గా పని చేసిన వ్యక్తికి.. అదే పోస్టును రూ.7 లక్షలకి అమ్ముకున్నారంటూ ఆరోపణలు చేశారు.

అనిల్ ఉత్సవ విగ్రహంగా ఉంటే.. నెల్లూరు సిటీలో రాజకీయాలు చేసింది తామేనన్నారు రూప్‌కుమార్ యాదవ్. తాము గెలిపిస్తే కార్యకర్తలకు అన్యాయం చేసి జిల్లాని నాశనం చేశారన్నారు. అనిల్ రాబోయే రోజుల్లో తానేంటో చూపిస్తానన్నారని.. మంత్రిగా, ఎమ్మెల్యే గా ఉన్నప్పుడే ఏం చేయలేకపోయారంటూ ఎద్దేవా చేశారు.. అనిల్ ఇప్పుడు ఏం చేయగలరని ప్రశ్నించారు. టీడీపీలోకి వెళ్తున్న వైఎస్సార్‌సీపీ కార్పొరేటర్లని టీడీపీలోకి వద్దు, జనసేన పార్టీలోకి వెళ్లమని అనిల్ చెబుతున్నారని సంచలన వ్యాఖ్యలు చేశారు. కార్పొరేటర్ల విషయంలో అనిల్ వైఎస్సార్‌సీపీకి వెన్నుపోటు పొడుస్తున్నారని విమర్శించారు. తన మాట వినకుండా కార్పొరేటర్లు టీడీపీలో చేరడంతో ఆ అక్కసు చూపిస్తున్నారని మండిపడ్డారు. కార్పొరేటర్లను చెన్నైకి పిలిచి జనసేన పార్టీలోకి వెళ్లాలని చెప్పారని.. దీనిపై ప్రమాణం చేయడానికి సిద్ధమా అని ప్రశ్నించారు. వెన్నుపోటు గురించి అనిల్ మాట్లాడటం విడ్డూరంగా, సిగ్గుగా ఉందన్నారు.

వైఎస్సార్‌సీపీ హయాంలో మంత్రి నారాయణపై అక్రమ కేసులు పెట్టి ఇబ్బంది పెట్టారని.. తాము కక్ష సాధింపులకు పోలేదని ఎక్స్‌ట్రా ఆర్టిస్ట్ చెప్పడం విడ్డూరంగా ఉందన్నారు రూప్‌కుమార్. మంత్రి నారాయణ మీద పెట్టినన్ని కేసులు, వేధింపులు ఎవరి మీద లేవని.. అయినా అక్రమ అరెస్ట్‌లు, వేధింపులు తట్టుకుని 72వేల మెజార్టీతో నారాయణ విజయం సాధించారని గుర్తు చేశారు. నారాయణ ఎన్ని కష్టాలు వచ్చినా.. అనిల్ కుమార్ యాదవ్ లాగా భయపడి నియోజకవర్గం నుంచి వెళ్ళిపోలేదని సెటైర్లు పేల్చారు. ప్రతి ఏటా నారాయణ రూ.పది కోట్లు సొంత నిధులు కార్యకర్తలకు కేటాయిస్తున్నారన్నారు. నారాయణ కాలేజ్ కింద ఇరిగేషన్ కాలువ ఉంటే ఎక్స్‌ట్రా ఆర్టిస్ట్ మంత్రిగా ఉండి ఎందుకు చర్యలు తీసుకోలేదని ప్రశ్నించారు. అనిల్‌కు వీపీఆర్ (వేమిరెడ్డి ప్రభాకర్)ని విమర్శించే, ఉచ్చరించే అర్హత లేదన్నారు.