నెలకు రూ. 10 వేలతో చేతికి రూ. 50 లక్షలు.. పదేళ్లలోనే అద్భుతం చేసిన మ్యూచువల్ ఫండ్

నిప్పన్ ఇండియా స్మాల్ క్యాప్ ఫండ్- డైరెక్ట్ ప్లాన్- గ్రోత్.. ఇటీవలి కాలంలో ఈక్విటీ సెగ్మెంట్లో అద్భుత ప్రదర్శన చేసిన మ్యూచువల్ ఫండ్లలో ముందు వరుసలో ఉంటుందని చెప్పొచ్చు. 2010, సెప్టెంబర్ 16న లాంఛ్ అయిన ఈ మ్యూచువల్ ఫండ్ ఓవరాల్‌గా ఏకంగా 1653 శాతం రిటర్న్స్ అందించింది. ఇక మీ పెట్టుబడులపై వార్షిక ప్రాతిపదికన 23.30 శాతం రాబడి వచ్చింది. ఈ లెక్కన 2010లో ఈ స్కీంలో రూ. లక్ష పెట్టుబడి పెట్టిన వారికి ఈ 14 సంవత్సరాల వ్యవధిలో చేతికి ఏకంగా రూ. 17.5 లక్షలు రావడం విశేషం. ఇది ఒకేసారి పెట్టుబడి పెడితే ఇలా లాభాలు వచ్చాయి.

ఇక పదేళ్ల వ్యవధి రిటర్న్స్ చూసుకుంటే గనుక వార్షిక ప్రాతిపదికన 28 శాతం రిటర్న్స్ ఇచ్చింది. గత ఐదేళ్ల సగటు చూస్తే 34 శాతం రిటర్న్స్ అందించింది. ఇక మూడేళ్లు, సంవత్సరం వ్యవధిలో చూస్తే వరుసగా 36 శాతం, 60 శాతం మేర రాబడి అందించడం విశేషం. సింగిల్ ఇన్వెస్ట్‌మెంట్ మాదిరిగానే సిప్ పెట్టుబడి ద్వారా కూడా అద్భుతమైన రిటర్న్స్ ఇన్వెస్టర్లు అందుకున్నారు. సిప్ విధానంలో పెట్టుబడి పెట్టిన వారికి సగటున వార్షిక ప్రాతిపదికన 27.14 శాతం రాబడి వచ్చింది. గత 10 సంవత్సరాల్లో ఇక్కడ 322.34 శాతం రిటర్న్స్ వచ్చాయి. ఇలా రూ. 10 వేల సిప్‌ ప్రతి నెలా పెట్టుబడి పెట్టుకుంటూ పోయిన వారికి పదేళ్లలో చేతికి రూ. 50 లక్షలు వచ్చాయని చెప్పొచ్చు.

ఈ ఫండ్ విషయానికి వస్తే 95.54 శాతం పెట్టుబడులు డొమెస్టిక్ ఈక్విటీల్లోనే ఉంటాయి. మొత్తంగా 6.53 శాతం లార్జ్ క్యాప్ స్టాక్స్‌లో పెట్టుబడి పెట్టగా.. మిడ్ క్యాప్ స్టాక్స్‌లో 11.22 శాతం, స్మాల్ క్యాప్ స్టాక్స్‌లో 54.39 శాతం పెట్టుబడులు ఉన్నాయి. మ్యూచువల్ ఫండ్లలో ముఖ్యంగా కాంపౌండింగ్ (చక్రవడ్డీ) కారణంగా ఇన్వెస్టర్లకు అదిరిపోయే రిటర్న్స్ వస్తుంటాయి. ఈ చక్రవడ్డీతో ఏటా వడ్డీ వస్తూనే ఉంటుంది. అసలుపై, ఇంకా వడ్డీపై వడ్డీ వస్తుంటుంది. చాలా మంది ఇదే సూత్రంతో పెట్టుబడులు పెడుతుంటారు. వారెన్ బఫెట్ వంటి దిగ్గజ పెట్టుబడిదారులు కూడా ఇదే కారణంతో మ్యూచువల్ ఫండ్లలో భారీ లాభాలు ఆర్జిస్తుంటారు. ఇంకా.. ప్రముఖ శాస్త్రవేత్త ఆల్బర్ట్ ఐన్‌స్టీన్.. కాంపౌండింగ్ అనే దానిని ప్రపంచపు ఎనిమిదో వింతగా అభివర్ణించారంటేనే మ్యూచువల్ ఫండ్లలో పెట్టుబడులతో లాభాలు ఎలా ఉంటాయో అర్థం చేసుకోవచ్చు.