కోల్‌కతా హత్యాచార ఘటనలో కీలక పరిణామం.. 50మంది ఆర్‌జీ కర్ ఆస్పత్రి డాక్టర్లు రాజీనామా
national | Suryaa Desk | Published : Tue, Oct 08, 2024, 09:26 PM
దేశవ్యాప్తంగా పెను సంచలనం సృష్టించిన కోల్‌కతా ఆర్‌జీ కర్ మెడికల్ కాలేజీ ట్రైనీ డాక్టర్ హత్యాచార ఘటనలో తాజాగా కీలక పరిణామం చోటు చేసుకుంది. ఈ ఘటన జరిగినప్పటి నుంచి కోల్‌కతాలో జూనియర్ డాక్టర్లు తీవ్ర ఆందోళన చేస్తూనే ఉన్నారు. అంతేకాకుండా ఇటీవల నిరాహార దీక్ష కూడా చేపట్టారు. ఇక జూనియర్ డాక్టర్లు చేస్తున్న దీక్షకు.. ఆర్‌జీ కర్ మెడికల్ కాలేజీ డాక్టర్లు, సిబ్బంది మద్దతుగా నిలుస్తున్నారు. ఈ క్రమంలోనే తాజాగా ఆర్‌జీ కర్ మెడికల్ కాలేజీ, ఆస్పత్రిలో పనిచేసే 50 మంది డాక్టర్లు మూకుమ్మడిగా రాజీనామాలు చేయడం సంచలనంగా మారింది.
పశ్చిమ బెంగాల్‌లో అధికారంలో ఉన్న మమతా బెనర్జీ నేతృత్వంలోని తృణముల్ కాంగ్రెస్ పార్టీ ప్రభుత్వం వైఖరిని నిరసిస్తూ జూనియర్ వైద్యులు చేపట్టిన నిరాహార దీక్ష కొనసాగుతూనే ఉంది. ఈ దీక్షకు సీనియర్‌ వైద్యులు, ఫ్యాకల్టీ సభ్యులు సంఘీభావం తెలిపారు. ఈ క్రమంలోనే మంగళవారం ఉదయం 15 మంది సీనియర్‌ వైద్యులు జూనియర్ డాక్టర్ల నిరాహార దీక్షకు మద్దతు తెలపగా.. తాజాగా ఆర్‌జీ కర్ మెడికల్ ఆస్పత్రిలో పనిచేసే 50 మంది సీనియర్‌ వైద్యులు, బోధనా సిబ్బంది ఒక్కసారిగా రాజీనామాలు చేయడం తీవ్ర చర్చనీయాంశంగా మారింది. ఇక ఆ 50 మంది డాక్టర్లు రాజీనామా పత్రంపై సంతకాలు చేస్తున్న వీడియో ప్రస్తుతం సోషల్ మీడియాలో తెగ వైరల్‌ అవుతోంది.
కోల్‌కతాలోని ఆర్‌జీ కర్ మెడికల్ కాలేజీ హాస్పిటల్‌లో ఆగస్టు 9వ తేదీన అర్ధరాత్రి విధుల్లో ఉన్న జూనియర్ డాక్టర్‌పై అత్యాచారం, హత్య జరిగాయి. బాధితురాలికి న్యాయం చేయాలని జూనియర్ డాక్టర్లు, వైద్య విద్యార్థులు భారీగా నిరసనలు చేశారు. అదే సమయంలో ముఖ్యమంత్రి మమతా బెనర్జీ విజ్ఞప్తితో ప్రభుత్వంతో చర్చలు జరిపారు. అయితే వారి డిమాండ్లను నెరవేర్చడానికి దీదీ సర్కార్ హామీ ఇచ్చింది.
దీంతో 42 రోజుల పాటు నిరసనలు చేసిన జూడాలు.. వాటిని విరమించి సెప్టెంబర్ 21వ తేదీన తిరిగి విధుల్లో చేరారు. అయితే జూడాల భద్రతకు సంబంధించి మమతా బెనర్జీ సర్కార్ ఎలాంటి చర్యలు తీసుకోవడం లేదంటూ జూనియర్ డాక్టర్లు నిరవధిక నిరాహార దీక్ష చేపట్టారు. ఈ దీక్ష చేపట్టి మంగళవారానికి నాలుగో రోజులు కాగా.. తాజాగా ఈ పరిణామం చోటు చేసుకుంది.
|
|