లంచం తీసుకుంటూ పట్టుబడిన ప్రభుత్వ అధికారి,,, అరెస్ట్ చేస్తే రానంటూ మారాం

సాధారణంగా లంచం తీసుకునే ప్రభుత్వ అధికారులను పట్టుకునేందుకు అవినీతి నిరోధక శాఖ అధికారులు ఎప్పటికప్పుడు స్పెషల్ డ్రైవ్‌లు చేపడుతూ ఉంటారు. బాధితుల ద్వారా సమాచారం తీసుకుని డైరెక్ట్‌గా లంచం తీసుకుంటుండగా.. రెడ్ హ్యాండెడ్‌గా పట్టుకుంటారు. అయితే ఓ ప్రభుత్వ అధికారి కూడా లంచం తీసుకుంటుండగా.. అవినీతి నిరోధక శాఖ అధికారులకు దొరికాడు. దీంతో అతడ్ని అరెస్ట్ చేసేందుకు ఏసీబీ అధికారులు నానా తంటాలు పడ్డారు. అధికారులను చూసి ఖంగుతిన్న ఆ అవినీతి ఆఫీసర్.. వారితో రాను అంటూ మారాం చేశాడు. దీంతో చేసేదేమీ లేక అధికారులు అందరూ కలిసి కాళ్లు, చేతులు పట్టుకుని ఆ అధికారిని తీసుకువెళ్లిపోయారు. దీనికి సంబంధించిన వీడియో ఒకటి ప్రస్తుతం సోషల్ మీడియాలో వైరల్‌గా మారడంతో నెటిజన్ల నుంచి ఫన్నీ కామెంట్లు వస్తున్నాయి.

ఈ ఘటన ఉత్తర్‌ప్రదేశ్‌లో జరిగింది. వివరాల్లోకి వెళ్తే లక్నో పరిధిలోని సదర్ తహసీల్‌లో అవినాష్ ఓజా అనే రెవెన్యూ అధికారి అవినీతి నిరోధక శాఖ అధికారులకు అడ్డంగా దొరికాడు. స్థానికంగా ఉన్న ఓ రైతుకు సంబంధించిన భూమిని కొలిచేందుకు ఆ రైతు వద్ద నుంచి రూ. 10 వేలు లంచంగా తీసుకుంటుండగా.. అవినీతి నిరోధక శాఖ అధికారులు రెడ్ హ్యాండెడ్‌గా పట్టుకున్నారు. ఆ తర్వాత అవినాష్ ఓజాను అరెస్ట్ చేసిన అవినీతి నిరోధక శాఖ అధికారులు అక్కడి నుంచి తీసుకెళ్లేందుకు ప్రయత్నించారు.

అయితే అందుకు అవినాష్ ఓజా ససేమిరా అనడంతో కొత్త ట్విస్ట్ చోటు చేసుకుంది. అధికారుల వెంట వెళ్లేందుకు అతడు నిరాకరించాడు. అధికారులు అతడ్ని తీసుకెళ్తుంటే కింద కూర్చోవడం, వెనక్కి వెనక్కి వెళ్లిపోవడం, వెళ్లడానికి నిరాకరించడం చేశారు. చిన్నపిల్లాడిలా రాను అంటూ మారాం చేశాడు. దీంతో విసిగిపోయిన అధికారులు.. బలవంతంగా అవినాష్ ఓజాను అక్కడి నుంచి తరలించారు. కాళ్లు, చేతులు పట్టుకుని ఈడ్చుకుంటూ తీసుకెళ్లి కారులోకి ఎక్కించారు. అయితే అవినాష్ ఓజా ఇటీవలే రాయ్‌బరేలీ నుండి లక్నో తహసీల్ సదర్‌కు బదిలీ కావడం గమనార్హం.

అవినాష్ ఓజాను అవినీతి అధికారుల బృందం అరెస్ట్ చేయడం, వారితో వెళ్లేందుకు అతడు నిరాకరించడం.. అధికారులు అతడ్ని లాక్కెళ్లిపోవడానికి సంబంధించిన దృశ్యాలను అక్కడ ఉన్న స్థానికులు వీడియో తీసి సోషల్ మీడియాలో ఉంచారు. ఇప్పుడు ఈ వీడియో తెగ వైరల్ అవుతోంది. నెటిజన్లు ఫన్నీగా కామెంట్లు పెడుతున్నారు. అసలు అతడు ప్రభుత్వ అధికారా లేక అప్పుడే స్కూల్‌కు వెళ్తున్న చిన్నారా అంటూ ట్రోల్స్, మీమ్స్‌తో నెటిజన్లు ఓ ఆట ఆడేసుకుంటున్నారు.