కాఫీ, లంచ్ బ్రేక్‌లో శృంగారం చేయండి.. పిలుపునిచ్చిన ప్రభుత్వం

కొన్నిసార్లు ప్రభుత్వాలు ప్రజలకు ఇచ్చే పిలుపులు చాలా ఆశ్చర్యకరంగా ఉంటాయి. దేశంలో వచ్చిన సమస్యలను పరిష్కరించేందుకు ప్రభుత్వం రకరకాల చర్యలు తీసుకుంటూ ఉంటుంది. అయితే జనాభా తగ్గిపోతుండటం అనేది ఏ దేశానికైనా పెద్ద ఎదురుదెబ్బగా మారుతుంది. అందుకే పెళ్లిళ్లు చేసుకోండి, పిల్లల్ని కనండి అంటూ చాలా ప్రభుత్వాలు.. ప్రజలను ప్రోత్సహిస్తూ ఉంటాయి. ఈ క్రమంలోనే తాజాగా రష్యా ప్రజలకు వ్లాదిమిర్ పుతిన్ ప్రభుత్వం ఇచ్చిన సూచన వింటే షాక్ అవుతారు. రష్యాలో జననాల రేటు పడిపోతుండటంతో తీవ్ర ఆందోళన వ్యక్తం చేసిన పుతిన్ సర్కార్.. ప్రజలకు కీలక సూచన ఇచ్చింది. లంచ్, కాఫీ బ్రేక్‌లలో శృంగారంలో పాల్గొనాలని వింత సూచన చేసింది. ఇప్పుడు ఇదే తీవ్ర చర్చకు దారి తీస్తోంది.

రష్యా అధ్యక్షుడు వ్లాదిమిర్ పుతిన్ తాజాగా చేసిన వ్యాఖ్యలు.. ఆ దేశంలో చర్చకు దారితీశాయి. రష్యాలో జననాల రేటు రోజురోజుకూ పడిపోతుండటం పట్ల ఆందోళన వ్యక్తం చేసిన పుతిన్.. సంతానోత్పత్తిని పెంచాలని సూచించారు. ఇందులో భాగంగానే రష్యా ప్రజలు.. పనివేళల్లో భోజన విరామం, కాఫీ విరామాల్లో శృంగారంలో పాల్గొనాలని పేర్కొ్న్నారు. తద్వారా దేశ జనాభా రేటు క్షీణతను తగ్గించాలని ప్రజలకు పిలుపునిచ్చారు. రష్యాలో స్థిరమైన జనాభా కోసం సంతానోత్పత్తి రేటు ఒక మహిళకు 2.1గా ఉండగా.. ఆ దేశంలో ప్రస్తుతం 1.5గా మాత్రమే ఉంది. ఈ నేపథ్యంలోనే పుతిన్ ఈ సూచన చేశారు. అయితే రష్యాలో జనాభా పెరుగుదల ఆవశ్యకతను గతంలో పుతిన్ గుర్తు చేశారు.

రష్యా ప్రజల సంరక్షణ అనేది తమ దేశ జాతీయ ప్రాధాన్యత అని పుతిన్ వెల్లడించారు. రష్యా-ఉక్రెయిన్ యుద్ధం కారణంగా 10 లక్షలకు పైగా యువకులు రష్యాను వీడినట్లు తెలుస్తోంది. ఓవైపు.. సంతానోత్పత్తి రేటు తగ్గడం, మరోవైపు.. యువత దేశాన్ని వీడటంతో పుతిన్ ఈ నిర్ణయం తీసుకున్నట్లు తెలుస్తోంది. ఇక రష్యాలో తగ్గుతున్న సంతానోత్పత్తిపై ఆ దేశ ఆరోగ్య మంత్రి డాక్టర్ యెవ్జెనీ షెస్టోపలోవ్ స్పందించారు. చాలా మంది జనం.. పిల్లల్ని కనేందుకు వెనక్కి తగ్గుతున్నారని.. అయితే జీవితం తొందరగా ముగుస్తుందని గుర్తు చేశారు. అందుకే రోజుకు 12 నుంచి 14 గంటలు పని చేసేవారు కూడా తమకు దొరికిన కాస్త బ్రేక్‌ సమయంలోనైనా సంతానోత్పత్తి పెంచేందుకు సెక్స్‌లో పాల్గొనాలని ప్రజలకు సూచించారు.

1999 జూన్‌లో రష్యాలో లక్ష కంటే తక్కువగా జననాలు నమోదు అయ్యాయి. అయితే అంతకుముందు గణాంకాలతో పోలిస్తే అదే కనిష్టం కావడం గమనార్హం. ఇక యూరో న్యూస్ రష్యా యొక్క అధికారిక గణాంకాల ఏజెన్సీ రోస్‌స్టాట్‌ ప్రకారం.. గతేడాదితో పోలిస్తే ఈ ఏడాది మొదటి 6నెల్లలో 16వేల కంటే తక్కువ జననాలు నమోదయ్యాయి. మరోవైపు.. జనాభా క్షీణత 18శాతం అదనంగా పెరిగిందని పేర్కొంది. ఈ ఏడాదిలోనే 49వేల మరణాలు సంభవించగా.. అందులో ఉక్రెయిన్‌-రష్యా యుద్ధం కారణంగానే అధికంగా మరణాలు సంభవించాయని తెలిపింది.