మద్యం ప్రియులకు కిక్కిచ్చే న్యూస్.. త్వరలోనే అందుబాటులోకి

ఏపీలోని మద్యం ప్రియులకు ఇది నిజంగా కిక్కిచ్చే న్యూస్. ఎందుకంటే వారు కోరుకున్న బ్రాండ్ ఇక నుంచి వారికి అందుబాటులో ఉండనుంది. ఈ మేరకు చంద్రబాబు ప్రభుత్వం చర్యలు చేపట్టింది. ఏపీలో అక్టోబర్‌ 1 నుంచి నూతన మద్యం విధానం తీసుకురానున్నారు. ఈ మేరకు ప్రణాళిక రూపొందిస్తున్నట్లు సీఎం చంద్రబాబు ఇప్పటికే ప్రకటించారు. ఈ క్రమంలో తెలంగాణలో మాదిరిగా గీత కార్మికులకు మద్యం షాపులు కేటాయిస్తామని చెప్పారు. వారికి 10 శాతం మద్యం షాపులు ఇస్తామని ప్రభుత్వం ప్రకటించింది.

 తాజాగా మద్యం ప్రియులకు ప్రభుత్వం మరో గుడ్‌న్యూస్ చెప్పింది. ఎంఎన్‌సీ కంపెనీల మద్యం బ్రాండ్లను తెలంగాణ ప్రభుత్వం తిరిగి తీసుకొస్తుంది. ప్రముఖ బ్రాండ్లు అయిన మెక్‌డోవెల్స్, ఇంపీరియల్ బ్లూ వంటి బ్రాండ్ల మద్యం ఇప్పటికే ఏపీకి చేరుకుంది. దేశవ్యాప్తంగా ఉన్న పాపులర్ బ్రాండ్లు త్వరలోనే రాష్ట్రానికి రానున్నాయి. ఈ మేరకు ఇప్పటికే ఎక్సైజ్ శాఖ అధికారులు కసరత్తు మెుదలుపెట్టారు. రాయల్ ఛాలెంజ్, వోడ్కా, బ్లాక్ డాగ్, జానీవాకర్, వాట్ 69, యాంటిక్విటీ వంటి బ్రాండ్ల మద్యం త్వరలోనే ఏపీ వైన్ షాపుల్లో విక్రయించనున్నారు.

గత ప్రభుత్వం ఏపీలోని మద్యం దుకాణాలను సర్కార్ నిర్వహించేలా పాలసీని తీసుకొచ్చింది. అలాగే రాష్ట్రంలోనే కొత్త కొత్త బ్రాండ్లు తయారు చేసి విక్రయించారు. అవి నాసిరకంగా ఉన్నాయని.. ప్రజల ఆరోగ్యం చెడిపోతుందనే విమర్శలు వచ్చాయి. తాము అధికారంలోకి వస్తే లిక్కర్ పాలసీని మారుస్తామని చంద్రబాబు ప్రకటించారు. అనుకున్నట్లుగానే కూటమి ప్రభుత్వం అధికారంలోకి రాగా.. అక్టోబర్ 1 నుంచి కొత్త ఎక్సైజ్ పాలసీని తీసుకొచ్చేందుకు సిద్ధమయ్యారు. దాంతో పాటుగా తక్కువ ధరకే మద్యం విక్రయించేందుకు మంత్రివర్గ ఉపసంఘం ఇటీవల పేర్కొంది.

కాగా, గతంలో ఏపీలో నాసిరకం బ్రాండ్లు మాత్రమే అందుబాటులో ఉండటంతో మందుబాబులు పక్క రాష్ట్రాలకు వెళ్లి అక్రమంగా మద్యం తెచ్చుకునేవారు. తెలంగాణ, తమిళనాడు, కర్ణాటక వంటి ప్రాంతాలకు వెళ్లి ప్రముఖ బ్రాండ్ల లిక్కర్ తెచ్చుకునేవారు. ఇక నుంచి వారికి ఆ ఇబ్బందులు ఉండవు. ప్రముఖ లిక్కర్ బ్రాండ్లు ఏపీలోనే అందుబాటులోకి రానున్నాయి.