ఆస్పత్రిలో వింత శబ్దం.. చూస్తే ఓ మూలన నల్లటి ఆకారం

అది అల్లూరి సీతారామరాజు జిల్లాలోని చింతూరు మండలం మోతుగూడెంలో ఉండే జెన్‌కో ఆస్పత్రి. అసలే గ్రామీణ ప్రాంతం. ఆపై వర్షాకాలం.. దీంతో జబ్బులుపడే వారి సంఖ్య ఎక్కువగానే ఉంటోంది. ఇక అనారోగ్యానికి గురైనవారు.. చికిత్స చేయించుకునేందుకు ఆస్పత్రికి అప్పుడప్పుడే వస్తున్నారు. దీంతో కాస్త రద్దీగానే ఉంటోంది. ఈ క్రమంలోనే ఆదివారం కూడా కొంత మంది రోగులు వచ్చారు. అయితే ఆస్పత్రిలోని ఓ గదిలో ఓ నల్లటి ఆకారం వారిని భయపెట్టింది. ఎలా దూరిందో తెలియదు కానీ.. ఆస్పత్రిలోకి దూరింది ఓ నల్లటి కోబ్రా. గదిలోని బీరువా కింద నుంచి బుసలు కొడుతూ కనిపించింది. దీనిని గమనించిన రోగులు, ఆస్పత్రి సిబ్బంది బెంబేలెత్తిపోయారు.

సుమారుగా 12 అడుగుల పొడవు ఉన్న కోబ్రా.. ఆస్పత్రిలోని ఓ గదిలోకి ప్రవేశించింది. బయటకు రాలేక ఇబ్బందులు పడుతూ కనిపించింది. బుస్ బుస్ మంటూ శబ్దం వస్తూ ఉండటంతో అటుగా గమనించిన ఆస్పత్రి సిబ్బంది.. అక్కడ కనిపించిన దృశ్యం చూసి బిగుసుకుపోయారు. ఆస్పత్రిలోని రోగులతో పాటుగా సిబ్బంది బయటకు పరుగులు తీశారు.ఇక వెంటనే ఆస్పత్రిలోకి పాము దూరిన విషయమై సిబ్బంది అటవీశాఖ సిబ్బందికి సమాచారం అందించారు. ఆస్పత్రి సిబ్బంది ఇచ్చిన సమాచారంతో అక్కడకు చేరుకున్న ఫారెస్ట్ సిబ్బంది.. చాకచక్యంగా ఆ పామును బంధించారు. అనంతరం అటవీ ప్రాంతంలో వదిలిపెట్టారు.

అయితే వర్షాకాలం కావడంతో పాటుగా చుట్టుపక్కల పొదలు విస్తరించి ఉండటంతో పాము లోపలికి ప్రవేశించి ఉంటుందని స్థానికులు, ఆస్పత్రి సిబ్బంది అభిప్రాయపడుతున్నారు. మరోవైపు.. తమ ప్రాంతంలో నిత్యం పాములు కనిపిస్తున్నాయని, మండలంలో స్నేక్ క్యాచర్‌ని నియమించాలని స్థానికులు కోరుతున్నారు. అలాగే ఇలాంటి ఘటనలు మరోసారి పునరావృతం కాకుండా చర్యలు తీసుకోవాలని కోరుతున్నారు.