నౌక రావడంతో బ్రిడ్జిని పైకి లేపిన సిబ్బంది,,,,హైడ్రాలిక్ లోపం వల్ల యథాస్థితికి రాని వంతెన

లండన్‌‌లోని ప్రఖ్యాత టవర్‌ బ్రిడ్జ్‌ వద్ద గురువారం మధ్యాహ్నం అనూహ్య సంఘటన చోటుచేసుకుంది. థేమ్స్ నదిలో పడవ ప్రయాణానికి దారి ఇచ్చేందుకు వంతెన పైకి లేచిన సమయంలో లోపం తలెత్తింది. దీంతో వంతెన తిరిగి కిందకు రాకపోవడం వల్ల రోడ్డుకు ఇరువైపులా ట్రాఫిక్‌ స్తంభించిపోయింది. యూకే రాజధాని లండన్‌లో థేమ్స్‌ నదిపై నిర్మించిన టవర్‌ బ్రిడ్జ్‌ జల రవాణాకు.. రోడ్డు ప్రయాణాలకు వీలుగా ఉంటుంది. ఏదైనా బోటు, నౌకలు వచ్చే సమయంలో వంతెన టవర్లను పైకి లేపి.. మళ్లీ కిందకు దింపుతారు. ఇది నిరంతరం జరిగే ప్రక్రియ.

అయితే, స్థానిక కాలమానం ప్రకారం గురువారం మధ్యాహ్నం 1.15 గంటల ప్రాంతంలో ఒక నౌక వెళ్లేందుకు వంతెనకు చెందిన రెండు టవర్ల మధ్యభాగాన్ని పైకెత్తారు. బోటు వెళ్లిపోయిన తర్వాత పైకి లేచిన భాగం కిందికి దిగాలి. కానీ, లోపం కారణంగా అది యథాస్థానానికి రాలేదు. దాంతో వంతెనపై నుంచి వెళ్లే వాహనాలకు అంతరాయం ఏర్పడింది. వంతెన నుంచి కిలోమీటర్ల మేర వాహనాలు బారులు తీరాయి. దీని కారణంగా లండన్‌ నగర వీధుల్లో ట్రాఫిక్ జామ్‌ ఏర్పడింది.

‘వందెన పైకి లేచి అలాగే ఉండటం చూడటానికి మొదట బాగానే అనిపించింది.. కొద్దిసేపటి తర్వాత అసలు విషయం అర్థమైంది.. దాని ఎఫెక్ట్‌తో ట్రాఫిక్‌ క్రమంగా పెరిగిపోయి వాహనాలు స్తంభించిపోయాయి.. అరగంట తర్వాత ఆ బ్రిడ్జ్‌ కిందికి దిగడంతో అందరి మొహాల్లో సంతోషం కనిపించింది’ అని స్థానిక వ్యక్తి ఒకరు తెలిపారు. ‘నేను ఇంతకు ముందు ఎన్నడూ చూడని థేమ్స్ అందాలను చూడటానికి మరింత ఉత్సాహంగా ఉన్నాను. ముందుగా బైక్‌లను అనుమతించి.. కొద్దిసేపటి తర్వాత ట్రాఫిక్‌ను క్లియర్ చేశారు’ అని చెప్పారు.

అరగంట తర్వాత బ్రిడ్జ్‌ యథా స్థితికి రావడంతో ట్రాఫిక్‌కు అంతరాయం తొలగిపోయిందని మీడియా కథనాలు పేర్కొన్నాయి. మెట్రో యూకే ప్రకారం.. వంతెన పైకి కిందకు వచ్చేలా ఏర్పాటుచేసిన హైడ్రాలిక్‌ వ్యవస్థల్లో లోపం తలెత్తింది. థేమ్స్‌ నదిపై ఈ కదిలే వంతెన నిర్మాణం 1894లో పూర్తయింది. 76 మీటర్ల వెడల్పు, 240 మీటర్ల పొడవు ఉండే వంతెన జంట టవర్లు నదికి 61 మీటర్ల ఎత్తులో ఉంటాయి. ఈ రెండింటి మధ్య నిర్మించిన స్కైవాక్‌ ప్రత్యేక ఆకర్షణగా నిలుస్తుంది. దీనిపై నుంచి కిందికి చూస్తే రహదారిపై వెళ్తున్న వాహనాలు, కిందనే నీటిలో ప్రయాణిస్తున్న ఓడలను చూడొచ్చు.