వరల్డ్ టాప్ యూనివర్సిటీ లిస్ట్‌లో భారత్ నుంచి 91 వర్సిటీలు

ప్రపంచంలోనే బెస్ట్ యూనివర్సిటీలకు సంబంధించి 2024 ఏడాదికి గాను బ్రిటన్‌కు చెందిన టైమ్స్ హయ్యర్ ఎడ్యుకేషన్ మ్యాగజైన్ సెప్టెంబ‌ర్ 27న ఒక జాబితాను విడుదల చేసింది. వరల్డ్ యూనివర్సిటీ ర్యాంకింగ్స్ 2024 పేరుతో విడుదల చేసిన ఈ జాబితాలో ఎన్నడూ లేని విధంగా రికార్డు స్థాయిలో 91 భారతీయ విశ్వవిద్యాలయాలు చోటు దక్కించుకున్నాయి. ఈ జాబితాలో గతేడాది కేవలం భారత్ నుంచి 75 వర్సిటీలే చోటు దక్కించుకోగా.. ఈసారి ఆ సంఖ్య 91 కి పెరిగింది. ఇక భారత్ నుంచి ఇండియన్ ఇన్‌స్టిట్యూట్ ఆఫ్ సైన్స్ బెంగళూరు తొలిస్థానాన్ని దక్కించుకుంది. అయితే 2017 తర్వాత ఐఐఎస్‌సీ బెంగళూరు మళ్లీ అగ్రస్థానంలో నిలిచింది. ఇక బ్రిటన్‌కు చెందిన యూనివర్సిటీ ఆఫ్ ఆక్స్‌ఫోర్డ్ ప్రపంచంలోనే తొలి స్థానాన్ని దక్కించుకుంది. ఆ తర్వాత స్థానాల్లో స్టాన్‌ఫోర్డ్ యూనివర్సిటీ రెండో స్థానంలో.. మసాచుసెట్స్ ఇన్‌స్టిట్యూట్ ఆఫ్ టెక్నాలజీ మూడో స్థానంలో నిలిచాయి.

ఇక 2024 ఏడాదికి గానూ వరల్డ్ బెస్ట్ యూనివర్సిటీల ర్యాంకింగ్స్‌లో ప్రస్తుతం భారత్ నాల్గో స్థానంలో నిలిచింది. గతేడాది భారత్‌ నుంచి కేవలం 75 విశ్వవిద్యాలయాలు మాత్రమే ఈ ర్యాంకింగ్స్‌లో చోటు దక్కించుకోగా.. భారత్ ఆరో స్థానాన్ని దక్కించుకుంది. అయితే ఈసారి మాత్రం 91 యూనివర్సిటీలు జాబితాలో నిలిచి.. నాలుగో స్థానానికి ఎగబాకింది. అయితే భారత్‌లో ఐఐఎస్‌సీ బెంగళూరు తర్వాత ఇండియన్ అన్నా యూనివర్సిటీ, జామియా మిలియా ఇస్లామియా వర్సిటీ, మహాత్మా గాంధీ యూనివర్సిటీ, శూలినీ యూనివర్సిటీ ఆఫ్ బయోటెక్నాలజీ అండ్ మేనేజ్‌మెంట్ సైన్సెస్‌లు ఉత్తమ యూనివర్సిటీలుగా నిలిచాయి. అయితే ఈ యూనివర్సిటీలు అన్ని టాప్ 501 నుంచి 600 ర్యాంకింగ్స్‌లో ఉండటం గమనార్హం.

ఇక అలీఘర్ ముస్లిం విశ్వవిద్యాలయం గత ఏడాది 801 నుంచి 1000 మధ్య ఉండగా.. ఈసారి 601 నుంచి 800 మధ్య నిలిచింది. తమిళనాడు కోయంబత్తూరులోని భారతియార్ యూనివర్సిటీ గత ఏడాది 801 నుంచి 1000 బ్యాండ్ మధ్య ఉండగా.. ఈసారి 601 నుంచి 800 బ్యాండ్‌లో స్థానం దక్కించుకుంది. ఇండియన్ ఇన్‌స్టిట్యూట్ ఆఫ్ టెక్నాలజీ గౌహతి.. ఇండియన్ ఇన్‌స్టిట్యూట్ ఆఫ్ టెక్నాలజీ ధన్‌బాద్ వరల్డ్ టాప్ 800 యూనివర్సిటీల జాబితాలో స్థానాన్ని దక్కించుకున్నాయి. ఈ రెండు యూనివర్సిటీలు గతేడాది 1001 నుంచి 1200 బ్యాండ్ నుంచి 601 నుంచి 800 కి మెరుగుపరుచుకున్నాయి.

ఈ వరల్డ్ బెస్ట్ యూనివర్సిటీ లిస్ట్‌లో తొలిసారి చోటు దక్కించుకున్న మాలవీయ నేషనల్ ఇన్‌స్టిట్యూట్ ఆఫ్ టెక్నాలజీ జైపూర్ 601 నుంచి 800 బ్యాండ్‌లోకి చేరాయి. అయితే ఈ బ్రిటన్‌కు చెందిన టైమ్స్ హయ్యర్ ఎడ్యుకేషన్ మ్యాగజైన్ ఏటా వెల్లడించే ఈ ఫలితాల పారదర్శకత, ప్రమాణాలపై మన దేశంలోని పలు టాప్ ఐఐటీలు గత కొన్నేళ్లుగా తీవ్ర సందేహాలు వ్యక్తం చేస్తున్నాయి. ఈ క్రమంలోనే గత నాలుగేళ్లుగా ఈ ర్యాంకింగ్స్‌ను నిషేధిస్తున్నాయి. ఇందులో ఐఐటీ బాంబే, ఐఐటీ ఢిల్లీ, ఐఐటీ గౌహతి, ఐఐటీ కాన్పూర్, ఐఐటీ ఖరగ్‌పూర్, ఐఐటీ మద్రాస్, ఐఐటీ రూర్కీ ఉన్నాయి. అయితే ఐఐటీ గౌహతి గతేడాది ఈ ర్యాంకింగ్స్‌లో చేరడం గమనార్హం.