విజయవాడ దుర్గ గుడికి .. ఆ మూడు రోజులు ఈ సమయంలో దర్శనాలు నిలిపివేత

విజయవాడ ఇంద్రకీలాద్రిపై కొలువైన దుర్గమ్మ ఆలయానికి వెళ్లే భక్తులకు ముఖ్యమైన గమనిక. అమ్మవారి దర్శనానికి వచ్చే భక్తులకు ఆలయ ఈవో కె.ఎస్‌ రామారావు కీలకమైన సూచన చేశారు. దుర్గమ్మకు నివేదన సమర్పించే సమయంలో.. ఉదయం 11.30 నుంచి మధ్యాహ్నం 1.30 గంటల వరకు భక్తులు క్యూలైన్లో వేచి ఉంటున్నారు. అందుకే ఆ సమయంలో ప్రముఖుల ప్రోటోకాల్‌ దర్శనాలను నిలిపి వేస్తున్నట్లు దుర్గగుడి ఈవో తెలిపారు. అంతేకాదు శుక్ర, శని, ఆదివారాల్లో భక్తుల రద్దీ ఇతర రోజుల కంటే ఎక్కువగా ఉంటోంది. ఉదయం 11.30 నుంచి మధ్యాహ్నం 2గంటల వరకు ప్రముఖుల ప్రోటోకాల్‌ దర్శనాలకు వీలు ఉండదు.. మిగతా వేళల్లో అవకాశాన్ని వినియోగించుకోవాలని కోరారు. దుర్గగుడి అభివృద్ధి పనుల కారణంగా.. కనకదుర్గా నగర్‌లో పార్కింగ్‌ సౌకర్యం లేకపోవడంతో ఘాట్‌ రోడ్డులో పరిమితంగానే వాహనాలను నిలిపేందుకు వీలుంటుంది అన్నారు.

ఇంద్రకీలాద్రి దుర్గమ్మ దర్శనానికి ఉదయం 11.30 గంటల నుంచి మధ్యాహ్నం 1.30 లోపు.. మరోవైపు వీఐపీలు, దివ్యాంగులు, వృద్ధులు, అధికారులు రావొద్దని గతంలోనే ఈవో రామారావు విజ్ఞప్తి చేశారు. దేవస్థానంలో అభివృద్ధి పనులు జరుగుతున్నందున ఈ నిర్ణయం తీసుకున్నట్లు తెలిపారు. ఈ సమయంలో మినహా మిగతా వేళల్లోనే అమ్మవారి దర్శనానికి రావాలని.. అలాగే ఉదయం 11.45 నుంచి మధ్యాహ్నం 12.45 గంటల వరకు మహా నైవేద్యం జరుగుతుంది అన్నారు. భక్తుల ఈ విషయాన్ని గమనించి సహకరించాలని కోరారు.

మరోవైపు దుర్గమ్మ గుడికి చెందిన భూముల వ్యవహఆరంపై సామాజిక కార్యకర్త కృష్ణారావు ఫిర్యాదు చేసిన సంగతి తెలిసింది.. అధికారులు వెంటనే ఆరా తీయగా.. కీలక విషయాలు తెలిశాయి. గతంలో దుర్గమ్మకు కొందరు దాతలు కొంత భూమి కావలికారుల కోసం ఇనాం ఇచ్చారు. ఆర్‌ఎస్‌ఆర్‌లో సర్వే నంబరు 112లో 11.54 ఎకరాలు ఆలయ భూములుగా రెవెన్యూ రికార్డుల్లో ఉన్నాయి. ఈ సర్వే నంబరుతో ఆర్‌ఎస్‌ఆర్‌లో 1929 నాటి రెవెన్యూ పుస్తకంలో 11.54 ఎకరాలు నమోదైంది. వీటిని నిషేధిత జాబితాలో 22ఏ(1)సీ కింద దేవదాయ భూములుగా చేర్చలేదు. దుర్గగుడి అధికారులకు ఏడాదిగా ఫిర్యాదులు చేసినా పట్టలేదనే విమర్శలు ఉన్నాయి.