ఆ గేమ్ ఆడితే భారీగా డబ్బులు.. చివర్లో సీన్ రివర్స్, ఏకంగా రూ.కోట్లలో

ఇప్పటి వరకు సైబర్ నేరాల గురించి విన్నాం.. రోజుకో విధంగా సైబర్ కేటుగాళ్లు అమాయకుల్ని బురిడీ కొట్టిస్తున్నారు. తాజాగా ఆన్‌లైన్ గేమ్ పేరుతో మోసాలు మొదలయ్యయాయి. కడప జిల్లాలో ఆన్‌లైన్‌ గేమ్‌ వలలో చిక్కుకుని పలువురు భారీగా నష్టపోయారు. కొంతమంది బయటికి చెబితే పరువు పోతోందని, ఇంట్లో తెలిస్తే సమస్యలు వస్తాయని బయటపడటం లేదు. ఈ ఆన్‌లైన్‌ గేమ్‌కు సంబంధించి మొబైల్‌కు ఓ లింకు వస్తుంది. దానిని ఓపెన్ చేసి.. అందులో సభ్యత్వాన్ని నమోదు చేసుకోవాలి. అందులో చూపిన వస్తువులపై రూ.4000 పెట్టుబడి పెడితే రెండు నెలల్లో రూ.23,560 ఇస్తారు. అంటే రూ.19,560 లాభం వస్తుంది.

ఈ విషయాన్ని మరొకరికి చెప్పి పెట్టుబడి పెట్టించడం, వాళ్లు ఇంకొకరితో డబ్బులు కట్టించాల్సి ఉంటుంది. ఇలా చైన్‌ లింక్‌లా ఒకరి నుంచి మరొకరు చాలామంది ట్రాప్‌లో పడ్డారు. ముందుగా పెట్టుబడి పెట్టిన వారికి డబ్బులు వచ్చాయి.. ఇది చూసి అత్యాశతో చాలామంది లక్షల రూపాయలు కట్టారు. ఇటీవల కొద్ది రోజుల నుంచి ఆ గేమ్ యాప్‌ కనిపించడం లేదు. దీంతో పెట్టుబడులు పెట్టిన వారు గగ్గోలు పెడుతున్నారు. కడప నగరంలో చాలా మంది నిరుద్యోగ యువత, చదువుకుంటున్న విద్యార్థులు, ప్రభుత్వ ఉద్యోగులు కూడా బాధితుల్లో ఉన్నారు.

వీరందరు కలిసి రూ.కోట్లలో నష్టపోయినట్లు తెలుస్తోంది. గతంలో జిల్లాలో జీవీ ఫుట్‌బాల్‌ గేమ్‌ పేరిట పెద్దసంఖ్యలో బాధితులు కోట్ల రూపాయలు పోగొట్టుకున్నారు. ఎంతో మంది అప్పుల పాలయ్యారు. తర్వాత పోలీసులను ఆశ్రయించడంతో వారు దర్యాప్తు చేపట్టి వేరే దేశంలో ఉన్న ఆ గేమ్‌ నిర్వాహకుడిని అరెస్టు చేసి తీసుకొచ్చారు. ప్రస్తుత ఆన్‌లైన్‌ గేమ్‌ నిర్వాహకులు ఎవరనేది తెలియడం లేదు. దీనిపై పోలీసులు విచారణ చేపడితే అన్ని విషయాలు బయటపడతాయి అంటున్నారు. కొంతమంది బాగా డబ్బులు సంపాదించాలనే అత్యాశకు వెళ్లి తమ దగ్గరున్న బంగారు, ఇళ్లను, స్థలాలను కుదువ పెట్టి, అప్పులు చేసి మరీ ఈ యాప్‌లో డబ్బులను పెట్టారు. కొన్ని రోజుల నుంచి ఈ యాప్‌ నిర్వాహకులు ఇప్పటికే రూ. కోట్లలో డబ్బులను జమచేసుకుని పరారైనట్లు, బోర్డు తిప్పేసినట్లు తెలుస్తోంది.