ఏపీవాసులకు బీ అలర్ట్.. వచ్చే మూడు రోజులు పలుచోట్ల భారీ వర్షాలు కురవనున్నాయి. మధ్య బంగాళాఖాతంలో ఏర్పడిన అల్పపీడనం.. తీవ్ర అల్పపీడనంగా మారింది. ఈ తీవ్ర అల్ప పీడనం ఉత్తర దిశగా కదులుతున్నట్లు వాతావరణ శాఖ అధికారులు తెలిపారు. ఇది ఒడిశా, పశ్చిమబెంగాల్, బంగ్లాదేశ్ తీరాల్లో సోమవారం నాటికి వాయుగుండంగా మారుతుందని వాతావరణశాఖ అధికారులు తెలిపారు. వాయుగుండంగా మారిన తర్వాత దిశను మార్చుకుని ఉత్తర ఒడిశా, ఝార్ఖండ్, ఛత్తీస్ ఘడ్ మీదుగా ప్రయాణించే అవకాశాలు ఉన్నట్లు తెలిపారు. ఇక ఈ అల్పపీడనం ప్రభావంతో వచ్చే మూడురోజులు ఏపీలో పలుచోట్ల భారీ వర్షాలు కురుస్తాయని వాతావరణశాఖ అంచనా వేసింది.
ఉత్తర కోస్తాలో శనివారం భారీ వర్షాలు కురుస్తాయన్న వాతావరణశాఖ.. ఆది, సోమవారాల్లో కోస్తా జిల్లాలలో భారీ నుంచి అతిభారీ వర్షాలు పడే అవకాశం ఉందని అంచనా వేసింది. ఇక రాయలసీమలోనూ కొన్ని చోట్ల తేలికపాటి నుంచి మోస్తారు వర్షాలు కురుస్తాయని అంచనా వేశారు. మరోవైపు బంగాళాఖాతంలోని అల్పపీడనం ప్రభావంతో ఆదివారం ఏలూరు, అల్లూరి సీతారామరాజు జిల్లా, ఉభయ గోదావరి జిల్లాలు, ఎన్టీఆర్ జిల్లాలలో అత్యంత భారీ వర్షాలు కురుస్తాయని వాతావరణ శాఖ హెచ్చరించింది. అలాగే కోనసీమ జిల్లా, కాకినాడ, అనకాపల్లి, విశాఖ, విజయనగరం, శ్రీకాకుళం, మన్యం, కృష్ణా జిల్లాల్లో అక్కడక్కడా భారీ నుంచి అతి భారీ వర్షాలు కురుస్తాయని అంచనా వేసింది. ఇదే సమయంలో ఆది, సోమవారాల్లో గుంటూరు, పల్నాడు, బాపట్ల జిల్లాల్లో భారీ వర్షాలు కురుస్తాయని వాతావరణ శాఖ అంచనా వేసింది.
మరోవైపు అల్పపీడనం ప్రభావంతో ఇవాళ (శనివారం) కూడా పలు జిల్లాల్లో వానలు పడుతున్నాయి. ఏలూరు, ఉభయ గోదావరి, ఎన్టీఆర్ జిల్లాలలో భారీ వానలు పడుతున్నాయి. విజయవాడలోనూ భారీ వర్షం కురిసింది. దీంతో వరద ప్రభావిత ప్రాంతాల్లో సహాయక చర్యలకు ఆటంకం కలిగింది. వరద ప్రభావిత ప్రాంతాల్లో ఆహారం, మంచినీరు సరఫరా చేస్తున్నారు. అలాగే ఇళ్లను శుభ్రం చేసే పనులు కొనసాగుతున్నాయి. వీటికి తోడుగా ప్రభుత్వం నిత్యావసరాలు పంపిణీ చేస్తోంది. అయితే భారీ వర్షం కారణంగా వీటికి ఆటంకం కలిగింది.
![]() |
![]() |