వచ్చే ఎన్నికల్లో ఖైరతాబాద్ నుంచే పోటీచేస్తా

ఖైరతాబాద్ సిట్టింగ్ ఎమ్మెల్యే దానం నాగేందర్ కీలక కామెంట్స్ చేశారు. రానున్న ఎన్నికల్లో నియోజవర్గం నుంచి తానే పోటీ చేయనున్నట్లు వెల్లడించారు. సోషల్ మీడియాలో వస్తున్న పుకార్లను నమ్మెద్దని అన్నారు. నియోజకవర్గంలోని పలు కాలనీల్లో పర్యటించిన ఆయన.. బీఆర్ఎస్ అభ్యర్థిని తానేనని ప్రకటించుకున్నారు. ఈ విషయం సీఎం కేసీఆర్‌కు కూడా తెలుసునని అన్నారు. పనికిరాని కొన్ని యూట్యూబ్ ఛానెళ్లు తనకు టికెట్ రాదంటూ తప్పుడు ప్రచారం చేస్తున్నారని చెప్పారు. ఆ పుకార్లను నమ్మాల్సిన పనిలేదని దానం నాగేందర్ స్పష్టం చేశారు.

కాంగ్రెస్ పార్టీలో సుదీర్ఘ కాలం పాటు కొనసాగిన దానం నాగేందర్.. 2018 ఎన్నికలకు మందు టీఆర్ఎస్ (ఇప్పుడు బీఆర్ఎస్)లో చేరారు. గత అసెంబ్లీ ఎన్నికల్లో బీఆర్ఎస్ అభ్యర్థిగా ఖైరతాబాద్ నుంచి విజయం సాధించారు. అప్పుడు ఆయన ప్రత్యర్థిగా ఉన్న దాసోజు శ్రవణ్ కాంగ్రెస్ పార్టీ నుంచి పోటీ చేశారు. తర్వాత జరిగిన పరిణామాల్లో శ్రవణ్ కాంగ్రెస్ పార్టీకి రాజీనామా చేసి బీఆర్ఎస్ పార్టీలో చేరారు. రానున్న ఎన్నికల్లో ఖైరతాబాద్ నుంచి బీఆర్ఎస్ టికెట్ శ్రవణ్‌కు వస్తుందంటూ గత కొంత కాలంగా ప్రచారం జరగుతోంది. ఈ నేపథ్యంలోనే దానం నాగేందర్ ఇవాళ కీలక కామెంట్స్ చేశారు. వచ్చే ఎన్నికల్లో బీఆర్ఎస్ నుంచి పోటీ చేయనున్నది తానే అని స్పష్టం చేశారు.

ఇక వచ్చే ఎన్నికల్లో టికెట్లు ఇచ్చే అంశంపై బీఆర్ఎస్ అధినేత, సీఎం కేసీఆర్ కూడా ఇటీవల కీలక కామెంట్స్ చేశారు. గతంలో 99 శాతం సిట్టింగ్‌లకే అవకాశం కల్పిస్తామన్న సీఎం.. మెున్న జరిగిన పార్టీ ప్రజాప్రతినిధుల సభలో 40 మంది ఎమ్మెల్యేలు తమ పద్దతి మార్చుకోవాలని హెచ్చరించారు. వారిపై ఆరోపణలు ఉన్నాయని.., దళిత బంధు పథకంలోనూ డబ్బులు వసూలు చేసినట్లు తమ దృష్టికి వచ్చిందని పద్దతి మార్చుకోకుంటే టికెట్లు కష్టమేనని పరోక్షంగా హెచ్చరికలు జారీ చేశారు. నిత్యం ప్రజల్లో ఉంటూ.. వారితో మమేకం కావాలని సూచించారు. సీఎం సూచనతో బీఆర్ఎస్ ఎమ్మెల్యేలు అప్రమత్తమయ్యారు. విమర్శలకు తావు లేకుండా జాగ్రత్త పడుతున్నారు.