రెండో టీ20లో ఆసీస్ ఘన విజయం

గువహటి వేదికగా జరిగిన రెండో టీ20 మ్యాచ్‌లో ఆస్ట్రేలియా జట్టు 8 వికెట్ల తేడాతో ఘన విజయం సాధించింది. భారత్ నిర్దేశించిన 118 పరుగుల లక్ష్యాన్ని మరో 4.3 ఓవర్లు ఉండగానే చేధించింది. ఈ విజయంతో ఆసీస్ మూడు టీ20 మ్యాచ్‌ల సిరీస్‌లో 1-1తో నిలిచింది. ఆస్ట్రేలియా బౌలర్ జాసన్ బెహ్రెన్‌డార్ఫ్ ఆదిలోనే 4 వికెట్లు తీసి టీమిండియాను దెబ్బకొట్టాడు. దీంతో భారత జట్టు 118 పరుగులకే పరిమితమైంది. స్వల్ప లక్ష్యంతో బరిలో దిగిన ఆసీస్ కూడా ప్రారంభంలోనే ఓపెనర్ల వికెట్లను కోల్పోయింది. వార్నర్ (2), ఫించ్ (8) అవుటవడంతో.. ఆస్ట్రేలియా 13 పరుగులకే రెండు వికెట్లు కోల్పోయింది.

కానీ హెన్రిక్యూస్ (45 బంతుల్లో 58), ట్రావిస్ హెడ్ (34 బంతుల్లో 48) రాణించడంతో పర్యాటక జట్టు సునాయాసంగా విజయాన్ని అందుకుంది. వీరిద్దరూ కలిసి మూడో వికెట్‌కు అబేధ్యంగా 109 పరుగులు జోడించారు. భారత్‌పై టీ20ల్లో ఆసీస్‌కు ఇదే అత్యుత్తమ మూడో వికెట్ భాగస్వామ్యం కావడం గమనార్హం. హెన్రిక్యూస్ 4 సిక్సర్లు, 4 ఫోర్లు బాదగా.. హెడ్ 5 ఫోర్లు, ఒక సిక్సర్ బాదాడు.

టాస్ ఓడి ముందుగా బ్యాటింగ్ చేసిన భారత జట్టు చెత్త ప్రదర్శన చేసింది. కెరీర్లో రెండో టీ20 మ్యాచ్ ఆడుతున్న జాసన్ బెహ్రెన్‌డార్ఫ్ నాలుగు వికెట్లతో చెలరేగాడు. తొలి ఓవర్లోనే రోహిత్ శర్మ, విరాట్ కోహ్లిలను ఔట్ చేసిన బెహ్రెన్‌డార్ఫ్.. తర్వాతి ఓవర్లలో మనీష్ పాండే (6), శిఖర్ ధావన్ (2)ను పెవిలియన్ చేర్చాడు. 27 పరుగులకే నాలుగు కీలక వికెట్లు కోల్పోయిన భారత్‌ను కేదార్ జాదవ్ (27), ధోనీ (13) ఆదుకునేందుకు ప్రయత్నించారు. జాసన్ అద్భుత ప్రదర్శన చేయడంతో టీమిండియా 118 పరుగులకే ఆలౌల్ అయ్యింది.

ఈ మ్యాచ్‌లో బౌలర్లు కూడా విఫలమయ్యారు. కుల్దీప్, చాహల్ ధారాళంగా పరుగులిచ్చారు. బుమ్రా, భువీ ప్రారంభంలోనే చెరో వికెట్ తీసి ఆసీస్‌ను ఒత్తిడిలోకి నెట్టినప్పటికీ.. తర్వాత వికెట్లు తీయలేకపోయారు. ఇన్నింగ్స్ 4.4 ఓవర్లో భువీ బౌలింగ్‌లో హెన్రిక్యూస్ కీపర్‌కు క్యాచ్ ఇచ్చాడు. కానీ అంపైర్ నాటౌట్ ఇచ్చాడు. తర్వాత బంతి బ్యాట్ అంచును తాకినట్లుగా తేలింది. అప్పటికి హెన్రిక్యూస్ చేసింది 2 పరుగులు మాత్రమే.