ఢిల్లీకి నారా లోకేష్,,, కేంద్ర పెద్దలతో సమావేశం

ఆంధ్రప్రదేశ్ మంత్రి నారా లోకేష్ ఢిల్లీ పర్యటనకు వెళ్లారు.. ఆయన సాయంత్రం పలువురు ఎన్డీఏ కీలక నేతలతో సమావేశంకానున్నారు. టీడీపీ ఎన్డీఏలో కీలక భాగస్వామిగా ఉన్న సంగతి తెలిసిందే.. అయితే లోకేష్ ఈ భేటీలో పలు రాజకీయ అంశాలపై కేంద్ర పెద్దలతో చర్చించబోతున్నట్లు తెలుస్తోంది. నారా లోకేష్ రాత్రికి అక్కడే బసచేసి.. గురువారం ఢిల్లీ నుంచి బయల్దేరి తిరిగి అమరావతికి రానున్నారు. మంత్రి లోకేష్ ఉన్నట్టుండి ఢిల్లీకి వెళ్లడం.. అక్కడ కేంద్ర పెద్దల్ని కలవనుండటం ఆసక్తికరంగా మారింది. లోకేష్ ఢిల్లీ పర్యటనపై అందరిలో ఆసక్తి మొదలైంది.

  ఇకపై లోకేష్ రాజకీయాంగా మరింత ఫోకస్ పెట్టాలని భావిస్తున్నట్లు తెలుస్తోంది. ఢిల్లీలో కేంద్ర పెద్దలతో టచ్‌లో ఉండాలని భావిస్తున్నట్లు ప్రచారం జరుగుతోంది. గత ప్రభుత్వ హయంలో చంద్రబాబును అరెస్ట్ చేసిన సమయంలో లోకేష్ ఢిల్లీలో చాలారోజులు ఉన్నారు. అక్కడ న్యాయవాదులతో మాట్లాడటంతో పాటుగా కేంద్ర పెద్దల్ని కూడా కలిశారు. ఆ తర్వాత పెద్దగా ఢిల్లీ వైపు వెళ్లింది లేదు.. ఇప్పుడు రాష్ట్రంలో కూటమి ప్రభుత్వం అధికారంలోకి వచ్చిన తర్వాత హస్తినకు వెళ్లారు. అక్కడ కేంద్ర పెద్దల్ని కలుస్తున్నారు. అయితే లోకేష్ పర్యటనకు రాజకీయ ప్రాధాన్యత లేదని.. ఏపీకి సంబంధించిన అంశాలపై కేంద్ర పెద్దల్ని కలుస్తున్నట్లు తెలుస్తోంది.

ఏపీలో ఎన్డీఏ కూటమి ప్రభుత్వం అధికారంలోకి వచ్చిన తర్వాత చంద్రబాబు ముఖ్యమంత్రి హోదాలో వరుసగా ఢిల్లీకి వెళ్లారు. అక్కడ ప్రధాని మోదీ, కేంద్రమంత్రుల్ని కలుస్తున్నారు. ఏపీకి సంబంధించిన అంశాలు, విభజన సమస్యలు, పెండింగ్ అంశాలపై చర్చిస్తున్నారు. అమరావతి, పోలవరం, వెనుకబడిన ప్రాంతాలకు నిధులు వంటి అంశాలపైనే ఫోకస్ పెట్టారు. గత వారమే చంద్రబాబు ఢిల్లీకి వెళ్లొచ్చారు.. కొద్దిరోజులకే లోకేష్ కూడా హస్తిన పర్యటనకు వెళ్లడం ఆసక్తికరంగా మారింది. నారా లోకేష్ బిజీగా ఉంటున్నారు.. ఓవైపు మంత్రిగా బాధ్యతలు చూస్తూనే.. మరోవైపు ప్రజాదర్బార్ పేరుతో ప్రజల నుంచి వినతులు స్వీకరిస్తున్నారు. ప్రజల సమస్యల్ని అడిగి తెలుసుకుంటూ.. వీలైనంత త్వరగా ఆ సమస్యల్ని పరిష్కరించే దిశగా చర్యలు తీసుకుంటున్నారు.