ఏబీ వెంకటేశ్వరరావుకు ఊహించని షాక్.. ఏపీ హైకోర్టులో పిటిషన్

ఆంధ్రప్రదేశ్ సీనియర్‌ ఐపీఎస్‌ అధికారి ఏబీ వెంకటేశ్వరరావు సస్పెన్షన్‌కు సంబంధించి క్యాట్ ఇచ్చిన తీర్పును హైకోర్టులో ప్రభుత్వం సవాల్ చేసింది. ఏబీ వెంకటేశ్వరరావును రెండోసారి సస్పెండ్‌ చేస్తూ ఏపీ ప్రభుత్వం తీసుకున్న నిర్ణయాన్ని తప్పుపడుతూ.. క్యాట్ ఈ నెల 8న తీర్పు ఇచ్చిన సంగతి తెలిసింది. ఆ ఉత్తర్వులను సవాల్ చేస్తూ సీఎస్ కోర్టులో పిటిషన్ దాఖలు చేశారు. హైదరాబాద్‌లో క్యాట్ ఇచ్చిన‌ ఉత్తర్వుల అమలును నిలిపివేస్తూ మధ్యంతర ఉత్తర్వులివ్వాలని పిటిషన్‌లో ప్రధానంగా కోరారు. ఐపీఎస్‌ ఏబీ వెంకటేశ్వరరావు, డీజీపీ, కేంద్ర హోంశాఖ కార్యదర్శిని పిటిషన్‌లో ప్రతివాదులుగా ప్రస్తావించారు. ఈనెల 23న ఈ పిటిషన్‌పై వేసవి సెలవుల ప్రత్యేక ధర్మాసనం విచారణ చేయనుంది.

2019 ఎన్నికలకు ముందు ఏబీ వెంకటేశ్వరరావు ఇంటిలిజెన్స్‌ చీఫ్‌గా ఉండగా.. ఈసీకి వైఎస్సార్‌సీపీకి ఫిర్యాదు చేయడంతో పక్కన పెట్టారు. 2019లో వైఎస్సార్‌సీపీ అధికారంలోకి వచ్చిన తర్వాత ఆయనకు దాదాపు తొమ్మిది నెలల పాటు పోస్టింగ్ ఇవ్వలేదు. 2014-2019 మధ్య టీడీపీ ప్రభుత్వ హయాంలో నిఘా పరికరాల కోసం తన కుమారుడికి చెందిన సంస్థకు ఏబీ వెంకటేశ్వరరావు కాంట్రాక్ట్ ఇప్పించారనే ఆరోపణలు వచ్చాయి. గత ప్రభుత్వంలో కొనుగోలు అంశంపై ఉన్నతాధికారులు అభ్యంతరం వ్యక్తం చేసినా వినిపించుకోలేదని అభియోగాలు ఉన్నాయి. ప్రధానంగా నిఘా పరికరాల వ్యవహారం, ఇజ్రాయెల్‌కు రహస్యాలు చెరవేశారని కూడా కేసు నమోదు చేసింది. ఆయన్ను విధుల నుంచి తప్పించగా.. ఏబీ వెంకటేశ్వరరావు క్యాట్‌ను ఆశ్రయించారు.

తొలిసారి క్యాట్, కేంద్ర హోంశాఖలో ఆయనకు ఊరట దక్కలేదు. అనంతరం ఏబీ వెంకటేశ్వరరావు సుప్రీంకోర్టుకు వెళ్లడంతో అనుకూలంగా తీర్పు వచ్చింది. కానీ ఆయన్ను మరోసారి ప్రభుత్వం సస్పెండ్ చేసింది. ఏపీ ప్రభుత్వం తనను సస్పెండ్‌ చేస్తూ జారీ చేసిన ఉత్తర్వులపై.. ఐపీఎస్ ఏబీ వెంకటేశ్వరరావు క్యాట్‌ను ఆశ్రయించారు. ఒకే కారణంతో రెండు సార్లు సస్పెండ్‌ చేయడాన్ని సవాల్ చేశారు.. ఈ మేరకు విచారణ జరిపిన క్యాట్ కీలక ఆదేశాలు ఇచ్చింది. ఈ సస్పెన్షన్ చెల్లదని.. ఎత్తివేస్తూ తక్షణం బాధ్యతలు అప్పగించాలని ఆదేశించింది. వేతన బకాయిలు చెల్లించాలని క్యాట్ ఆదేశాలు జారీ చేసింది. ఏబీ వెంకటేశ్వరరావు క్యాట్ తీర్పు కాపీని సీఎస్‌కు పంపించారు.. తన పోస్టింగ్, జీతభత్యాల గురించి ఆయన ప్రస్తావించారు. కానీ ఆయన్ను విధుల్లోకి తీసుకోలేదు.. ఇప్పుడు హైకోర్టులో పిటిషన్ దాఖలు చేశారు. మరి హైకోర్టు విచారణ జరిపి ఎలాంటి తీర్పును వెల్లడిస్తుందన్నది చూడాలి. మరోవైపు ఈ నెల 30తో ఐపీఎస్ వెంకటేశ్వరరావు సర్వీస్ ముగియనుంది.. ఈలోపు ఈ అంశంపై కోర్టులో క్లారిటీ వస్తుందా లేదా అన్నది ఆసక్తికరంగా మారింది.