ఢిల్లీ మెట్రో మహిళల కోచ్‌లోకి ఎక్కిన ప్రయాణికులు,,,,తమ శైలిలో మర్యాద చూపించిన పోలీసులు

దేశంలో అనేక నగరాల్లో మెట్రో సేవలు ఉన్నాయి. అయితే అన్నింటి కంటే ఢిల్లీ మెట్రోనే స్పెషల్ అని చెప్పొచ్చు. ఎందుకంటే ఏదో ఒకరకంగా ఢిల్లీ మెట్రో వార్తల్లో నానుతూ ఉంటుంది. ప్రయాణికుల చేష్టల దగ్గర నుంచి యువత రీల్స్ వరకూ ఏదో రకంగా ఢిల్లీ మెట్రో సోషల్ మీడియాలో వైరల్ అవుతూ ఉంటుంది. అయితే ఇప్పుడు కూడా ఇలాంటి ఓ ఘటన జరిగింది. దీనికి సంబంధించిన వీడియో ప్రస్తుతం సోషల్ మీడియాలో చక్కర్లు కొడుతోంది. మెట్రోలో మహిళల కోచ్‌లోకి ఎక్కిన ప్రయాణికులకు పోలీసులు తమ మర్యాద చూపించిన వీడియో వైరల్ అవుతోంది. మెట్రో రైలును ఆపి, వారిని కిందకు దింపిన పోలీసులు.. దిగేట‌ప్పుడు వారికి త‌మ‌దైన శైలిలో మర్యాద చేశారు. అది కూడా మహిళా పోలీసులు కావటం విశేషం. దీనికి సంబంధించిన వీడియో ఇప్పుడు నెట్టింట వైరల్ అవుతోంది.

మెట్రోలో మహిళలు, వృద్ధుల కోసం ప్రత్యేక కోచ్‌లు ఉంటాయి. ఆ కోచ్‌లలోని సీట్లలో ఇతరులు కూర్చోకూడదు. మరీ ముఖ్యంగా మహిళల కోచ్‌లలోకి ప్రవేశం కూడా నిషిద్ధం. దీనికి సంబంధించి మెట్రో డిస్ ప్లేలతో పాటుగా అనౌన్స్‌మెంట్‌లు కూడా ఇస్తుంటుంది. అయితే కొంతమంది ఇవేవీ పట్టించుకోరు. ఖాళీ ఉందనే కారణంతో అందులో ఎక్కేస్తుంటారు. అలాగే ఢిల్లీ మెట్రోలోనూ కొంతమంది ప్రయాణికులు మహిళల కోచ్‌లోకి ఎక్కారు. దీనిపై ఆ కోచ్‌లోని మహిళలు అభ్యంతరం కూడా చెప్పారు. అయితే వారు ఇవేమీ పట్టించుకోలేదు. పైగా ఎందుకు దిగాలంటూ ఎదురు ప్రశ్నించారు. దీంతో మహిళా ప్రయాణికులు దీనిపై మెట్రో సిబ్బందికి సమాచారం ఇచ్చారు.

ఇక మహిళా ప్రయాణికుల ఫిర్యాదుతో సీఐఎస్ఎఫ్ సిబ్బందితో పాటుగా పోలీసులు కూడా తదుపరి స్టేషన్‌లో మెట్రో వద్దకు చేరుకున్నారు. మహిళల కోచ్‌లోకి ఎక్కిన ప్రయాణికులను దిగాలని కోరారు. అయితే వారు అందుకు నిరాకరించడంతో పాటుగా వాగ్వాదానికి దిగినట్లు తెలిసింది. దీంతో మహిళల కోచ్‌లోకి ఎక్కిన ప్రయాణికులను కిందకు దింపిన పోలీసులు.. తమ శైలిలో మర్యాద చేశారు. ఓ మహిళా పోలీస్ అధికారి వారికి చెంపదెబ్బలు రుచి చూపించింది. ఈ వీడియో ఇప్పుడు నెట్టింట వైరల్ అవుతోంది. అయితే ఈ వీడియో ఇప్పటిది కాదని తెలుస్తోంది. పాత వీడియోను ఇప్పుడు వైరల్ చేస్తున్నారు. అయితే ఈ వైరల్ వీడియో మీద నెటిజనం భిన్నరకాలుగా స్పందిస్తున్నారు.

మహిళల కోచ్‌లోకి ఎక్కడం తప్పని కొంతమంది కామెంట్లు పెడుతుంటే.. మరి పురుషులకు ప్రత్యేక కోచ్‌లు ఎందుకు లేవని మరికొంత మంది ప్రశ్నిస్తున్నారు. జనరల్ కోచ్‌లు అన్నీ పూర్తిగా నిండిపోయిన సమయంలో ఎక్కడ ఎక్కాలని ప్రశ్నిస్తున్నారు. మహిళల కోచ్‌లోకి ఎక్కడం ఒక రకంగా తప్పైనప్పటికీ.. పోలీసులు చేయి చేసుకోవడం పద్ధతి కాదని మరి కొంతమంది కామెంట్లు పెడుతున్నారు. కావాలంటే జరిమానాలు విధించవచ్చని.. ఇలా చేయిచేసుకోవడం ఏమిటని కామెంట్స్ చేస్తున్నారు.