చీర, గాజులు చూపించిన కౌశిక్ రెడ్డి.. బూటు చూపించిన కాంగ్రెస్ మహిళా నేత

తెలంగాణలో అధికార కాంగ్రెస్ పార్టీ, ప్రతిపక్ష బీఆర్ఎస్ పార్టీ మధ్య తీవ్ర మాటల యుద్ధం చోటు చేసుకుంటోంది. ఇక కాంగ్రెస్ పార్టీ అధికారంలోకి వచ్చిన తర్వాత.. ఎన్నికల్లో బీఆర్ఎస్ పార్టీ తరఫున గెలిచి 10 మంది ఎమ్మెల్యేలు అధికార కాంగ్రెస్ పార్టీ కండువా కప్పుకున్నారు. ఈ నేపథ్యంలోనే కాంగ్రెస్ పార్టీతోపాటు తమకు హ్యాండ్ ఇచ్చి అధికార పార్టీలోకి వెళ్లిన ఎమ్మెల్యేలపై బీఆర్ఎస్ నేతలు తీవ్ర స్థాయిలో మండిపడుతున్నారు. పార్టీ ఫిరాయింపుల కింద కోర్టుకు కూడా ఎక్కారు. పార్టీ మారిన ఎమ్మె్ల్యేలపై అనర్హత వేటు వేయాలని కోరారు. దీనిపై విచారణ జరిపిన కోర్టు.. అసెంబ్లీ స్పీకర్‌కు కీలక సూచనలు చేసింది. అయితే ఇరు పార్టీల నేతలు మాత్రం ఒకరిపై మరొకరు తీవ్రంగా విమర్శలు చేసుకుంటున్నారు.

ఈ క్రమంలోనే ఖైరతాబాద్ ఎమ్మెల్యే దానం నాగేందర్, స్టేషన్ ఘన్‌పూర్ ఎమ్మెల్యే కడియం శ్రీహరిలపై.. హుజూరాబాద్ ఎమ్మెల్యే పాడి కౌశిక్ రెడ్డి తీవ్ర వివాదాస్పద వ్యాఖ్యలు చేశారు. అంతటితో ఆగకుండా పార్టీ మారిన ఎమ్మెల్యేలకు చీర, గాజులు పంపిస్తామని.. ఏకంగా మీడియా సమావేశంలోనే చీర, గాజులను చూపించారు. దీంతో కాంగ్రెస్ పార్టీ తీవ్రంగా మండిపడింది. ఈ నేపథ్యంలోనే మీడియా సమావేశం ఏర్పాటు చేసిన కాంగ్రెస్ పార్టీ మహిళా నేతలు పాడి కౌశిక్ రెడ్డి తీరుపై తీవ్రంగా విరుచుకుపడ్డారు. ఈ క్రమంలోనే పాడి కౌశిక్ రెడ్డి చేసిన వ్యాఖ్యలపై తీవ్ర ఆగ్రహం వ్యక్తం చేసిన మహిళా ఫైనాన్స్ కార్పొరేషన్ ఛైర్ పర్సన్ బండ్రు శోభారాణి.. తెలంగాణ మహిళలకు పోరాట స్ఫూర్తి ఉందని పేర్కొన్నారు.

భార్య, బిడ్డలను అడ్డుపెట్టుకొని హుజూరాబాద్‌లో ఎమ్మెల్యేగా గెలిచిన పాడి కౌశిక్ రెడ్డి.. చీర, గాజులు పంపాలనుకుంటే మొదట కేసీఆర్‌, కేటీఆర్‌లకే పంపాలని కౌంటర్ ఇచ్చారు. బీఆర్ఎస్ పార్టీ పుట్టిందే ఇతర పార్టీ నాయకుల చేరికతో అని గుర్తు చేశారు. ఇక కేసీఆర్ రాజకీయ పుట్టుక ఎక్కడ ఉందో చూసుకో అంటూ కౌశిక్ రెడ్డికి సమాధానం ఇచ్చారు. ఇక పాడి కౌశిక్ రెడ్డి మీద చర్యలు తీసుకోవాలని.. ఆయనపై పోలీసులకు ఫిర్యాదు చేస్తామని చెప్పారు. కౌశిక్ రెడ్డి వాఖ్యలను సుమోటోగా తీసుకుని మహిళా కమిషన్.. విచారణకు పిలవాలని పేర్కొన్నారు.

అంతేకాకుండా ఆయనను అసెంబ్లీ నుంచి సస్పెండ్ చేయాలని స్పీకర్‌ను కోరుతున్నట్లు బండ్రు శోభారాణి తెలిపారు. రేవంత్ రెడ్డి ప్రభుత్వాన్ని పడగొడతాం అంటేనే.. సర్కార్‌ను నిలబెట్టేందుకు బీఆర్ఎస్ పార్టీ ఎమ్మెల్యేలు కాంగ్రెస్‌ పార్టీలో చేరారని ఆమె తెలిపారు. మహిళలను చులకన చేసి మాట్లాడే ముందు ఒళ్లు దగ్గర పెట్టుకోవాలని.. ఆమె తాను వేసుకున్న షూ చూపించి మరీ హెచ్చరించారు.