బీజేపీ నేతకు 5 సెకెన్ల వ్యవధిలో 7 సార్లు తలవంచి నమస్కారం.. ఐఏఎస్ టీనా దాబి వీడియో వైరల్

2015 సివిల్స్ టాపర్ టీనా దాబి గురించి తెలియనివారు ఉండరు. టాపర్‌గా నిలిచి శిక్షణ సమయంలోనే తోటి ర్యాంకర్‌ను ప్రేమించి మతాంతర వివాహం చేసుకుని.. మూడేళ్ల తర్వాత విడాకులు తీసుకున్న విషయం అప్పట్లో సంచలనంగా మారింది. కాగా, ప్రస్తుతం రాజస్థాన్‌లోని బర్మేర్ జిల్లా కలెక్టర్‌గా ఉన్న ఆమె మరోసారి వార్తలో నిలిచారు. ఓ రాజకీయ నేతకు ఈ యువ ఐఏఎస్‌ అధికారిణి ఏడు సెకన్ల వ్యవధిలో ఐదుసార్లు నమస్కారం చేయడం చర్చనీయాంశంగా మారింది. ఇప్పుడు ఈ వీడియో సామాజిక మాధ్యమాల్లో వైరల్‌ అవుతోంది. దీనిపై తీవ్ర విమర్శలు వెల్లువెత్తుతున్నాయి.

వివరాల్లోకి వెళ్తే.. రాజస్థాన్‌ రాష్ట్ర బీజేపీ మాజీ అధ్యక్షుడు సతీష్‌ పునియా ఎస్‌వీయూలో నుంచి దిగగానే కలెక్టర్‌ టీనా దాబి తలవంచి వెంటవెంటనే నమస్కారం చేశారు. ఇందుకు సంబంధించిన వీడియో సోషల్ మీడియాలో వైరల్‌గా మారింది. ‘నవో బర్మేర్‌’ పేరుతో జిల్లాలో ఆధునిక పద్ధతుల్లో పారిశుద్ధ్య కార్యక్రమాలు చేపడుతూ టీనా పేరు తెచ్చుకోవడం గమనార్హం.

కాన్వాయ్ నుంచి దిగుతోన్న పునియా సెల్‌ఫోన్‌లో మాట్లాడుతూ వాహనం దిగుతుండగానే ఆమె చేతులు జోడించి ఆయనకు నమస్కరించారు. ఆయన పట్టించుకోకుండా ఇంకా ఫోన్‌లో మాట్లాడుతుండగానే టీనా దాబి తలవంచి నమస్కారాలు చేస్తూనే ఉన్నారు. కొద్దిసేపటి తర్వాత ఆయన ‘థ్యాంక్యూ.. థ్యాంక్యూ! చాలా బాగా పనిచేస్తున్నారు. పారిశుద్ధ్య పనులు చేయిస్తున్నారు.. చెత్తకుండీలు ఏర్పాటు చేస్తున్నారు... ’ అంటూ ప్రశంసించారు. ‘పనులు చేయించుకోడానికి భయపెడుతున్నారా? అంటూ చమత్కరించిన ఆయన.. చాలా బాగా వర్క్ చేస్తున్నారు.. బర్మేర్ మరో ఇండోర్‌గా మారబోతుంది..’ అని వ్యాఖ్యానించారు.

అయితే, పూనియాకు టీనా దాబి వంగి వంగి నమస్కారం చేస్తోన్న ఈ వీడియో సామాజిక మాధ్యమాల్లో వైరల్‌గా మారడంతో నాయకుల పట్ల ఇంత విధేయత ప్రదర్శించాల్సిన అసవరం ఉందా? అన్న అభిప్రాయం వ్యక్తమవుతోంది. ఇక, గత నెలలోనే టీనా దాబీ బర్మేర్ కలెక్టర్‌గా బాధ్యతలు చేపట్టారు. అనంతరం ‘నవో బర్మేర్’ అనే నినాదాన్ని ఎత్తుకుని, పారిశుద్ధ్య కార్యక్రమాలకు శ్రీకారం చుట్టారు.

ఢిల్లీలోని లేడీ శ్రీరాం కాలేజీలో డిగ్రీ పూర్తిచేసిన టీనా దాబి.. 2015 అఖిల భారత సివిల్ సర్వీసెస్‌ పరీక్షకు హాజరై తొలి ప్రయత్నంలోనే టాపర్‌గా నిలిచారు. మొదటి ప్రయత్నంలోనే సివిల్స్‌కు ఎంపికావడమే కాదు... టాపర్‌గా నిలిచిన మొట్టమొదటి దళిత యువతిగా దేశం దృష్టిని ఆకర్షించారు. శిక్షణ సమయంలోనే రెండో ర్యాంకర్, జమ్మూ కశ్మీర్‌కు చెందిన అథర్ అమిర్ ఖాన్‌తో ఏర్పడిన పరిచయం ప్రేమగా మారింది. శిక్షణ తర్వాత రాజస్థాన్‌ కేడర్‌కు చెందిన ఈ ఇద్దరికీ జైపూర్‌లోనే పోస్టింగు ఇచ్చారు. 2018లో వివాహం చేసుకుని.. 2021లో విడిపోయారు. మళ్లీ 2013 బ్యాచ్‌ ఐఏఎస్‌ అధికారి ప్రదీప్‌ గవాండేను 2022లో టీనా పెళ్లి చేసుకున్నారు.