వయసు పెరుగుతున్న కొద్దీ మనుషుల్లో వచ్చే శారీరక మార్పులను అడ్డుకునేందుకు ఎప్పటినుంచో యాంటీ ఏజింగ్ పరిశోధనలు చాలా జరుగుతున్నాయి. ఈ క్రమంలోనే వయసు పెరుగుదలకు కారణం అవుతున్న ఓ ప్రోటీన్ను సింగపూర్ శాస్త్రవేత్తలు తొలిసారిగా గుర్తించారు. ఈ ప్రోటీన్ ఉత్పత్తిని నియంత్రించడం ద్వారా.. వయసు పెరుగుతున్న కొద్దీ వచ్చే శారీరక క్షీణత ప్రక్రియ వేగాన్ని తగ్గించవచ్చని వెల్లడించారు. సింగపూర్కు చెందిన డ్యూక్-ఎన్యూఎస్ మెడికల్ స్కూల్ శాస్త్రవేత్తలు ఈ పరిశోధన చేశారు.
మనుషుల్లో గుండె, మూత్రపిండాలు, కాలేయం, ఊపిరితిత్తుల పనితీరులో ఇంటర్ల్యూకిన్ ఐఎల్-11 అనే ప్రోటీన్ కీలక ప్రభావం చూపుతుందని శాస్త్రవేత్తలు గుర్తించారు. ఈ ప్రోటీన్ ఉత్పత్తి పెరుగుతున్నా కొద్ది.. కాలేయంలో, పొట్టలో కొవ్వు పేరుకుపోతోందని.. దాని వల్ల క్రమంగా కండరాలు బలహీనపడుతున్నాయని వెల్లడైంది. ఇవన్నీ శారీరక ధృడత్వాన్ని తగ్గించి.. వయసు పెరుగుదలకు కారణం అవుతున్నాయని పేర్కొన్నారు.
అయితే ఈ ఇంటర్ల్యూకిన్-11 అనే ప్రోటీన్ ఉత్పత్తిని అడ్డుకుంటే.. మనుషుల వయసు పెరగడాన్ని అడ్డుకోవచ్చని గుర్తించిన డ్యూక్-ఎన్యూఎస్ మెడికల్ స్కూర్ శాస్త్రవేత్తలు.. తమ పరిశోధనల కోసం ఎలుకలపై ప్రయోగాలు చేశారు. ఎలుకల నుంచి ఐఎల్-11 ప్రోటీన్ను తొలగించడం.. ఐఎల్-11 అడ్డుకునే ట్రీట్మెంట్ను నిర్వహించారు. దీని వల్ల ఎలుకల్లో.. వయసు పెరుగుతున్న కొద్దీ సంభవించే శారీరక క్షీణత, ఇతర రోగాలు, బలహీనత నుంచి వాటికి రక్షణ లభించింది. దీంతో వాటి సగటు జీవితకాలం 24.9 వారాలు పెరిగినట్లు పరిశోధనల్లో తేలింది.
75 వారాల వయసు ఉన్న ఎలుకల్లో ఐఎల్-11 ప్రోటీన్ ఉత్పత్తిని తగ్గించే ట్రీట్మెంట్ను ప్రారంభించి అవి చనిపోయే వరకు కొనసాగిస్తే.. మగ ఎలుకల సగటు జీవితకాలం 22.5 వారాలు పెరిగినట్లు శాస్త్రవేత్తలు గుర్తించారు. అదే సమయంలో ఆడ ఎలుకల సగటు జీవితకాలం 25వారాలు పెరిగినట్లు వెల్లడించారు. ఎలుకలో 75 వారాల వయసు అంటే.. ఇది మనుషుల్లో దాదాపు 55 ఏళ్లకు సమానం. అంతేకాకుండా ఈ చికిత్సలో ఆరోగ్య సమస్యలు తీసుకొచ్చే తెల్ల కొవ్వు బదులు.. క్యాలరీలను ఖర్చు చేసే బ్రౌన్ ఫ్యాట్ ఉత్పత్తి ఎలుకల్లో ప్రారంభమైనట్లు పేర్కొన్నారు. గుండె సంబంధిత సమస్యల నుంచి కూడా ఎలుకలకు రక్షణ లభించిందని శాస్త్రవేత్తలు తెలిపారు.
ఎలుకల జీవిత కాలం పెంచే ప్రయోగానికి సంబంధించిన ఫలితాలపై డ్యూక్-ఎన్యూఎస్ డీన్ ప్రొఫెసర్ థామస్ కాఫ్మన్ వివరాలు వెల్లడించారు. ఐఎల్-11 ప్రోటీన్ ఉత్పత్తిని అడ్డుకోవడం ద్వారా.. వృద్ధులు మరిన్ని రోజులు జీవించేందుకు ఉపయోగపడతాయని పేర్కొన్నారు. కండరాల పటుత్వం, శారీరక ధృఢత్వం పెరగటం ద్వారా వృద్ధులు.. జారి పడిపోయే ప్రమాదం కూడా తగ్గుతుందని చెప్పారు. ప్రపంచవ్యాప్తంగా ప్రజలు ఆరోగ్యవంతమైన దీర్ఘకాలిక జీవితాలు గడిపేలా ఐఎల్-11 చికిత్సను అందరికీ అందుబాటులోకి తీసుకురావాలన్నదే తమ పరిశోధనల లక్ష్యమని.. ఈ పరిశోధన చేసిన శాస్త్రవేత్త స్టార్ట్కుక్ స్పష్టం చేశారు. ఈ పరిశోధనకు సంబంధించిన వివరాలను నేచర్ అనే సైన్స్ జర్నల్ ప్రచురించింది. మనుషుల జీవితకాలాన్ని ఒక ఏడాది కాలం పాటు పొడిగిస్తే.. అది 38 ట్రిలియన్ డాలర్లు అంటే మన భారత కరెన్సీలో రూ.83 లక్షల కోట్ల సంపదను సృష్టిస్తుందని అంచనాలు ఉన్నాయి.