ఎంపాక్స్‌ నిర్ధరణ కోసం దేశంలోనే తొలి ఆర్టీ పీసీఆర్ కిట్

ప్రపంచ దేశాలను మంకీపాక్స్ వైరస్ కలవరపెడుతోంది. ఆఫ్రికన్ దేశాలలో మొదలైన ఈ వైరస్ చాపకింద నీరులా ప్రపంచ దేశాలకు విస్తరిస్తూ ఆందోళన రేకెత్తిస్తోంది. ఇక మంకీపాక్స్ వైరస్‌ను ఎదుర్కొనేందుకు ఆస్పత్రులు కూడా ముందుజాగ్రత్త చర్యలు ప్రారంభించాయి. మన దేశంలోనూ పలుచోట్ల ఐసోలేషన్ వార్డులు ఏర్పాటు చేస్తున్నారు. అయితే మంకీపాక్స్ వైరస్‌ను గుర్తించేందుకు గానూ మనదేశంలో తొలిసారిగా ఆర్టీ పీసీఆర్ కిట్ రూపొందించారు. ఈ ఘనతను విశాఖపట్నం మెడ్‌టెక్ జోన్ సొంతం చేసుకుంది. దేశంలోనే తొలిసారిగా మంకీపాక్స్ ఆర్టీ పీసీఆర్ కిట్ ఇక్కడ ఉత్పత్తి అయ్యింది. మెడ్‌టెక్ జోన్, ట్రాన్సాసియా డయాగ్నోస్టిక్స్ ప్రైవేట్‌ లిమిటెడ్‌ భాగస్వామ్యంతో ఎర్బామ్‌ డీఎక్స్‌ మంకీ పాక్స్‌ ఆర్టీ- పీసీఆర్ కిట్ రూపకల్పన చేసింది. శనివారం ఈ కిట్‌ను విడుదల చేశారు.

ఇక ఈ కిట్‌కు ఇండియన్ కౌన్సిల్ ఫర్ మెడికల్ రీసెర్చ్ (ఐసీఎంఆర్), సెంట్రల్‌ డ్రగ్స్‌ స్టాండర్డ్‌ కంట్రోల్‌ ఆర్గనైజేషన్‌ నుంచి కూడా అనుమతి లభించింది. ఎంపాక్స్ వైరస్ గురించి దేశవ్యాప్తంగా ఆందోళన వ్యక్తమవుతున్న నేపథ్యంలో.. మంకీపాక్స్ నిర్ధారణ కోసం ఆర్టీ- పీసీఆర్ కిట్ రావటం కీలకంగా భావించవచ్చు. మరోవైపు మంకీపాక్స్ వైరస్ తొలుత ఆఫ్రికాలో మొదలై తర్వాత యూరోప్ దేశాలకు విస్తరించింది. ఇటీవలే పాకిస్థాన‌లోనూ తొలి మంకీపాక్స్ కేసు నమోదైంది. అయితే ఎంపాక్స్ ప్రపంచానికి కొత్తేమీ కాదు. 1958లోనే మంకీపాక్స్‌ను తొలిసారిగా గుర్తించారు. 1970లో మొదటిసారిగా మనిషికి సోకింది. అయితే 2022లో తొలిసారిగా అధిక స్థాయిలో కేసులు నమోదు కావటంతో కలకలం రేగింది. ప్రస్తుతం ఆఫ్రికా దేశాలలో ఎక్కువ కేసులు నమోదవుతున్న నేపథ్యంలో ప్రపంచ ఆరోగ్య సంస్థ హెల్త్ ఎమర్జెన్సీ ప్రకటించింది.

అయితే ఎంపాక్స్ నేరుగా తాకడం వలన ఒకరి నుంచి మరొకరికి వ్యాపిస్తుంది. అలాగే శరీరం నుంచి విడుదలయ్యే స్రావాల ద్వారా వ్యాపిస్తుందని ఆరోగ్య నిపుణులు చెప్తున్నారు. అలాగే రోగి వాడిన వస్తువులను వాడటం ద్వారా కూడా వ్యాపించే అవకాశం ఉంది. అయితే వైరస్ శరీరంలోకి ప్రవేశించిన ఒకటి నుంచి 21 రోజుల లోపు లక్షణాలు కనిపిస్తాయి. జ్వరం, శరీరంపై పొక్కులు, ఒళ్లు నొప్పులు, నీరసం వంటి లక్షణాలు కనిపిస్తాయని డాక్టర్లు చెప్తున్నారు. అయితే ఎంపాక్స్ వ్యాప్తిపై గత కొన్నిరోజులుగా దేశంలో ఆందోళన వ్యక్తమవుతున్న వేళ.. ఆర్టీపీసీఆర్ కిట్ రావటంతో ముందుగానే గుర్తించే అవకాశం లభించింది.